Hori doro ini getrouwfasi
„O, Jehovah, dem di foe joe no de loekoe getrouwfasi?” — Jer. 5:3.
1. Fa na fasi foe Jeruzalem ben kenki nanga di foe Jeremia?
JEHOVAH ben aksi foe na Jeruzalem foe owroetem: „Foe sainde na pipel disi . . . no de kenki foe de getrouw?” Disi ben doe kon foe di dem ben habi wan trangajesi fasi foe libi en „dem ben waka na popu pasi, leki wan asi di de trowe hemsrefi ini na stree”. Na fasi fa dem ben loekoe sani na skin fasi ben habi ongolokoe leki bakapisi, bikasi „dem no ben leri sabi na reti foe Jehovah” (Jer. 8:5-7). Contrari disi, wi de si Jeremia di hori doro ini getrouwfasi. Fo-tenti jari langa, te nanga na pori foe Jeruzalem, en srefi baka na tem dati ete, a ben go doro foe doe hem wroko foe meki Jehovah kroetoe bekenti.
2. Fa na kondisi foe Jeremia de agri nanga di foe na pipel foe Gado ini disi tem, tapoe na tori foe na bigi benawtoe di de kon? Jer. 4:5, 6; 6:1.
2 A gersi dati Jeremia no ben sabi na dee nanga joeroe foe na pori foe Jeruzalem na fesi. Ma a ben sabi foe „wan bigi babari, komoto foe na kondre foe Noordsee” — Babylon. A ben sabi dati na legre di ben sa tjari na strafoe kon, ben de kon krosibee en dati dem kroetoe foe Gado ben de seker. Na so na pipel foe Jehovah de si krin na „marki” foe na kon krosibee foe „wan bigi benawtoe . . . soleki sensi na bigin di sani ben meki . . . no ben kon ete”. — Jer. 10:22; Mark. 13:4, 19.
3. (a) San Jehovah kotoigi ini na tem disi ben meki bekenti; en o langa kaba? (b) San dem poti moksi nanga dem bribi?
3 Jehovah kristen kotoigi ben meki bekenti now kaba bijna 60 jari langa gi dem naatsi inisee nanga dorosee foe na kristenheid, dati disi grontapoe sensi 1914 de ini hem „tem foe na kaba” en dati na heri seti foe sani sa pori ini „wan tem foe benawtoe . . . soleki no ben kon sensi wan naatsi ben doe kon te leki na tem dati” (Dan. 12:1, 4). Ogri jeje krakti de tjari dem naatsi kon na wan na Har-mageddon (Openb. 16:13-16). Te dem memre foe na Jeremia-klasse de meki dem tem disi bekenti, dem de hori doro ini getrouwfasi. Dem de poti bribi moksi nanga dem horidoro. — 2 Petr. 1:5, 6.
4. San de na bron foe wi tranga, en fa wi kan agersi disi ini Jer. 17:5-8?
4 Dem memre foe na Jeremia-klasse, so toe ala dem di ben moksi dem srefi pas nanga dem Koonoekondre-preekiman, habi alatem tranga fanoodoe foe go na fesi te leki dem wini. Jehovah de sorgoe joisti now ini so wan tranga. Contrari dem wan di „de poti dem vertrouw tapoe na grontapoe libisoema en di de meki skin leki hem anoe”, dem wan di Jeremia de agersi de poti dem vertrouw tapoe Jehovah en dem de meki hem leki dem hoopoe nanga vertrouw. Dem de tron „leki wan bon di prani pe watra de”, sodati dem roetoe kan panja demsrefi foe teki ini dem dem seti foe sani di de gi libi. No na „faja” foe vervolgoe, no na „Dree” leki wan bakapisi foe wet di meki foe tapoe dem wroko, kan tapoe dem „foe meki froktoe”. Leki wan bon di de meki froktoe, dem de tjari „foeroe” prijse foe grani Jehovah. Ini disi tem dem ben kisi „blesi”. — Jer. 17:5-8.
KAKAFOETOE GI NA TESI FOE HORI DORO
5. Soortoe eksempel foe Jeremia moe gi wi dekati?
5 Now son wan ben poti dem ai tapoe goedoe na presi tapoe na diri goedoe foe Koonoekondre-diniwroko? Son wan habi moeiti foe hori doro? We, hori dan ini prakseri dati Jeremia son tron ben feni hen moeiliki foe hori doro ooktoe. A ben wani tapoe srefi nanga na diniwroko foe Gado. Ma dan a ben si dati na woortoe foe Jehovah na ini hem ati ben de „leki wan faja”, „di ben de ini hem bonjo”. Na woortoe dati ben gi hem tranga foe feti doro en tan winiman foe hem feejanti (Jer. 20:9). Te wi ondrosoekoe wan toe foe dem problema di Jeremia ben habi foe doe nanga dem en di a ben wini, dan disi sa foeroe wi nanga na lostoe foe hori doro foe kisi na wini!
6. (a) Pe Jeremia ben feni krakti foe hori doro? (b) Soortoe demakandra akroederi nanga na eksempel foe Jeremia wi moe komoto na hem pasi?
6 Jeremia ben ondrofeni bita vervolgoe foe hem eegi kondreman ini Anatoth, di ben taigi hem: „Joe no moe taki profeeti-tori ini na nem foe Jehovah, foe joe no dede ini wi anoe”. Hem eegi brada nanga memre foe na osofamiri foe hem papa ben doe falsi nanga hem (Jer. 11:21; 12:6; 15:10). Jeremia ben feni na krakti foe hori doro. Pe? A ben kisi krakti foe na begi di a ben begi na Jehovah nanga di a ben verstan na bigi grani di a ben habi foe tjari Jehovah nem nanga woortoe:
„Mi ben feni joe woortoe en mi ben njan dem; en joe woortoe ben gi mi bigi prisiri nanga prisiri foe ati; bikasi joe nem ben kari tapoe mi, o Jehovah foe dem fetiman. Mi no ben sdon ini dem groepoe mati foe dem di de spotoe en mi no ben gi mi srefi abra na oproeroe prisiri” (Jer. 15:16, 17).
Jeremia ben kisi prisiri foe Jehovah woortoe nanga na tjari foe na nem foe Jehovah. A no ben habi prisiri ini na leegi spotoe foe goddelosoe soema en a ben komoto nanga koni ini na pasi foe dem. Wi ben sa moe doe disi moro pikinso?
7. San ben jepi Jeremia foe teki sondro kragi dati a no ben mag trow? (b) Fa Jeremia ben doe nanga na fasi fa Pashur ben doe nanga hem tapoe wan ogri-ati fasi?
7 Leki wan marki dati hem boskopoe ben de troe troe waarheid, Jehovah ben tapoe Jeremia foe no trow. Na so fasi a no ben sa meki pikin di ben sa kisi pori. A no ben kragi foe di a no ben trow, ma a gi hemsrefi krin krin na a wroko di ben moe doe. Baka wan pisi tem dan Pashur, wan hee soema ini na oso foe Jehovah, ben naki foetoe na dem woortoe foe Jeremia, a ben naki hem en ben meki dem poti hem na neti ini na blok. Ma baka di Jeremia ben kon fri, a ben meki bekenti na Pashur dati heri Juda ben sa gi ini na anoe foe Babylon. — Jer. 16:1-4; 20:1-6.
8. Fa Jeremia ben sori dati a no ben frede ondro na rigeri foe Jojakim?
8 Di na goddelosoe koonoe Jojakim ini 628 bifo wi teri ben kon tapoe na troon, dan Jehovah ben meki Jeremia meki wan krakti profeeti-tori bekenti en ete wan tron a ben taigi hem: „No poeroe no wan woortoe”. Te Jeremia ben tanapoe ini na djari foe na tempel foe Jehovah, a ben taki foe datede ala woortoe di Jehovah ben komanderi hem foe taki, troe troe wan boskopoe foe go na pori foe Juda nanga Jeruzalem. San ben de na bakapisi? Na tori de piki:
„So a ben pasa, di Jeremia ben kaba foe taki ala sani, di Jehovah ben komanderi hem foe taki, dati dem priester nanga dem profeeti nanga na heri pipel ben graboe hem hori en dem taki: ’Joe sa dede troe troe. Foe sainde joe ben taki ini na nem foe Jehovah, taki: „Soleki dati foe Silo so na oso disi sa tron, en na foto disi srefi sa pori foe de sondro soema di de libi na ini”?’ En heri na pipel ben tan lontoe Jeremia ini na oso foe Jehovah” (Jer. 26:1-9).
Dem granman foe Juda ben kon, en dem priester nanga profeeti ben aksi foe kiri Jeremia. Ma ini wan faja lezing Jeremia sori krin dati Jehovah ben seni hem foe taki profeeti-tori, dati a ben jere na sten foe Jehovah en dati dem ben sa trowe onschuldig broedoe efoe dem ben kiri hem. — Jer. 26:10-15.
9. (a) Soema ben opo tanapoe gi Jeremia? (b) Na soortoe sani no langa pasa kaba disi de memre wi?
9 Dan dem granman nanga na heri pipel opo tanapoe gi Jeremia nanga dem woortoe: „Ini na nem foe Jehovah, wi Gado, a ben taki nanga wi. Ooktoe Jeremia ben kisi jepi foe wan toe foe dem owroeman, soleki Ahikam, na papa foe Gedalja (Jer. 26:16-24). Jeremia foe datede tan taki profeeti-tori sondro frede. Na tapoe di dem soema foe Juda ben tapoe foe wan pisi tem foe feti nanga Jeremia de memre wi na a verlekti di dem brada foe wi ben kisi ini Malawi pikinso. Tori no langa pasa kaba de sori dati foeroe foe dem ben kon fri foe strafoe-oso en ben kan drai go baka na oso en ben kan wroko dem gron baka. Son jongoewan di ben vervolgoe dem, de studeri na bijbel nanga dem now. Ini tra pisi foe na kondre dem lantiman nanga famiri de meki hem moeiliki gi na pipel foe Jehovah foe libi wan normaal libi. Ma net soleki Jeremia dem de tan hori doro ini dem getrouwfasi.
NA TROBI FOE DEM PROFEETI
10, 11. (a) Soortoe profeeti-agersi-tori Jeremia nanga Hananja ben sori? (b) Fa Jeremia ben tron wan troe profeeti?
10 Ondro na rigeri foe koonoe Zedekia Jeremia ben gi ooktoe wan profeeti-agersi-tori. Leki fa Jehovah ben sori hem, a ben poti tapoe hem neki oedoe tjatjari, en a ben meki bekenti dati Juda nanga dem naatsi di ben de na lontoe ben moe poti demsrefi ondro na tjatjari foe na koonoe foe Babylon, noso dem ben sa kisi hebi strafoe. Na profeeti Hananja ben poeroe na oedoe tjatjari foe na neki foe Jeremia en broko hem en a ben taki dati Jehovah ini toe jari tem ben sa broko makriki na tjatjari foe Babylon tapoe dem neki foe dem naatsi. — Jer. 27:2-15; 28:1-11.
11 Soema ben wini ini na trobi disi foe profeeti? Na Jeremia ofoe Hananja ben de na troe profeeti foe Jehovah? Jehovah no ben meki no wan soema degedege ini disi, di a komanderi Jeremia foe taki dati na presi foe na oedoe tjatjari wan isri tjatjari ben sa kon en dati Hananja ben sa dede ini na jari dati srefi. No wawan Hananja ben dede ini na di foe seebi moen foe na jari dati, ma na tjatjari foe Babylon te foe kaba ben de troe troe wan isri tjatjari. — Jer. 28:12-17.
12, 13. (a) Soortoe groepoe ini na tem disi de doe leki Hananja en san de pasa nanga dem? (b) San de gi jepi na dem troe kotoigi foe Gado?
12 Fa dem falsi profeeti foe na tem disi, di de soekoe foe broko saka na wroko foe Jehovah kotoigi nanga ogri prakseri, gersi Hananja! Son wan foe dem kande de waka wan pisi tem nanga Gado pipel, ma dem no de tevreede moro te dem gridi prakseri foe dem no kon troe, dan dem de drai go na dem srefi leri di dem ben spiti poeroe fositem. Dem de preeki „foe djaroesoe nanga stree ede” en no „nanga opregti ati”, bikasi dem no habi noti foe taki di de bow trawan (2 Petr. 2:22; Fil. 1:15). San dem de verwakti foe na kon foe na „bigi benawtoe” kenki foe di foe na Jeremia-klasse.
13 Ma net so seker leki Jehovah ben meki kon ini na presi foe na oedoe tjatjari wan isri tjatjari, na so na „bigi benawtoe” sa kon troe troe tapoe na joisti tem foe Gado. En net so seker leki Hananja ben dede ini na srefi jari dati ondro na kroetoe foe Jehovah, na so dem profeeti groepoe di de kaka foetoe sa kisi dem strafoe na a joisti tem. Dem no de njan switi foe prisiri en dem no habi Jehovah geest ofoe „woortoe”, pe dem ben sa kisi jepi. — Jer. 23:16-19; 31:1, 12.
HORI VASTE NA JOE VERTROUW
14. (a) Soortoe vertrouw wi moe sori leki Jeremia? (b) Foe sainde wi moe de alatem nanga ai?
14 Net soleki Jeremia, na so wi ooktoe moe habi vaste vertrouw ini na profeeti „woortoe” foe Jehovah. Leki wan bewijsi foe so wan vertrouw, Jeremia ben jere Jehovah woortoe en ben bai wan pisi gron ini Anatoth, wan jari nomo bifo dem Babylon legre ben fadon kon ini na kondre foe pori hem! (Jer. 32:8-25). Ini dem laatste dee disi wi toe moe habi na vertrouw, dati Jehovah sa meki kon troe ibri woortoe foe hem pramisi dati a sa kibri en poti vaste hem pipel (Jer. 32:38-41). Na tem, dati dem hemel legre ondro Jezus Kristus sa bigin nanga na aanval, de kefarliki krosibee. A de foe datede tranga fanowdoe foe tan nanga ai en meki Gado „woortoe” bekenti. — Mark. 13:10, 32-37.
15, 16. (a) San ben gi Jeremia krakti? (b) Gi soortoe problema Baruch ben moe kakafoetoe? Fa na warskow di Jehovah ben gi na Baruch de gi wi tranga? (Openb. 2:3).
15 Jeremia no ben habi hem makriki. Ma nanga hem vertrouw ini Jehovah nanga hem getrouwfasi na hem wroko a ben kan hori doro. A ben kan gi tranga ooktoe na hem getrouw mati nanga sekretarsi Baruch, di disi ben lasi ati. Baka di Jeremia ben taki profeeti-tori foe 20 te 30 jari baka makandra, Baruch ben taki:
„Heloe foe mi, bikasi Jehovah ben poti sari tapoe na pen-na-ati foe mi! Mi ben kon weri foe mi soktoe, en wan rostoepresi mi no ben feni.”
Ma Jehovah ben taigi hem nanga mofo foe Jeremia:
„Loekoe! San mi ben bow, mi de hari trowe, en san mi ben prani, mi de hari poeroe, ja, srefi na heri kondre. Ma foe joe see, joe de tan soekoe bigi sani. No tan soekoe dem. Bikasi loekoe, mi de tjari wan ongolokoe kon tapoe ala skin foe meti”, so Jehovah de taki, ’en mi wani gi joe joe sili leki wan goedoe ini ala presi pe joe mag go’” (Jer. 45:1-5).
Ja, na getrouw foetoeboi disi foe Gado ben kon weri te na tem ben de lon gwe. Ma Jehovah ben gi Baruch na djaranti dati hem joisti tem foe „hari poeroe en hari trowe”, hem tem foe tjari benawtoe kon tapoe na ontrouw Jeruzalem nanga Juda, ben kon krosibee. Aladi a ben gersi leki a ben poeroe poti na wan tra tem, tog na „ongolokoe” dati ben de seker!
16 Jehovah ben gi Baruch na warskow foe no drai go baka na dem grontapoe pasi foe dem Juda soema foe soekoe goedoe nanga eegi wini. Nono, a ben moesoe tan getrouw na a see foe Jehovah profeeti foe doe diniwroko. Na so a no de na tem gi no wan foe dem foetoeboi foe Gado ini na tem disi foe dem „laatste dee” foe drai go baka na a grontapoe disi pe soema de soekoe goedoe en di sa pori djonsro. Dem de tan hori dem joisti presi, foedi dem de tan doe dem diniwroko nanga hori-doro, te leki baka na bigi winti foe Har-mageddon te foe kaba dem sa kisi ini na kontren foe Gado Koonoekondre „dem sili leki goedoe”.
LOYAAL MATI
17. Soema ben de dem Rechabiet-soema, en san ben tjari hem so fara dati Jehovah ben pai dem nanga boen?
17 Jeremia ben habi moro mati. Dem disi ben kon na fesi baka someni jari foe getrouw diniwroko en nanga na tiri foe Jehovah. Di na goddelosoe Jojakim ben de ete na makti, Jehovah ben gi Jeremia komando foe tjari dem Rechabiet soema kon makandra na a tempel. Dem Rechabiet-soema ben de bakapikin foe Jonadab, di ini dem dee foe koonoe Jehu wan 250 jari na fesi, ben sori hemsrefi leki wan soema di ben tanapoe na Jehovah see (2 Kon. 10:15-17). Jonadab ben gi dem bakapikin foe hem na komando dati dem no ben mag dringi win „foe tem di no habi marki”. En now, na a fosi kon foe dem Babylon soema, dem Rechabiet-soema ben soekoe kibri ini Jeruzalem. Jeremia ben poti win gi dem. Ma foedi dem ben gi loyaal jesi na dem grantata Jonadab, dem weegri foe dringi disi. Jehovah ben poti na wan see na trangajesi foe Juda nanga Jeruzalem en na a tra see na loyaliteit foe dem Rechabiet-soema en a ben taki:
„Foe Jonadab, na manpikin foe Rechab, no sa koti poeroe wan man, di no sa tanapoe alatem fesi Jehovah.”
Na so dem bakapikin foe Jonadab ben kisi wan bigi paiman: fri te na benawtoe ben sa kon tapoe Jeruzalem. — Jer. 35:1-19.
18. Soema de dem Rechabiet foe disi tem en pe dem de feni kibri?
18 Dem Rechabiet soema disi de agersi soema ini na tem disi — reti-ati soema nanga joisti gronprakseri, di ini na „moeiliki tem” disi kande ben proberi srefi foe soekoe kibri ini dem kerki skotoe foe na disitem kristenheid (2 Tim. 3:1). Na troe troe kibri foe dem de ini Jehovah seti nanga jepi foe Jezus Kristus. A de seni go na dem na disi tem Jeremia-klasse nanga wan boskopoe di sa wani taki jepi gi dem. Nono, na veiligheid foe dem soortoe „Jonadab” disi no kan feni ini na prati kristenheid, ma na a see foe na disi tem „profeeti” foe Jehovah.
19. Fa na fasi di Jeremia ben sori fesi Zedekia moe gi wi tranga?
19 Na laatste koonoe foe Juda, Zedekia (617-607 bifo wi teri) ben aksi Jeremia foe begi foe na boen foe Juda. Jeremia ben tan meki bekenti na pori foe Jeruzalem di ben de kon krosibee. Di bakatem, baka di dem ben doe tapoe wan ogri-ati fasi nanga hem en a ben de foeroe dee ini strafoe-oso, dem ben tjari hem go fesi na koonoe, en disi ben aksi hem na kibri fasi: „Wan woortoe foe Jehovah de?” Wantron wantron Jeremia ben gi na piki: „Dati de troe troe! . . . Ini na anoe foe na koonoe foe Babylon dem sa gi joe!” (Jer. 37:3-17). Net so dem kotoigi foe Jehovah de sori sondro foe hori wan sani na baka tapoe na kroetoe foe Gado. Dem no habi belangstelling ini beweegi di de meki propaganda foe inter-geloof en dem no habi na prakseri toe foe safoe na boskopoe di moe meki bekenti tegen na kristenheid.
20. (a) San ben meki dati Ebed-Melech ben kan jepi Jeremia en fa na Ethiopia-man disi ben kisi wan boen pai? Soema ben doe ini disi tem leki Ebed-Melech en san disi sa tjari gi dem? (Matt. 25:34, 40)
20 Foe na hori doro di Jeremia ben hori doro foe meki dem kroetoe foe Jehovah bekenti, dem ben iti hem ini wan peti, pe a ben de saka ini na toko toko. A gersi dati a ben sa kisi wan pina dede. Ma wan Ethiopia eunuch, Ebed-Melech, ben go na a koonoe en go taki foe na boen foe Jeremia. Leki fa na koonoe ben sori, dan Ebed-Melech teki 30 man nanga hem en dem ben hari Jeremia kon na loktoe nanga jepi foe broko krosi en dem ben tjari hem go na wan presi ini na Fesi-djari foe na Wakti-oso. Drape a ben tan te leki Jeruzalem ben pori en hem ben kon fri. Ma fa a ben de nanga Ebed-Melech? Di Jeremia ben de ete ini na Fesi-djari, na woortoe foe Jehovah ben kon na hem, taki:
„Go, en joe moe taigi Ebed-Melech, na Ethiopia-man: ’Disi Jehovah foe dem legre, na Gado foe Israël, ben taki: „Loekoe, mi de meki mi woortoe kon troe tapoe na foto ini ongolokoe en no ini boen, en dem sa pasa troe troe na joe fesi tapoe na dee dati. En mi wani fri joe tapoe na dee dati”, so Jehovah de taki, „en joe no sa go ini dem anoe foe dem man di joesrefi frede foe dem. Bikasi sondro misi joe sa kisi fri, en joe no sa fadon nanga na feti-owroe, en joe sa kisi joe sili leki goedoe, foedi joe ben vertrouw tapoe mi”, so Jehovah de taki.’”
Di dem legre foe Babylon foe noordsee ben lon kon, Ebed-Melech ben tan na libi. Srefi ini na tem disi foeroe soema, srefi toe rigeriman nanga man di de loekoe strafoeman, ben sori switi fasi gi dem kotoigi di ben kisi vervolgoe. Bakatem wan toe foe dem ben tron kotoigi en dem sa kisi jepi te dem hemel legre foe Jezus Kristus sa tjari strafoe kon ini Har-mageddon. — Jer. 38:6-13; 39:15-18; Openb. 7:14-17; 16:16.
21. (a) Fa joe kan agersi dem foetoeboi foe Jehovah foe disi tem nanga di foe na tem foe Jeremia? (b) Na ini soortoe fasi dem de sori hori doro? (Openb. 14:12)
21 Na wan prisiri sani foe si, dati joe habi te now na grontapoe soema di de leki Jeremia, Baruch, dem Rechabiet soema nanga Ebed-Melech. Dati disi de so, de krin foe si na heri grontapoe ini na wroko foe Jehovah kotoigi ini na dini-jari 1977. Troe troe joe sa habi wan toe, di net leki Baruch, ben kon weri en wan pisi tem ben drai go na dem eegi afersi, ma dem disi moe hori na prakseri, dati Baruch, aladi a ben kisi tesi, ben tanapoe na a see foe Gado profeeti. Ja, a habi waarde foe hori doro, nanga a prisiri na dem fesi foe libi foe teego baka na „bigi benawtoe”. Te now ete joe de feni soema di lobi retidoe en di habi wan fasi leki Jonadab nanga Ebed-Melech. Ala soema di de sori faja bribi ini Jehovah pramisi en di de hori doro te na a kaba, de wakti wan boen paiman!