Fu San Ede Wi Abi So Pikinso Ten?

TEN. Kande wi e feni en wan muilek sani fu taki soifri san a wortu dati wani taki, ma wi sabi seiker taki a gersi leki noiti wi abi nofo ten. Wi sabi tu taki ten e pasa esi-esi. Fu taki en leti, nofotron wi e dyeme: „A ten e lon.”

Ma a de krin taki na Ingrisi puwemaman Austin Dobson ben taki en moro soifri di a ben skrifi na ini 1877: „¿Yu e taki dati a ten e pasa? ¡Kwetikweti! Ke Baya, a Ten e tan, ma na wi e gowe.” Sensi di a dede na ini 1921, Dobson gowe so wan 80 yari pasa kaba; ten de ete.

Ten De Pasa Marki

Bijbel e fruteri wi fu a Kriaman fu libisma: „Fosi den bergi srefi ben kon gebore, noso yu ben meki grontapu nanga a fatu gron kon de leki nanga a pen fu wan uma di e meki wan pikin, iya, fu ten di no skotu te ten di no skotu yu na Gado” (Psalm 90:2). Noso soleki fa The New Jerusalem Bible e taki en, dan „fu têgo ten te go miti têgo ten yu na Gado”. So bun, a ten sa de so langa Gado srefi de — ¡fu têgo!

Tra fasi leki Gado, di abi têgo ten, wi e leisi fu libisma: „Bika ala den dei fu wi e kon na wan kaba na ini na atibron fu yu; wi tyari den yari fu wi kon na wan kaba neleki wan syusyu. Den dei srefi fu den yari fu wi, na seibitenti yari, èn aititenti yari, efu a de fu spesrutu krakti ede; toku san den e pusu fu du, na broko-ede nanga sani di e hati sma; bika a musu pasa gowe esi, èn na so wi e frei gowe.”—Psalm 90:9, 10.

Fu san ede a libi na ini a ten disi syatu so, ala di Bijbel e leri wi krinkrin taki Gado abi na prakseri gi libisma fu libi fu têgo? (Genesis 1:27, 28; Psalm 37:29) Fu san ede furu sma, efu ala sani e waka bun gi den, no abi moro leki 30.000 dei fu libi, na presi taki fu libi sondro wan kaba soleki fa Gado ben abi na prakseri? Fu san ede libisma abi so pikinso ten? Suma noso san tyari a sari situwâsi disi kon? Bijbel e gi krin piki di wi feni bun.a

A Ten E Kon Pikinso Moro nanga Moro

Den owrusma sa taigi yu taki na ini den someni tenti yari di pasa, a libi go moro esi. Wan nyunsuman Dr. Sybille Fritsch ben sori taki na ini den 200 yari di pasa, den yuru di sma e wroko na ini wan wiki saka fu 80 kon tron 38 yuru, „ma toku wi e tan kragi ete”. A ben tyari kon na krin: „Ten no de nofo; ten na moni; wi abi ten fanowdu neleki fa wi abi blo fanowdu; a libi gaw tumusi.”

Nyun sani di sma feni, gi den okasi di den geslakti fu fosi noiti ben prakseri. Ma o moro den man du wan heri ipi sani, o moro den e bruya fu di so pikinso ten de fu du den sani disi. Na ini a ten disi, na ini furu presi na grontapu, sma abi wan tumusi strak schema, pe den e lonlon fu miti a wan dei noso a wan yuru baka a trawan di den poti fu kaba wan wroko. Pâ musu gowe fu oso 7 yuru mamanten fu go na wroko, Mâ musu tyari den pikin go na skoro 8.30 mamanten, Owpa meki wan mofo nanga datra 9.40 mamanten, èn wi alamala musu sreka wisrefi gi wan prenspari konmakandra 7.30 bakadina. Ala di wi e hasti wisrefi fu miti a wan dei noso a wan yuru baka a trawan di poti fu kaba wan wroko, pikinso ten de nomo fu meki pikinso prisiri. Èn wi e kragi fu a wroko di wi musu du ala dei, taki wi musu hasti wisrefi doronomo.

A No Wi Wawan Abi Pikinso Ten Nomo

Satan Didibri, a Feanti fu Gado, a sma di den takru plan fu en ben meki taki a libi fu a libisma famiri kon syatu so, e firi den bakapisi now fu en eigi godelowsufasi. (Teki gersi Galasiasma 6:7, 8.) Openbaring 12:12 di e taki fu na opo di a Kownukondre fu a Mesias na hemel opo, e gi wi howpu te a e taki: „¡Fu dati ede, un prisiri, un hemel nanga unu di e libi drape! Helu fu grontapu nanga se, bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo.”

Akruderi a fasi fa Bijbel e teri ten na wan fasi di wi kan frutrow èn akruderi a kontru fu Bijbel profeititori, wi e libi now na a kaba fu a „syatu pisi ten” dati. ¡Wi kan prisiri srefisrefi now di wi sabi taki a ten di Satan abi, sa kon na wan kaba dyonsro! Te a puru na pasi kaba, dan libisma di e gi yesi sa kon volmaakti baka, èn den kan kisi a têgo libi di Yehovah ben abi na prakseri gi den ini a bigin (Openbaring 21:1-4). A mankeri di ten e mankeri no sa de wan problema moro.

¿Yu kan prakseri san a sa wani taki fu abi têgo libi — fu libi fu ala ten? Noiti moro yu sa sari fu di yu no ben man du den sani di yu ben wani du. Efu yu abi moro ten fanowdu, dan tamara de ete, noso tra wiki, noso tra yari — ¡fu taki en leti, têgo ten de na yu fesi!

Gebroiki a Ten Di Wi Abi Now, na wan Koni Fasi

Fu di Satan e frustan taki a ten di a abi fu abi krakti na libisma tapu kon syatu, meki a e pruberi fu meki sma abi someni fu du taki den no abi ten fu arki a bun nyunsu fu a Kownukondre di Gado poti. Fu dati ede a bun te wi e poti prakseri na a rai fu Gado: „So bun, luku bun fa unu e waka, no leki sma di no koni, ma leki koni sma, fu di unu e bai a yoisti ten gi unsrefi, bika den dei godelowsu. Fu dati ede, stòp fu de onreidelek, ma tan si krin san na a wani fu Yehovah.”—Efeisesma 5:15-17.

¡O prenspari a de fu gebroiki a ten fu wi na wan koni fasi gi sani di prenspari srefisrefi, na presi fu lasi ten nanga sani di no warti furu èn di no e tyari têgo wini kon! Wi musu denki leki fa Moses ben denki di a ben begi Yehovah nanga den opregti wortu disi: „Sori wi finifini fa fu teri den dei fu wi na so wan fasi taki wi kan kisi wan ati fu koni.”—Psalm 90:12.

A tru, taki na ini a grontapu fu a ten disi, ala sma abi furu fu du. Ma Yehovah Kotoigi e gi yu wan krakti deki-ati fu gebroiki pikinso fu a warti ten fu yu fu leri den sani di Gado e aksi fu wi fu kan kisi têgo libi na ondro en Kownukondre tiri. Wán yuru wán wiki di yu gebroiki fu studeri Bijbel na wan fasti ten, fu „si san na a wani fu Yehovah”, kan meki taki yusrefi sa ondrofeni fa den wortu disi e kon tru: „Drai yu baka gi san ogri èn du san bun, èn tan so te ten di no skotu. Na den regtfardiki sma sa abi grontapu leki a gudu fu den, èn den sa libi na tapu fu têgo.”—Psalm 37:27, 29.

[Futuwortu]