Sori frutrow na ini Yehovah fu di yu e pionier
1 A poti fu Kownukondre afersi na a fosi presi e aksi frutrow na ini Yehovah (Ps. 56:11; Odo 3:5; Mat. 6:33). Wi musu puru wi prakseri fu san na grontapu e si leki prenspari èn poti wi prakseri na tapu yeye waarde. Aladi na grontapu e du wan kari na tapu na angri fu kisi gudu na skinfasi, Yehovah e aksi wi tranga fu de tevrede nanga den trutru prenspari sani. — 1 Tim. 6:8; Fil. 1:10.
2 Disi de spesrutu wan tyalensi gi kresten yonguwan di wani teki den komando fu Yehovah seryusu. Den tanapu kande na ondro druk fu den meystri nanga den speri na skoro, di e si na kisi fu wan moro hey leri leki wan fanowdu sani fu abi winimarki na ini na libi. Aladi den e erken taki den abi fanowdu na skinfasi, toku furu kresten yonguwan e kakafutu na wan konifasi gi na druk disi èn e frukisi na pionierwroko leki na wroko fu den libi. Nanga na frutrow na ini Yehovah pramisi den e luku go na en fu sorgu gi den fanowdu fu den. — Ps. 62:2; 68:19; 1 Tim. 5:8; 6:9, 10.
LUKU WANTRON MORO YU EYGI SITUWÂSI
3 Na Waktitoren fu 15 februari 1983 ben gi ibriwan fu wi deki-ati fu aksi en srefi: „Mi kan gi trutru frantiwortu fu en na fesi fu Yehovah taki mi no de wan pionier?” A de krin taki na ini na ten dati furu no ben de na ini na posisi fu pionier. Ma den no ben lasi-ati, fu di den sabi taki wroko di du nanga na heri ati, awasi omeni tu, de alaten wan sani di Yehovah e teki (Mika 6:8; 2 Kor. 8:12). Bakaten, di den eygi situwâsi ben kenki, dan wan luku ete wan tron fu Na Waktitoren-artikel dati fu 1983 na ondro begi ben yepi sonwan fu tron wan pisi fu den dusundusun sma di no so langa psa teki na gewoon pionierwroko na den tapu.
4 Efu yu eygi situwâsi ben tapu yu fu go na ini na pionierwroko di na ini 1983 den wortu fu tapusey ben tyari kon a doro, dan den situwâsi fu yu fu sensi na ten dati kenki? Na ini Sranankondre den ben luku na dienstyari di psa tintin aksi fu go na ini na gewoon pionierwroko! [Na ini Verenigde Staten fu Amerkankondre moro leki 17.000!] A no abi misi taki furu fu den sma disi di aksi ben wani tron pionier na fesi kba, ma den ben musu wakti tapu wan kenki fu situwâsi.
5 Na ini son kofal na fanowdu kenki abi kande fu du nanga wan sma yeyefasi fu denki èn firi na ini na tori fu na pionierwroko. Ofu kande a de eenvoudig wan afersi fu meki wan bun schema fu wroko. Sontron a e aksi wan kenki na ini wi eygi frantiwortu èn fruplekti fu opo na pasi di e go na a pionierwroko. A de fu dati-ede bun fu meki disi tron wan doronomo tori fu begi na Yehovah, makandra nanga wan eerlijk krutu fu wi srefi èn wi situwâsi. Dusundusun sma du disi èn now e nyanbun fu den blesi fu na pionierwroko.
6 Efu wan eerlijk luku fu yu situwâsi e sori taki kande yu de wan sma di no so langa moro ben sa kan bigin nanga na pionierwroko, fu san-ede dan yu no ben sa bigin now nanga na fasti yepi-pionierwroko? Na ini wantu mun yu sa abi leki fa a sori, gobaka nanga beybristudi. Disi kan yepi yu fu abra go na wan soepel fasi na ini na gewoon pionierwroko, kande bifo na bigin fu na nyun dienstyari.
7 Yehovah e meki bigi sani psa na ini den lasti dey fu na disiten gadolowsu seti fu sani. Now a de na ten gi wi alamala fu go krosibey na en èn fu blèsi en nen „na heri dey” (Ps. 145:2; Yak. 4:8). Efu yu situwâsi e gi yu pasi fu du disi èn efu yu doro den marki fu du en, meki na pionierwroko de dan ete wan buweysi fu yu frutrow na ini Yehovah. — Ps. 94:18.