Wan ten fu moro bigi aktiviteit
1 Ala di na kba fu na gadolowsu seti fu sani fu na ten disi e tan kon moro krosibey èn wi e si fa Gado e blesi wi diniwroko psamarki, meki a de tumusi fanowdu gi wi fu poti prakseri tapu na frumane fu na apostru Petrus fu ’tranga wi yeye gi aktiviteit’. — 1 Petr. 1:13; Yes. 60:22.
2 Di Petrus ben gi na frumane san skrifi na tapusey, a ben skrifi fu na frulusu di wi ben kan kisi nanga yepi fu na brudu fu Yeyses krestes di ben trowe. Na meki bekenti fu na bun nyunsu de wán fasi fa wi kan sori wi bribi èn sori wi warderi gi den winimarki di wi e kisi fu na lobi fu Yehovah ede di a sori nanga yepi fu na presenti fu en Manpikin (Yoh. 3:16). Na ten lontu na Memrefesa de wan ten fu de moro aktief na ini na wroko disi di Gado poti.
NA MEMREFESA NANGA SPESRUTU LEZING
3 Na Memrefesa sa hori na yari disi na tapu 10 april, baka te son dongo. Yoysti now, ala di wi e wakti na spesrutu dey dati, wi kan ondrosuku wi matifasi nanga Yehovah èn na fasi fa wi e denki fu na òfer fu Yeyses. Wi e sori ibri dey bribi fu di wi e hori wi srefi soyfri na Yehovah regtfardiki markitiki na ini na tori fu wi denki, wi fasi fu taki èn wi fasi fu tyari wi srefi? Wi e sori lobi gi trawan fu di wi e span wi srefi na ini na preyki fu na Kownukondre èn na a meki fu disipri? Ibri yari na a ten fu na Memrefesa wi e memre na wan spesrutufasi san Yehovah nanga Yeyses du gi wi (Luk. 22:19; 1 Kor. 11:23, 24). A denki dipi fu disi musu buweygi wi fu du positief wroko ini akruderi nanga wi bekwaamfasi èn situwâsi leki aparti sma.
4 Na tapu 25 maart dan na ini moro furu fu den gemeente fu Yehovah Kotoygi na grontapu na spesrutu lezing sa hori fu na tori „Feti baka na trutru libi!” Fa a de wan tumusi bun okasi gi nyun sma fu bigin tay den srefi nanga na gemeente! Den wan di e fisiti na spesrutu lezing musu kisi deki-ati fu de tapu na Memrefesa na tapu 10 april.
MORO BIGI PRATI FU SPESRUTU TIJDSCHRIFT
5 Na Waktitoren nanga Ontwaakt! e prey wan prenspari rol na ini wi publiki diniwroko fu di a e gi wi alamala yeye nnyan èn leysimateriaal fu sani di e psa now. Ala Kownukondre preykiman sa warderi den spesrutu muyti di du fu na sreka fu den tijdschrift gi april nanga mei. Wi sa poti na prakseri tapu den uitgave disi te wi e pristeri abonnement. Pruberi wantron te yu kisi wan eksenplâr, fu kon sabi na inibere fu en finifini. Disi sa gi krakti na a faya fu yu fu kobroyki den na ini na preykiwroko te yu e pristeri abonnement nanga lusu eksenplâr ofu te yu e pristeri tu tijdschrift nanga wan fu den brochure na den sma di no e teki abonnement.
6 Yu man meki ten na ini yu eygi schema fu tanapu na ini maart nanga april na ini na yepi-pionierwroko? Efu difrenti preykiman na ini na gemeente e seti sani fu pionier na a srefi ten, dan den kan gi makandra yepi nanga deki-ati na ini na spesrutu ten disi fu moro bigi aktiviteit. Den owruman sa gi nanga prisiri yepi pe a de fanowdu fu di den sa sreka sani fu gi kotoygi nanga grupu.
7 Prakseri seryusu fu yu eygi situwâsi, so leki osofamiri frantiwortu, gosontu na skinfasi, grontapu wroko ofu yu schema na skoro. Efu na momenti disi yu no man fu pionier, dan na sortu fasi yu kan meki yu prati na a aktiviteit kon moro bigi? Yehovah e prisiri seyker nanga wroko di e du nanga wi heri sili èn di e sori wi lobi nanga warderi gi en gi na diri presenti fu en Manpikin, Yeyses. Ala di wi e ondrosuku wi srefi na ini na leti fu Gado Wortu, èn e tranga wi yeye gi aktiviteit, wi kan abi na frutrow taki Yehovah yeye sa horibaka gi wi na a pristeri fu prèyse òfer di bun. — Hebr. 13:15.