De na ai fu opo beibristudi
1 A opo èn hori fu beibristudi na wan pisi fu a ordru di wi kisi leki Yehovah Kotoigi (Mat. 28:19, 20). Sobun yu sa wani de wan fu den konpewrokoman fu Gado na ini a du fu disi? (1 Kor. 3:9) Fa a de wan grani fu yepi trawan fu kon leri sabi a moro bigi Sma na ini a universum!
2 Nanga den furu problema di e go makandra nanga den esi-esi kenki di e feni presi na grontapu na prakseri, dan furu reti-ati sma wani sabi nanga prisiri fu san-ede den sani disi e psa. Langa na fesi kba Yehovah ben gi piki tapu den aksi fu den. Te opregti sma e kisi leri fu a wortu fu Gado, den e kisi trowstu. Fu dati-ede wi musu de na ai fu opo beibristudi. — Odo 3:27.
DE NA AI FU SI DEN BUN OKASI
3 Yu ben prakseri fu disi fu bigin wan beibristudi nanga wan krosibei famiri ofu wan sma di yu sabi en di no de na ini waarheid? Fu di yu sabi den, meki yu abi a winimarki fu kobroiki a koni fu man si fa fu du sani, so taki yu kan teki a yoisti ten fu taki fu na afersi nanga den. Hori na prakseri taki wan yoisti aksi ofu wan wortu di taki na a yoisti ten kan wiki na belangstelling fu den gi a waarheid. Te a gridi fu wan sma fu kon sabi sani wiki, dan baka dati furutron takimakandra e kon di e meki bun froktu èn wan beibristudi kan opo.
4 Na ini furu kofal a de so taki a tumusi bun fasi fa wan kresten trowpatna e tyari en srefi ben nofo fu opo na pasi gi wan sma di no de na bribi fu kon na ini a waarheid (1 Petr. 3:1, 2). Trowpatna di no de na bribi, èn tra memre fu a osofamiri di no de na bribi ini algemeen e warderi en te memre fu a gemeente e teki den èn e respeki den. A sori fu persoonlijk belangstelling gi den kan du furu taki wan sortu matifasi fu frustan unu srefi e gro. Fu di yu e wroko makandra nanga a trowpatna ofu a osofamiri memre na ini a waarheid, meki kande yu kan opo wan beibristudi.
5 Te wi e wroko oso fu oso, wi kan pruberi fu bigin wan beibristudi na a fosi fisiti. Fa disi kan du? Son preikiman ben man fu du disi te na ososma ben poti aksi di ben kan kisi piki wantewante fu wan buku. Efu a sma e agri fu leisi a buku, ofu e gi wi wan kari fu kon na inisei, dan wi kan grabu na okasi fu go doro nanga a takimakandra èn demo kande fa wi e hori wan studi. Kobroiki a koni fu man si fa fu du sani te yu e bosroiti olanga yu sa tan na a fosi fisiti dati. A kan de wan bun sani fu drai go baka moro lati ofu na wan tra dei fu taki moro fara fu a pisi tori. Na den tra fisiti yu ben sa wani taki kande moro fara fu a tori di yu ben tyari kon na fesi na a fosi fisiti fu yu. Ofu yu ben sa kan kon baka tapu wan aksi di yu ben tyari kon na fesi na a kba fu yu fisiti di psa.
OKASI DI YU NO E FENI ALATEN
6 A gi fu okasi preiki kan de ete wan fasi di e meki froktu na ini den muiti di wi e meki fu opo osobeibristudi. Na ini den aladei wroko fu wi, wi e miti furu sma di kande wani studeri. Fu yepi unu fu abi bun bakapisi, dan wi kan kobroiki wantu fu den biginwortu fu na Taki-go-taki-kon-buku fu bigin wan takimakandra. Èn no draidrai fu pristeri wan beibristudi na a fosi leisi di yu e miti a sma, fu di a sma e libi na wan presi èn kande wi no de na ini na okasi fu hori a studi wi srefi.
7 De na ai fu kobroiki den okasi fu gi okasi preiki èn de srekasreka fu di yu e abi nofo traktaat nanga tijdschrift na yu di sa meki a belangstelling fu a arkiman gi a waarheid kon moro bigi (Odo 11:1). Efu wan sma e sori belangstelling gi a waarheid èn no e libi na ini a gebied fu yu gemeente, pruberi dan fu sabi a presi pe a e libi nanga tra bodoi di de fanowdu èn gi en na a gemeente di e wroko a gebied dati, so taki wan sma kan gi en na yoisti sorgu.
8 A wroko di de fu meki disipri no poti aparti gi wantu sma nomo. Ala sma na ini a gemeente musu teki prati na en. Fu di wi e hori na prakseri taki a meki fu disipri na wan komando di kresten kisi, meki wi e kisi a deki-ati fu de na ai fu kobroiki den bun okasi fu opo beibristudi.