Meki den doe foe Jehovah bekènti
1 „Meki den doe foe en bekènti a mindri den pipel. Froeteri taki en nen de boen hei . . . bika ala sani a ben doe pasa marki” (Jes. 12:4, 5). Fa joe e doe tapoe a deki-ati disi? Efoe wi e prakseri fa Jehovah e handri nanga wi leki en pipel èn leki aparti sma, dan na ati foe wi no e boeweigi wi foe froeteri disi na trawan? So wan 73 jari pasa Jehovah ben fri en pipel foe a katibo na Babilon. Sensi 1919 a troe anbegi ben seti boen steifi èn a panja now na ala sei foe grontapoe. Na marki na ini san Jehovah ben doe den sani disi ben pasa ala den froewakti foe wi. O dipi joe leki wan aparti sma e warderi Gado en tiri, a kibri di a e kibri joe èn a blesi foe en? Joe man doe moro foe meki den doe foe en bekènti èn foe froeteri taki en nen de boen hei?
2 A ten foe a Memrefesa e tjari wan doe foe Gado ini a prakseri foe wi èn wi sa de grantangi gi dati foe têgo. A moen april sa de wan spesroetoe joisti ten foe sori a grantangi èn a warderi foe wi gi Jehovah, foe di wi poti wi nen foe de jepipionier. So srefi efoe joe de jepipionier te a kringopziener e fisiti wi, dan joe sa abi moro wini foe a jepi èn a deki-ati foe en ini a dienst.
3 Nofotron a e wroko moro boen te sani seti so, taki groepoe preikiman e poti den nen foe de jepipionier. Wan boen schema kan meki, so taki ala sma abi wan sma foe wroko nanga en èn sisa nanga jongoe pikin kan seti sani foe jepi makandra. Nanga wan boen plan, foeroe ben kon si taki a no de toemoesi moeilek foe doro den 60 joeroe di den e aksi foe den. Disi wani taki foe gi wan gemiddelde foe 2 joeroe nomo wan dei noso 15 joeroe wan wiki na a dienst. Son jepipionier e gi wan noso toe joeroe kotoigi bifo noso baka a grontapoe wroko foe den èn den e tan moro langa ini a dienst na a kaba foe den wiki.
4 Srefi efoe joe no man foe doe a jepipionierwroko, dan kande joe man meki joe velddienstactiviteit kon de moro foeroe. Foe di joe e jepi toe foe tjari sma [kande nanga oto] noso taki joe e wroko nanga trawan di e pionier, joe sa de wan deki-ati gi den. Awansi san wi man doe foe meki Jehovah nen èn den doe foe en bekènti, a no sa pasa sondro foe wi Gado di e warderi sani, si en. — Mal. 3:16.