San wi sa doe a dienstjari disi?
1 Nanga a bigin foe a dienstjari 1994 tapoe 1 september, a de now wan boen ten gi wi alamala leki a pipel foe Jehovah, foe poti krin ini wi froestan san wi leki aparti sma èn leki wan organisâsi wani doe ini a njoen dienstjari disi.
2 Tan gro na jeje fasi: Efoe a no de so langa di wi de ini waarheid, dan wi moesoe abi na angri foe kon tranga ini bribi (Hebr. 6:1-3). Efoe wi tranga kaba na jeje fasi, dan wi no moesoe jepi soso njoensma nanga trawan, ma wi moesoe poti prakseri toe na wi eigi fasi foe denki èn noiti wi moesoe denki taki wi abi ala bijbel sabi di de fanowdoe nanga na ondrofeni ini a kresten fasi foe libi. Wi e loekoe a deitekst, wi e go skinskin nanga a bijbelleisiprograma foe a schema foe a theokrasia diniwroko-skoro èn wi e sreka gi a gemeente boekoestudie nanga a Waktitoren-studie? Dati moesoe de a moro pikinso marki di wi alamala poti gi wi srefi. Wi moesoe tan gro na jejefasi, efoe wi wani tan na libi te na ogri seti foe sani disi sa kisi pori èn kisi kibri foe go na ini a njoen grontapoe foe Gado.—Teki gersi Filipisma 3:12-16.
3 Tan krin na jeje fasi: Foe Jehovah kan feni wi boen dorodoro, wi moesoe kon krin foe „ibri doti foe skin nanga jeje” (2 Kor. 7:1). Foe san ede, efoe wantron wi de krin, wi ben sa wani foe go „lolo ini a tokotoko” baka foe na ogri owroe grontapoe disi? (Teki gersi 2 Petrus 2:22.) Wi moesoe abi a fasti bosroiti foe tan tranga èn krin na jeje fasi. Dan wi no sa de sondro sabi foe den takroe prakseri foe Satan èn taki den moro wi, so taki wi fadon ini sondoe èn lasi a boen di Jehovah feni wi boen.—2 Kor. 2:11.
4 Poti prakseri na koni rai: Odo 15:22 e poti krakti: „Foeroe raiman kan meki wi miti marki.” Ma no frigiti, taki a man di ben taki den wortoe disi, Salomo, baka ten ben gi pasi meki ’den oema beni en ati foe waka baka tra gado’, foe di a ben misi foe poti prakseri na a rai foe Gado foe no teki den oema foe dorosei kondre (1 Kon. 11:1-4). Boiti efoe wi persoonlijk e poti prakseri na koni rai, dan fa wi kan froewakti foe abi boen bakapisi ini a diniwroko foe Jehovah noso foe de wan eksempre di de warti foe sma waka na en baka? (1 Tim. 4:15) A rai foe bijbel sa jepi wi foe kibri wi ati (Odo 4:23). Foe abi lobi gi san Jehovah lobi, no wani si na ai san en no wani si na ai, soekoe a tiri foe en ala ten èn doe sani di e prisiri en, na wan troetroe kibri.—Odo 8:13; Joh. 8:29; Hebr. 1:9.
5 Na anbegi di wi e anbegi Jehovah, a no wan sani di e go foe ensrefi, a no de wan fasi foe a gi di wan sma e gi ensrefi na Gado so leki di foe sma foe grontapoe di e taki den de kresten, ma a de fajafaja, aktief èn libilibi, ini akroederi nanga a waarheid, so leki a tanapoe ini a Wortoe foe Gado.—Joh. 4:23, 24.
6 A fasti bosroiti foe wi foe doe Gado wani, kan kisi tesi ala dei. Wi moesoe kisi tranga foe di wi sabi taki „a heri gemeenschap” foe wi brada e kisi den srefi tesi disi èn taki na Jehovah di sa meki wi kon tranga (1 Petr. 5:9, 10). Dati meki, wi sa man doe wi diniwroko dorodoro ini a dienstjari 1994.—2 Tim. 4:5.