Bigin oso-bijbelstudie
1 Wan foe den ondrofeni di de moro warti èn di e gi moro satisfaksi gi troe kresten, na foe leri wan sma a waarheid nanga jepi foe wan oso-bijbelsstudie. Tokoe, son wan no e teki prati na a fasi disi foe a diniwroko, di e tjari foeroe blèsi, foe di den e denki taki den no man foe bigin èn hori wan bijbelstudie. Foeroe toemoesi boen preikiman nanga pionier ben firi densrefi so wanten. Ma, foe di den e froetrow tapoe Jehovah, èn e gebroiki den rai foe Wi Kownoekondre Dienst, den ben leri fa foe bigin èn hori bijbelstudie, èn den kisi moro prisiri ini a diniwroko. Joe kan poti a srefi marki gi joesrefi.
2 Meki boen gebroiki foe a wantewante fasi èn foe traktaat: Wán foe den moro makriki fasi foe bigin wan studie na a wantewante fasi. Son sma abi soso wan kari fanowdoe tapoe wan waran fasi, foe studeri bijbel. Wi kan doe dati, foe di wi e aksi na ososma nomo: „Joe ben sa wani foe abi wan persoonlijk oso-bijbelstudie èn kon kisi moro sabi foe bijbel nanga a prakseri foe Gado nanga a grontapoe?” Noso joe ben sa kan froeteri na ososma taki joe ben sa prisiri foe demo gi en a fasi fa wan bijbelstudie e hori. Ala di foeroe sma sa weigri a pristeri disi, prakseri foe a prisiri foe joe, te joe feni wan sma di teki wan oso-bijbelstudie!
3 Wan tra fasi foe bigin wan bijbelstudie, na foe gebroiki wán foe den traktaat foe wi. Ala di den pikin, den e tjari wan boskopoe di de krakti èn di e overtoigi sma. Fa wi kan bigin wan studie nanga wan traktaat? foe di joe e gi na ososma wan traktaat nomo di joe denki taki a sa abi belangstelling gi en. Baka dati, joe bigin fosi èn gi na ososma a kari foe leisi a fosi paragraaf nanga joe. Soekoe den tekst di skrifi èn taki fa den e fiti a materiaal. Na a fosi fisiti, joe ben sa kan loekoe soso wán noso toe paragraaf. Efoe na ososma e bigin warderi taki a e leri sani foe bijbel di e hari en prakseri, dan kande joe kan gi moro ten na den takimakandra foe joe.
4 Gebroiki soso bijbel: Sontron wan sma e agri foe taki soso foe bijbel, ma no e firi foe teki wan formeel studie, noso foe meki wan gebroiki foe den poeblikâsi foe wi. Tokoe ete, joe kan bigin èn hori wan bijbelstudie, foe di joe e sreka tapoe bijbel takimakandra di e hari sma prakseri èn di abi en gron tapoe pisi foe a Libi foe têgo-boekoe noso a Taki-go-taki-kon-boekoe, ma dan joe e gebroiki soso bijbel te joe e fisiti a sma di abi belangstelling. Den sortoe takimakandra disi kan hori 15 noso 20 miniti noso moro langa, a didon na den situwâsi. Efoe disi e doe doronomo èn nanga wan fasi di e go na fesi foe gi leri foe bijbel waarheid, dan joe bigin wan bijbelstudie, èn dan joe kan gi raport foe dati. Pristeri a Libi foe têgo-boekoe te a de a joisti ten foe doe dati èn hori wan troetroe studie nanga jepi foe a boekoe.
5 Boiti den okasi di joe e soekoe ini velddienst, joe kan proeberi foe bigin wan osobijbelstudie na den birtisma foe joe, den kompe noso famiriman? A ben de wan heri pisi ten kaba? No so langa joe ben proeberi baka? Efoe a wan fasi foe bigin bijbelstudie no ben wroko, joe ben loekoe dan foe proeberi wan trawan?
Joe kan abi boen bakapisi ini a bigin foe studie, efoe joe gebroiki den rai di den gi, e horidoro ini velddienst èn e froetrow tapoe Jehovah foe kisi en blèsi. Noiti no teri a krakti foe a waarheid nanga a jepi di Jehovah e gi, nofo. Meki a prisiri foe joe ini a diniwroko kon moro foeroe, foe di joe e begin èn hori oso-bijbelstudie.