Hori tra sma na prakseri—Pisi 1
1 Wi e prisiri foe si a gro di a pipel foe Jehovah e gro. Disi meki taki a nomroe foe gemeente kon moro foeroe. Na son kontren, spesroetoe ini den foto di moro bigi, den brada e gebroiki wán Kownoekondrezaal doronomo, èn son leisi disi e aksi taki difrenti gemeente moesoe gebroiki a srefi Kownoekondrezaal. Disi e aksi foe ala sma di abi foe doe nanga a situwâsi disi, taki den moesoe prakseri trawan di abi foe doe nanga a situwâsi disi toe.
2 Ibri gemeente di e gebroiki a Kownoekondrezaal, moesoe krin a zaal èn libi en ini wan boen kondisi gi den brada di sa kon foe gebroiki a zaal baka dati. Den stoeroe moesoe seti boen, ala lektuur moesoe poti na en joisti presi, èn den brada moesoe piki ibriwan sani di sma ben libi na baka ini a Kownoekondrezaal. Den toilet moesoe libi na baka ini boen kondisi, èn oenoe moesoe sorgoe taki sopo, doekoe foe figi anoe, toilet papira, nanga tra sani de. Sorgoe taki noti no tan ini den doti baki.
3 Te difrenti gemeente abi foe doe nanga a tori disi, dan a de tranga fanowdoe taki den e wroko makandra skinskin foe seti sani so taki den kan krin a Kownoekondrezaal ala wiki. A gwenti de, taki ibri leisi wan tra gemeente e krin a Kownoekondrezaal, gi wan pisi ten. Efoe a gemeente foe joe abi a frantiwortoe foe krin a zaal, dan sorgoe taki oenoe e krin a zaal boen èn wantewante. Dan den tra gemeente di e gebroiki a zaal, no sa abi reide foe kragi.
4 Sontron a de fanowdoe taki ibri gemeente e kenki a ten foe den konmakandra foe den, so leki te a kring-owroeman e fisiti den. Efoe wan tra gemeente e kisi foe doe nanga disi, dan den owroeman moesoe taigi a tra gemeente biten, so taki a gemeente dati kan taigi den preikiman so froekoe leki a kan. So srefi, te den brada gi primisi foe hori wan aktiviteit, so leki wan Pionierskoro, wan konmakandra foe den kring-owroeman, noso wan trow, dan den tra gemeente noso ibri kring-owroeman di o kisi foe doe nanga a tori disi, moesoe kisi foe jere disi moi na fesi; so boen, den no sa poti tapoe a schema foe den foe gebroiki a Kownoekondrezaal tapoe a srefi ten.
5 Foeroe gemeente de di e hori den konmakandra foe den ini a srefi Kownoekondrezaal, ala di den gemeente disi de foe difrenti kring. A de prenspari taki den opziener di e rèis, èn di e fisiti den Kownoekondrezaal disi, e taki nanga makandra foe den fisiti di den o meki. Te toe kring-owroeman abi tapoe a schema foe den foe fisiti den gemeente tapoe a srefi ten, dan dati kan meki taki tapoe a lasti momenti den gemeente moesoe kenki a joeroe di den e hori den konmakandra, noso a kan tjari tra problema kon.
6 Prakseri trawan foe di joe lobi den, wan boen komunikâsi, a seti di joe e seti sani boen na fesi nanga a wroko di joe e wroko makandra, sa jepi foe tan hori wan waran switi matifasi na mindri den gemeente èn a sa meki taki „ala sani waka boen èn na wan ordefasi”.—1 Kor. 14:40.