Tan meki muiti fu tron wan „nyun sma di kisi nyun fasi”, baka te yu dopu

1. San na a moro prenspari sani di abi krakti tapu a fasi fa wi de?

AWINSI wi dopu wan tu dei nomo noso furu yari langa, toku wi alamala wani tron sma di Yehovah lobi. Dati meki wi musu basi a denki fu wi. Fu san ede? Nofo tron na a denki fu wi abi krakti tapu a fasi fa wi de. Efu wi gwenti fu prakseri sani di a sondu skin wani, dan wi o taki èn du sani di no bun (Ef. 4:17-19). Ma efu wi e furu wi frustan nanga bun prakseri, dan nofo tron wi o taki èn du sani di wi Tata Yehovah feni bun.​—Gal. 5:16.

2. Sortu aksi wi o luku na ini na artikel disi?

² Soleki fa wi si na ini a fosi artikel, dan wi no kan tapu pasi gi takru prakseri ala ten. Ma wi kan bosroiti fu no du den sani dati. Fosi wi dopu wi musu tapu fu taki èn fu tyari wisrefi na wan fasi di Yehovah no lobi kwetikweti. Dati na a fosi èn a moro prenspari sani di wi musu du te wi wani kenki a fasi fa wi ben de fosi. Ma efu wi wani taki Yehovah feni wi bun, dan wi musu gi yesi tu na a wet disi: „Kon tron nyun sma di kisi nyun fasi” (Kol. 3:10). Na ini na artikel disi, wi o piki den aksi disi: San a wani taki fu tron „nyun sma di kisi nyun fasi”? Fa wi kan kisi den fasi disi èn fa wi kan sorgu taki wi no e kenki baka?

SAN A WANI TAKI FU TRON „NYUN SMA DI KISI NYUN FASI”?

3. San a wani taki fu tron wan „nyun sma di kisi nyun fasi”, èn fa wan sma e sori taki a abi den fasi disi? (Galasiasma 5:22, 23)

³ Wan sma di tron wan „nyun sma di kisi nyun fasi” e denki leki Yehovah èn dati o de fu si na ini a fasi fa a e tyari ensrefi. So wan sma e sori den fasi di a yeye fu Gado e meki sma kisi. Sobun, a sma disi e meki a santa yeye abi krakti tapu a fasi fa a e denki, a fasi fa a e firi, èn den sani di a e du. (Leisi Galasiasma 5:22, 23.) A sma dati lobi Yehovah èn a pipel fu en (Mat. 22:36-39). So wan sma no e lasi en prisiri awinsi tesi miti en (Yak. 1:2-4). A e du muiti fu libi bun nanga trawan (Mat. 5:9). A abi pasensi èn a e sori switifasi gi trawan (Kol. 3:13). A lobi san bun èn a e du dati tu (Luk. 6:35). Den sani di a e du e sori taki a e bribi tranga na ini en hemel Tata (Yak. 2:18). A no e lasi ensrefi te sma e suku trobi nanga en èn te a e kisi tesi a e dwengi ensrefi.​—1 Kor. 9:25, 27; Tit. 3:2.

4. Fu san ede wi musu kon abi ala den fasi di kari na Galasiasma 5:22, 23 èn na tra presi na ini Bijbel, efu wi wani tron nyun sma?

⁴ Efu wi wani tron nyun sma, dan wi musu kon abi ala den fasi di kari na Galasiasma 5:22, 23 èn na tra presi na ini Bijbel.b Wi musu sori ala den fasi disi na a srefi ten. Fu san ede? We, fu di ala den fasi disi abi fu du makandra. Fu eksempre, efu yu lobi tra sma trutru, dan yu o abi pasensi nanga den èn yu o sori switifasi gi den. Èn efu yu abi bun-ati trutru, dan yu o abi safri-ati èn yu o dwengi yusrefi.

FA WI KAN TRON NYUN SMA?

5. San a wani taki fu „denki soleki fa Krestes e denki” èn fu san ede wi musu kon sabi moro fu a libi fu Yesus? (1 Korentesma 2:16)

⁵ Leisi 1 Korentesma 2:16. Fu man tron wan nyun sma, dan wi musu „denki soleki fa Krestes e denki”. Dati wani taki dati wi musu kon sabi fa Yesus e denki èn dan wi musu teki na eksempre fu en. A de krin fu si taki Yesus ben abi den fasi di a yeye fu Gado e meki sma kisi. Yesus de leki wan spikri di e sori krin san na den fasi fu Yehovah (Hebr. 1:3). O moro wi e denki leki Yesus, o moro wi o du leki en èn o moro wi o kon abi den fasi fu en.​—Fil. 2:5.

6. Sortu sani wi musu hori na prakseri te wi e pruberi fu tron nyun sma?

⁶ Kande wi e tweifri efu wi kan de leki Yesus. Kande wi e denki: ’Yesus no abi sondu. Noiti mi o man de leki en!’ Efu na so yu e firi, dan hori den san disi na prakseri: A fosi sani, na taki Yehovah meki yu fu de leki en nanga Yesus. Sobun, yu kan de leki den awinsi yu e meki fowtu. Na wani yu musu wani nomo (Gen. 1:26). A di fu tu, na taki a santa yeye fu Gado na a moro bigi krakti di de na hemel èn na grontapu. A kan yepi yu fu du sani di noiti yu ben o man du nanga yu eigi krakti. A di fu dri, na taki Yehovah no e fruwakti taki wi no e meki fowtu now. Fu taki en leti, wi lobi Tata gi den wan di abi a howpu fu libi na grontapu, 1000 yari fu kenki kon tron sma di no abi nowan sondu (Openb. 20:1-3). San Yehovah e fruwakti fu wi now, na taki wi e meki muiti fu de leki en èn taki wi abi a frutrow taki a o yepi wi.

7. San wi o luku now?

⁷ Fa wi kan sori taki wi teki na eksempre fu Yesus? Kow poti prakseri syatu na fo fasi di a yeye fu Gado kan meki wi kon abi. Ibri tron wi o luku san wi kan leri fu Yesus. Wi o luku wan tu aksi tu di kan yepi wi fu kon si san wi kan du moro fu tron nyun sma.

8. Fa Yesus sori taki a lobi wi?

⁸ Fu di Yesus ben lobi Yehovah srefisrefi, meki a ben de klariklari fu du iniwan sani gi en Papa èn gi wi (Yoh. 14:31; 15:13). A fasi fa Yesus ben e libi di a ben de na grontapu, sori o furu a ben lobi libisma. Ibri dei a sori lobi nanga sari-ati gi sma, srefi te den ben e gens en. A muiti di a meki fu leri sma fu a Kownukondre fu Gado, na wan prenspari fasi fa a sori a lobi dati (Luk. 4:43, 44). Yesus ben sori tu taki a lobi Gado nanga libisma srefisrefi, di a ben de klariklari fu pina èn fu meki sondu libisma kiri en na wan ogri-ati fasi. Na a fasi dati a opo a pasi gi wi fu kan feni têgo libi.

9. Fa wi kan sori lobi neleki Yesus?

⁹ Wi gi wi libi abra na Yehovah èn wi dopu fu di wi lobi wi hemel Tata. Sobun, a fasi fa wi e libi nanga trawan, musu sori taki wi lobi Yehovah neleki fa Yesus ben sori dati. Na apostel Yohanes ben skrifi: „A sma di no lobi en brada di a man si, no man lobi Gado di a no man si” (1 Yoh. 4:20). Wi kan aksi wisrefi: ’Mi lobi trawan trutru? Mi e sori sari-ati gi sma awinsi den e taki grofu nanga mi? Lobi e meki taki mi e gebroiki mi ten nanga den sani di mi abi fu yepi trawan fu kon sabi Yehovah moro bun? Mi de klariklari fu tan du disi, awinsi furu sma no de nanga tangi gi a muiti di mi e meki fu yepi den, noso awinsi den e gens mi? San mi kan du fu feni moro ten fu yepi meki disipel?’​—Ef. 5:15, 16.

10. Fa Yesus ben sori taki a ben e libi bun nanga trawan?

¹⁰ Te sma ben e du ogri nanga Yesus, dan a no ben e pai den ogri fu ogri. Ma a no dati wawan. Te Yesus ben e si taki sma ben kisi trobi nanga makandra, dan a ben e suku fu kowru a tori èn a ben e gi den sma deki-ati fu meki en bun baka nanga makandra. Fu eksempre, a ben leri den bakaman fu en taki den ben musu meki en bun baka nanga makandra efu den ben wani taki Yehovah feni na anbegi fu den bun (Mat. 5:9, 23, 24). Èn na difrenti okasi a yepi den apostel fu en fu meki en bun baka nanga makandra te den ben meki trobi suma na a moro bigiwan.​—Luk. 9:46-48; 22:24-27.

11. Fa wi kan sori taki wi e libi bun nanga trawan?

¹¹ Te wi e libi bun nanga trawan, dan wi no o meki trobi nanga den. Ma a no dati wawan. Wi musu du muiti tu fu meki en bun nanga trawan èn wi musu gi wi brada nanga sisa deki-ati fu meki en bun baka, te den abi trobi nanga makandra (Fil. 4:2, 3; Yak. 3:17, 18). Wi kan aksi wisrefi: ’San mi de klariklari fu du fu kan meki en bun baka nanga wan trawan? Efu wan brada noso wan sisa du wan sani di hati mi, mi e hori en na ati? Mi e wakti fu a tra sma kon meki en bun baka nanga mi, noso mi e bigin du wan sani fu meki en bun baka nanga en, awinsi mi feni taki na en tyari a dyugudyugu kon? Te a fiti, mi e du muiti fu gi trawan di abi wan trobi deki-ati fu meki en bun baka nanga makandra?’

12. Fa Yesus ben sori switifasi?

¹² Yesus ben abi switifasi (Mat. 11:28-30). Wan fasi fa Yesus ben sori switifasi, na taki a no ben strak tumusi èn a ben e hori sma na prakseri na ini difrenti situwâsi. Fu eksempre, di wan uma fu Fenisia ben begi en fu dresi na umapikin fu en, dan na a bigin a no ben wani yepi en. Ma di a si taki na uma disi ben abi tranga bribi, dan a dresi a pikin fu en (Mat. 15:22-28). Aladi Yesus ben abi switifasi, toku a no ben frede fu gi sma rai. A ben e piri-ai srefi gi den wan di a lobi. Wan leisi, Petrus ben e pruberi fu tapu Yesus fu du a wani fu Yehovah, ne Yesus piri-ai gi en na fesi den tra disipel (Mark. 8:32, 33). A no ben du disi fu gi Petrus syen, ma fu leri en wan sani èn fu warskow den tra disipel taki den no ben musu pruberi fu tapu en fu du a wani fu Gado. A no de fu taki dati Petrus ben syen na a momenti dati, ma a kisi wini fu a piri-ai di a ben kisi.

13. Fa wi kan sori taki wi abi switifasi trutru?

¹³ Efu yu wani sori trutru switifasi gi den sma di yu lobi, dan son leisi yu o abi fu gi den rai. Te yu e gi den rai, dan a bun fu du dati soleki fa Yesus ben du en. Den rai di Yesus ben e gi sma, ben komoto fu Gado Wortu. Sobun, taki switi nanga trawan. No denki takru fu den. Abi a frutrow taki den sma di lobi Yehovah èn di lobi yu o arki yu fu di den e si taki yu e broko yu ede nanga den. Aksi yusrefi: ’Mi abi a deki-ati fu taki wan sani te mi si taki wan sma di mi lobi e du wan san di no bun? Efu mi musu gi en rai, mi e taki switi nanga en, noso mi e taki grofu? Fu san ede mi wani gi a sma rai? Mi e gi en rai fu di a du wan sani di meki mi ati bron, noso mi e gi en rai fu di mi wani yepi en?’

14. Fa Yesus sori bun-ati?

¹⁴ Yesus no sabi nomo san bun, ma a e du dati tu. Yesus lobi en Papa, èn dati meki ala ten a e du san bun èn a e du dati nanga wan krin ati. Wan sma di abi bun-ati lobi suku fasi fu yepi trawan èn fu du bun sani gi den. Wi no musu sabi nomo san bun, ma wi musu du dati tu èn wi musu du en nanga wan krin ati. Yu ben kan aksi yusrefi: ’Wan sma kan du san bun aladi a e hoigri?’ Iya, a kan. Fu eksempre, Yesus ben taki fu den sma di ben e du den pôtiwan wan bun, ma dan den ben e go panya a tori na ala sei, soso fu meki trawan sabi san den ben du. Aladi den ben du bun sani, toku Yehovah no ben breiti nanga den.​—Mat. 6:1-4.

15. Fa wi kan sori taki wi abi bun-ati?

¹⁵ Wan sma di abi bun-ati trutru e du san bun, sondro fu fruwakti wan sani baka. Ma yu ben kan aksi yusrefi: ’Boiti taki mi sabi san bun, mi e du dati tu? Fu san ede mi e du bun gi trawan?’

FA WI KAN SORGU TAKI WI NO E TRON A SMA BAKA DI WI BEN DE FOSI?

16. San wi musu du ibri dei èn fu san ede?

¹⁶ Wi no musu denki taki te wi dopu, wi no o abi fu du muiti moro fu tron nyun sma. Neleki fa wi e sorgu taki wan nyun krosi fu wi e tan bun, na so wi musu sorgu taki wi no e tron a sma baka di wi ben de fosi. Ibri dei wi musu sori den fasi di a yeye e meki sma kisi. Fu san ede? Fu di o moro wi e meki muiti fu sori den fasi disi, o moro a yeye fu Yehovah o yepi wi. Disi de so fu di Yehovah na wan Gado di e wroko ala ten èn a e gebroiki a yeye fu en fu du dati (Gen. 1:2). Dati meki a prenspari taki wi srefi du wan sani. Fu eksempre, a disipel Yakobus ben skrifi: „Bribi na wan dede sani te wan sma no e du sani fu sori a bribi fu en” (Yak. 2:26). Na so a de tu nanga ala den tra fasi di a yeye fu Gado e meki sma kisi. Ibri leisi te wi e sori den fasi dati, dan dati e sori taki a yeye fu Gado e wroko na ini wi.

17. San wi kan du efu wan leisi wi no sori den fasi di a yeye e meki wi kisi?

¹⁷ Son leisi a kan pasa taki srefi Kresten di dopu furu yari kaba, no e sori den fasi di e yeye fu Gado e meki sma kisi. Ma san prenspari, na taki wi alamala musu tan du muiti fu sori den fasi disi. Luku na agersitori disi: Efu wan krosi di yu lobi priti, dan yu ben o fringi en gowe wantewante? A no de fu taki dati yu ben o suku wan fasi fu nai en tapu baka efu a kan. Èn yu ben o luku bun taki a no priti moro. Na so a de tu taki yu no musu lasi-ati efu a pasa wan leisi taki yu no sori switifasi, taki yu no ben abi pasensi, noso taki yu no sori lobi gi wan trawan. Yu kan aksi a sma pardon so taki unu kan kon bun baka èn yu kan sorgu taki yu no du a sani dati moro.

18. Fu san wi kan de seiker?

¹⁸ Wi breiti srefisrefi taki wi abi na eksempre fu Yesus. O moro wi e denki leki en, o moro a o makelek gi wi fu du leki en. O moro wi e du leki Yesus, o moro wi o man sori nyun fasi. Na ini na artikel disi wi luku fo fasi di a yeye fu Gado e meki sma kisi. A ben o bun fu teki ten fu ondrosuku den tra fasi di a yeye e meki sma kisi èn fu luku efu wi e sori den fasi dati? Yu kan feni difrenti artikel di e taki fu a tori disi na ini Ondrosuku Bijbel moro fini​—Gi Yehovah Kotoigi. Suku a pisi di nen „Kresten fasi fu libi”, èn luku na a pisi di nen „Den fasi fu a yeye”. Yu kan de seiker taki efu yu e du muiti fu kisi nyun fasi èn fu no tron a sma baka di yu ben de fosi, dan Yehovah o yepi yu.