Now na a ten foe faja dienst

„Soema horidoro te na a kaba, en na a wan di sa feni jepi”. — MARKUS 13:13.

1, 2. (a) Sortoe toestand e tjari kon na krin taki wi kon moro krosbé foe a kaba foe na seti foe seni disi? (b) Tapoe sortoe toe fasi joe ben sa kan piki?

SON sma te now ete e degedege dati wi e libi ini a kaba foe a seti foe sani foe noja, awasi a de moeilek foe ferstan foe san-ede den degedege foe dati. A moraal e go na baka. Den ekonomia toestand e kon moro ogri. Na alasé tranga de. Na esi gro kon moro foeroe foe sma e go doro, na vervuiling e kon moro ogri, a radio actief afval e kon moro foeroe, moro nanga moro atoom wapen e kon èn sma sondro bribi e aksi densrefi foeroetron efoe a libi na grontapoe sa go doro.

² Ma a kaba foe a owroe seti foe sani disi no kon ete. A kan de taki son wan foe den kristen di gi densrefi abra kon weri foe doe kownoekondredienst. Efoe a de so taki wan sma no gi en libi abra na Gado ma na wan datum, dan kande a manari poeroe. Ma den sma di gi densrefi abra na Jehovah Gado foe doe alaten en wani èn foe waka a en pasi, tranga moro oiti na fesi èn den nomroe e tan gro.

3. (a) Foe san-ede sma di abi lobi gi regtvaardikifasi e loekoe nanga angri na a kaba foe a owroe seti? (b) San oenoe moesoe doe te na a ten dati?

³ Sma di lobi regtvaardikifasi, e angri foe si taki na owroe seti moesoe kon na en kaba, bikasi wan grontapoe paradijs, na Njoen Ordening foe regtvaardikifasi di a bijbel pramisi sa kon na en presi (Jesaja 9:6, 7; Mattéus 6:9, 10; 2 Petrus 3:13; Openbaring 21:1-4). A no de foe taki dati Jehovah dienstknekti e ferwakti a kenki disi so esi leki Gado wani disi. Ma foe di den ben gi den srefi abra a Gado ini ala ernst, den e wakti nanga pasensi tapoe en ten, aladi den de faja-faja bézig nanga a Kownoekondreprékiwroko di a ben taigi den foe doe. — Mattéus 24:14.

Eksempre nanga jepi foe Gado santa jeje

4. Sortoe moi eksempre man nanga oema foe bribi foe na owroeten ben gi?

⁴ Nowan enkri réde no de gi no wan sma foe hari en srefi poeroe, foe doe moro safrisafri ofoe foe meki den anoe saka. Jehovah Gado nanga Kristus Jezus na wrokoman (Johannes 5:17). Na tapoe foe dati a bijbel tanapoe foeroe nanga tori foe kolokoe man nanga oema di foe bribi di wroko tranga, di de gi oenoe leki eksempre di e gi krakti nanga dek’ati. Tog foeroe foe den getrow man nanga oema ben sabi dati a pramisi di den ben e froewakti, no ben o kontroe na ini den libiten. Famiri-lo ben moesoe psa, ini son geval srefi doesoendoesoen jari, bifo den sani di den ben e froewakti, ben sa psa. Tog noiti den ben e kon slap ini den activiteit. Foeroe foe den ben dini nanga prisiri te den ben kisi wan hé libimarki, den ben de krakti ini bribi, nanga faja ini a gi jesi na Gado nanga wakti nanga pasensi tapoe a kontroe foe en prakseri. Na tapoe foe dati ini den eeuw di psa Gado ben gi en openbaring tapoe progressief fasi. Den man foe bribi foe owroeten soboen ben abi moro pikinso sabi foe na fasi fa Gado ben sa meki den sani di a ben pramisi kontroe, leki a sabi san joe kan abi noja.

5. Sortoe eksempre Abel ben gi?

⁵ Prakseri foe esempre o pikinso bodoi Abel ben abi. A ben sabi soso taki Gado ben pramisi wan „siri” èn taki a „siri” disi ben sa masi na ede foe a sneki na ini wan ten di ben sa kon ete (Genesis 3:15). Tog Jezus ben taki dati Abel ben de ’regtvaardiki’ èn Paulus e kari en leki fosi wan ini a lo foe man foe bribi di e teki fesi (Mattéus 23:35; Hebrewsma 11:4). Joe ben sa abi so wan bribi nanga den pikinso bodoi di ben de foe kisi ini a ten foe Abel?

6, 7. Fa Abraham ben gi oen wan moi eksempre, aladi bepaalde foe den pramisi di Gado ben gi no ben kon troe ini en ten?

⁶ Noach, Abraham, Isaäk nanga Jakob den ala ben e libi bifo Jehovah ben sori en froewondroe makti na ini a ten di Israël ben hari komoto foe Egypte. Den no ben sabi noti foe den sani di ben e aksi respeki èn di ben sa psa te na wet ben sa gi na a bergi Sinaï. Di den ben e libi, srefi a fosi boekoe foe a bijbel no ben skrifi ete.

⁷ Abraham no ben abi na howpoe taki ini en libiten a grontapoe ben sa meki kon boen baka leki wan paradijs. A presi foe dati a ben kisi foe jere taki den bakapikin foe en ben sa njan pina fo hondro jari. Gado pramisi taki ’nanga jepi foe a siri foe Abraham ala naatsi foe grontapoe séker ben sa blesi densrefi’, ben sa kontroe fosi ini wan ten di ben didon fara ini a ten di ben moe kon (Genesis 15:13; 22:18; Galasiasma 3:8). Abraham ben e „froewakti a foto di abi troetroe fundamenti, foe sortoe foto Gado de na bowman nanga a Mekiman” (Hebrewsma 11:10). Dati Abraham no ben sa si na foto disi ini en ten ma pas, baka te a ben opobaka foe dede, no ben meki en bribi kon swaki, so toe no en gi jesi nanga faja ini a dini foe Gado. Oen ben sa kan aksi oensrefi: Mi abi a sortoe foe bribi, foe gi jesi nanga faja di Abraham ben abi?

8. San wi e leri foe Mozes foe pasensi nanga horidoro?

⁸ Mozes ben denki taki a no ben sa man foe doe a wroko di Gado ben taki gi en foe doe. A ben taki dati en tongo no ben loesoe èn a ben abi a denki dati no en pipel no Farao ben sa arki na en (Exodus 4:1, 10; 6:12). Tog Mozes ben e gi jesi. A ben e doe san Jehovah ben taki gi en foe doe èn disi a ben doe wan boen langa ten. Ini a sabana Mozes ben sabi dati a ben sa de ete fotenti jari bifo en pipel ben sa go ini a Pramisi Kondre, èn foe a sondoe di a ben doe bakaten, a ben kisi foe jere dati dan ensrefi no ben sa go na ini a kondre. Tog a ben tan e waka jari go jari kon na tapoe a pasi foe Jehovah (Numeri 14:33, 34; 20:9-12; Deuteronomium 3:23-28; 34:1-6). Joe lobi gi Gado ben sa gi joe dek’ati foe abi sowan pasensi nanga faja ini en dienst? Joe ben sa tjari trawan ini getrawfasi go na wan marki foe san joe ben sabi taki joe noiti no ben sa doro en?

9, 10. Fa Jesaja nanga Jeremia ben sori horidoro sondro foe abi na howpoe foe kisi na ini den libiten na pai di den ben angri fajafaja?

⁹ Di Jehovah ben aksi soema ben sa go taki gi en, Jesaja ben taki: „Djaso mi de! Seni mi” Jesaja 6:8-11). Moro leki fotenti jari a ben dini leki Jehovah proféti. Wan foe den sani di Jesaja tja kon abra ben de Gedo pramisi foe wan „njoen hemel nanga wan njoen grontapoe”, aladi ini en libiten no wan howpoe ben de tapoe wan regtvaardiki njoen seti (Jesaja 65:17-25)). Joe ben sa de net so getraw, soso nomo foe di a kibri foe getrawfasi ben de wan joisti sani èn a ben e akroederi nanga joe dipi lobi gi Gado?

¹⁰ Jeremia Gado gebroiki foe meki warskow bekènti di no ben de popu gi wan pipel di no ben e bribi. A bakapisi foe en préki no ben sa de wan regtvaardiki grontapoe paradijs. A presi foe dati, en lobi foto Jeruzalem ben sa tron ’wan presi di pori èn di de wan sani foe skreki’; a ben pori foe di den libisma drape no ben abi bribi. Jeremia ben sabi taki sani ben sa kon boen baka, ma dati ben sa kon fosi baka te sébitenti jari ben psa — pikinmoro ete wan gemiddelde libismalibiten! (Jeremia 25:8-11; 29:10). Dati Jeremia no ben sa si na kon boen baka, no ben e ori en foe no préki en. Srefi di a ben proeberi foe stop, a wortoe foe Jehovah ben de „leki wan faja di e bron” ini en bonjo. A ben moesoe taki doro èn Jehovah ben de nanga en „leki wan kefarlek maktiwan”. — Jeremia 20:7-11.

Jepi foe horidoro

11, 12. Sortoe dek’ati den eksempre foe bribi foe owroeten moe gi oen leki fa a bijbel e sori?

¹¹ Na apostel Paulus ben tjari kon na fesi sortoe krakti den eksempre disi moesoe abi na wi tapoe. „Foe dat’ede dan, foe di sowan bigi wolkoe foe kotoigi de lontoe oenoe, meki wi poeroe dan ala hebi nanga sondoe [mankeri bribi] di e frekti wi makriki, en waka na strélon di poti na wi fesi nanga horidoro.” — Hebrewsma 12:1.

¹² Paulus ben skrifi ooktoe: „Ala sani di ben skrifi fositen, ben skrifi foe leti oenoe, sodati nanga jepi foe oen ori-doro, èn nanga jepi foe a trowstoe foe den Boekoe oen ben sa abi howpoe. Meki a de so now dati a Gado di e gi ori-doro nanga trowstoe, gi dati mindri makandra na srefi jeje fasi de di Kristus Jezus ben abi sodati ini wanfasi nanga wán mofo oen kan gi grani na a Gado èn Tata foe oen Masra Jezus Kristus” (Romeini 15:4-6). Soboen den eksempre disi foe owroeten moesoe gi oenoe a krakti foe ori-doro, foe doe oen wroko di wi kisi leki prékiman nanga leriman, getraw èn gi Jehovah, a Gado èn Tata foe oen Masra Jezus Kristus, a so fasi grani fajafaja.

13. Sortoe sani wi sabi di den man foe bribi foe owroeten no ben kan kon sabi noiti?

¹³ Denki soso na den sani di e tranga bribi di wi sabi èn di den getrow proféti foe owroeten no ben kan kon sabi. Di den ben e libi no wan sma ben sabi ete soema ben sa de na Messias. Ma wi no sabi soso soema na en; wi sabi ooktoe foe na gebortoe, na leri, na dede èn na opobaka foe Gado Messias, Jezus Kristus. Ooktoe wi sabi foe na loesoepaiman, a Kownoekondre èn a „siri” tapoe san den man dati ben poti den howpoe getraw. Na tapoe foe dati, wi abi ala kristen Griki Boekoe foe Mattéus go miti Openbaring, èn wi abi na okasi foe ferstan na moi boekoe Openbaring, nanga den profétitori foe en di e gi tranga èn di e kontroe ini oenoe ten èn di sa kon troe ete. Séker wi e libi ini wan span èn kritiek ten — wan ten na san den man foe owroeten ben loekoe langa na fesi.

Eksempre foe faja dienst.

14, 15. Foe di a ben de troe taki a Kownoekondre ben de ete ini a ten di ben moe kon, dati ben meki den fosi-eeuw kristensma lasi ati? Poeroe disi kon na krin.

¹⁴ Den fosten bakaman foe Jezus sondro pasensi ben e loekoe na a kon foe a pramisi Kownoekondre. Den ben aksi Jezus: „Masra, joe e opo a kownoekondre foe Israël baka na ini a ten disi?” Na a ten dati den discipel dati no ben e ferstan taki a Kownoekondre ben sa de wan foe hemel. Dati den ben sa ferstan fosi bakaten nanga jepi foe Gado jeje. Ma Jezus ben meki den sabi teki den ben moesoe doe wan bigi wroko. A ben taki dati den ben „[moesoe de en] kotoigi ini Jeruzalem so toe ini heri Judéa nanga Samaria èn te a na a moro farawe kontren foe grontapoe” (Tori foe den Apostel 1:6-8). Na wroko dati no ben sori bigi. Tapoe a pinksterdé ini a jari 33 G.T. sowan 120 discipel ben bigin préki a boen njoensoe ondro a tiri foe na santa jeje. Wan sani foe dri doesoen sma ben teki a wortoe tapoe a dé dati, èn sjatoe ten baka dati na djoe hépriester ben kan taki: ’Loekoe! Joe foeroe Jeruzalem nanga joe leri.’ — Tori foe den Apostel 2:41; 5:28.

¹⁵ So leki fa a e sori dan den sma di ben de na ini a ten dati ini Jeruzalem foe den difrenti pisi foe Europa, Azië nanga Afrika, ben tjari na boen njoensoe go baka nanga den na den égi kondre (Tori foe den Apostel 2:5-11). A no ben teki langa ofoe Paulus ben préki fajafaja ini a heri Romein distrikt Asia èn ini Grikikondre èn a ben e gi jepi na a baw foe a kristen gemeente. A ben hari go moro fara na Rome èn kande srefi na Spanje. Petrus ben rèis go na a tra sé èn a ben go te na Babylon. Baka di den fosi kristensma disi nanga den ipi sma di ben e kisi leri foe den, no ben de dritenti jari bézig ete, Paulus ben kan taki kaba taki a boen njoensoe „ben préki gi ala libisma di de na ondro hemel” (Kolosesma 1:23). Fa den ben e doe foeroe wroko, foe di den ben e gi jesi fajafaja na a gebod foe Jezus foe leri trawan! — Mattéus 28:19, 20; Titus 2:13, 14.

Wan seti foe sani e kon a wan kaba

16. Gi sortoe sani di ben sa psa den fosten kristensma ben e ori wakti gi?

¹⁶ Ma wan bepaalde pisten ben de di ben de foe spesroetoe belang gi den fosi-eeuw kristensma. Jezus ben taki: „Te oen . . . si taki Jeruzalem tapoe lontoe nanga den legrekampoe, sabi dan dati en pori kon krosbé. Meki dan den di de ini Judéa, lon go na den bergi èn meki den di de ini Jeruzalem, hari komoto foe drape, èn meki den na inisé foe den boitipe, no go na inisé foe den; bikasi disi de den dé foe refensi, meki ala sani di skrifi, kan kontroe.” — Lukas 21:20-22.

17, 18. (a) Oten èn fa den fosten kristensma ben gi jesi na den wortoe foe Jezus ini Lukas 21:20-22? (b) Na fesi foe sortoe tra tesi den ben kon tanapoe kande?

¹⁷ Moro dan dritenti jari ben psa. Ne, ini a jari 66 G.T. den Romeini legre ben kon èn ben lontoe Jeruzalem. Nanga na victori na den fesi, den ben bari gwe baka. Nanga prisiri na a prakseri dati den ben wini, meki den djoe ben teki lon baka den Romeini.a Ma san den kristensma ben o doe? Eusébius, di ben e libi na ini a bigin foe na di foe fo jarhondro, ben gi a njoensoe taki „den sma di ben e bribi ini Kristus, ben hari komoto foe Jeruzalem” go na wan foto ini Peréa, san nen Pella.b

¹⁸ A ten ben go doronomo. A jari 66 ben meki presi gi 67. Dan den jari 68 nanga 69 ben kon èn go ooktoe. Den kristensma ben kisi tesi di a ten ben e psa? Sani ben e tan toemsi langa gi sowan? Den ben meki wan misték? Jezus no ben taki o langa den ben moesoe wakti. Ma efoe troetroe sonwan ben drai go baka na Jeruzalem, den ben de foe sari, bika ini a jari 70 den Romeini ben drai kon baka, teki na foto èn kiri foeroe foe den sma di ben e libi drape. Na historia skrifiman, Josephus taki dati 1,1 miljoen sma ben dede, foe di Jeruzalem ben „foeroe srefsrefi nanga sma” èn ipi-ipi sma „foe na heri kondre” ben kon na Jeruzalem foe ori na Pascha fesa.c

19. (a) San de now den troetroe prenspari aksi di kristensma di gi densrefi abra moesoe piki? (b) San moesoe gi oen dek’ati feo teki prati na santa dienst?

¹⁹ Disi e meki joe prakseri na situwasi na ini a ten disi? Na aksi no de: Oten na owroe seti disi sa kaba? Dati sa psa tapoe a ten di Gado poti. San oen moesoe prakseri na san wi e doe. Wi moe aksi oensrefi: Mi studeri na Wortoe foe Gado nanga faja èn mi gi mi libi abra na En sondro kondisi? Mi e libi troetroe ini akroederi nanga a gi di mi gi misrefi abra? A punt di wi doro ini a ten di lon gwe, no moesoe de a réde foe san-ede wi e doe santa dienst. Neleki na ini a tori foe Abel, Abraham, Mozes, Jesaja nanga trawan, lobi gi Jehovah Gado moesoe bewégi oenoe. Wi moesoe dini Jehovah nanga friwani, awasi oten a kaba sa kon. Ma now wi abi wan spesroetoe réde. Wi doro na laatste pisi foe den laatste dé foe na seti foe now (2 Timotéus 3:1). A sani disi moe gi oen dek’ati foe doe dienst pasamarki.

20. Fa den sani di joe ben si pasa kan teki gersi nanga den sani di den fosi kristensma ben si?

²⁰ Den kristensma ben lon komoto foe Jeruzalem foe di den ben si den foeroe sé foe na „marki” foe Jezus kontroe èn den ben si now ooktoe a kontroe foe en ferklari foe den legre di ben sa lontoe a foto. Sensi a jari 1914 di foeroe sani psa di ben seki sma ati, oen ben si na kontroe foe foeroe profétitori foe a ten foe a kaba (Mattéus kapitel 24, 25; Openbaring 6:1-8; 2 Timotéus 3:1-5). Den sani disi di ben taki na ini pofétitori ben bigin psa pikinmoro sébitenti jari pas kaba. Tog Jezus ben taki dati ala den sani disi ben sa psa na ini a libiten foe wán geslagti (Mattéus 24:32-34). A de krin taki oen de fara kaba na ini a libiten foe na geslagti dati!

Faja ini bribi

21. Foe san-ede santa dienst gi Gado de wan tranga fanowdoe sani?

²¹ Wan wroko di e kibri sma libi foeroe tron moesoe doe nanga hasti. Wi e libi ini wan ten di e aksi activiteit pasamarki, tranga dienst, wan moro krakti bribi èn moro bigi faja. Wi moesoe ori ini prakseri taki wan dé sa kon di sa de oen laatste dé na ini a owroe seti disi. Ofoe wi sa tan ini libi te na a kaba foe na seti disi ofoe wi sa dede bifo disi. A libi foe now de sjatoe, a kan koti poeroe. Nowan sma sabi efoe tamara a sa de na libi ete. Wi abi soso wan beperkte ten foe bewijsi oen getrawfasi èn oen reti-atifasi na Gado (Psalm 39:5; Prékiman 12:1; Lukas 12:18-2l). Foe dat’ede a ben sa fiti foe oen aksi oensrefi: Mi de tevréde nanga san mi ben doe tide?

22. San Boekoe e taki foe na paiman?

²² A de prenspari foe no lasi a paiman na ai. Ori joe ai na tapoe a prijs. Jezus ben taki: „Soema o doro te na a kaba na dati sa feni jepi.” Paulus ben skrifi dati ’ibriwan sa kisi en pai na en égi wroko’. Ooktoe a ben taki: „Oen abi oridoro fanowdoe, foe, baka te oen doe a wani foe Gado, kan kisi na kontroe foe na pramisi.” — Markus 13:13; 1 Korintesma 3:9; Hebrewsma 10:36.

23, 24. Sortoe faste bosroiti joe teki tapoe gron foe den bijbeltekst di gebroiki dja ini a tori foe joe bribi èn a doe foe Kownoekondredienst?

²³ Boekoe e fermane oen: „Soboen foe di ala den sani disi sa pori, sortoe sma oen moesoe foe de dan ini santa fasi èn wroko foe wan sma di e dini Gado nanga respeki, froewakti èn ori boen ini prakseri na de-noja foe na dé foe Jehovah.” Moro fara e taki gi oenoe: „Foe taki now foe den ten nanga den pisten, brada, foe dati noti no afoe skrifi gi oen. Bikasi oen sabi heri boen taki a dé foe Jehovah e kon precies leki wan foefoeroeman na neti. . . . No meki wi tan sribi go doro dan, soleki den trawan, ma meki wi tan na ai èn ori oen prakseri na wan.” — 2 Petrus 3:11, 12; 1 Thessalonikasma 5:1-6.

²⁴ Meki wi kibri foe dat’ede wan faste bribi èn tan doe Kownoekondre dienst nanga faja sondro foe degedege a iniwan fasi. Te wi e doe disi, wi kan taki nanga a apostel: „Wi no de foe a sortoe di e hari go nanga baka, san e tjari pori kon, ma foe a sortoe di abi bribi, san e tjari nanga en a ori na libi foe a sili.” — Hebrewsma 10:39.

[Foetoewortoe]

Sani foe prakseri

◻ Sortoe krakti dek’ati wi foe disi ten e kisi foe na eksempre foe Abel, Abraham, Mozes nanga Jeremia?

◻ Foe di a ben de so taki a Kownoekondre no ben kontroe ete, fa disi ben wroko tapoe den fosi-eeuw kristensma?

◻ Baka di den fosten kristensma ben lon komoto foe Jerusalem, sortoe tesi den ben kisi kande?

◻ San moesoe de now a moro prenspari sorgoe foe oenoe?

[Prenki na tapoe bladzijde 8]

Den no ben lasi ati

Abel

David

Jeremia

Abraham

Paulus