Sortu howpu de gi den dedewan?

WAN yongu osofamiri ben e rèy go fu fakansi na a owstusey syoro fu Zuid-Afrika. A ppa nanga mma fu na uma ben e rèy ini wan tra oto leti na den fesi. Wantronso wan banti sutu. Aladi den ben e sreka den srefi fu kenki na banti na sey a pasi, dan wan drungu chauffeur rèy go tapu den tu oto. Na owru man nanga en wefi ben dede wan slag. Na yongu man lasi libi wantu dey a baka. En wefi ben abi broko lebriki èn tra mankeri. En beybi ben kisi mankeri na en edetonton nanga leki bakapisi taki a lan.

Fa disi ben de wan ranpu gi na ongoloku osofamiri disi! Di Carolann, na sisa fu na yongu uma ben yere a nyunsu, a ben kon de leki a babaw fu sari ede. Ranpu so leki disi e kon na ini ala kondre. Famirman nanga mati di e sari tranga nofotron e aksi den srefi: ’Den dedewan trutru dede’ ofu . . .

’Den dedewan e libi?’

Pikinmoro ala fasi fu anbegi e leri taki na sili no e dede. Den bakaman fu den e bribi fu dati-ede taki den sma di e dede no dede trutru, ma e libi ete na ini heymel, vagevuur, ofu hèl. Na ini furu kerki den e leri taki den sma di de na ini na lasti presi di wi kari dya, sa nyan kofarlek pina nanga skin-ati fu têgo. Ma wan Gado fu lobi trutru ben sa poti so wan pina na tapu den sma di a meki?—1 Yohanes 4:8.

Disi no gersi wan sani di de so, ma fa wi kan de seyker? Luku pikinso bun na buweysi fu beybri di e kon. „Yehovah Gado ben go abra fu meki libisma fu na doti fu grontapu èn fu bro na libibro go na ini en noso-olo èn libisma ben tron wan libi sili” (Genesis 2:7). Na ini na fruklari disi di skrifi na ondro krakti fu santa yeye den e taki taki na fosi man, Adam, ben kisi wan sili? Nôno. A ben tron wan sili, wan libi sma. Na apostru Paulus e sori taki disi de so, di a ben skrifi: „Na so fasi buku skrifi tu: ’Na fosi libisma Adam ben tron wan libi sili.’” Paulus ben teki wortu fu Genesis skrifi.—1 Korente sma 15:45, Petrus-Canisiusvertaling.

Na libisma sili kan dede? Na profeyti Esekièl ben skrifi: „Ala sili—na fu mi den de. So leki na sili fu na tta na so a de tu nanga na sili fu na manpikin—na fu mi den de. Na sili di e sondu, en sa dede” (Esekièl 18:4, 20; Preykiman 9:5, 10). A de krin taki efu na sili dede, na sma no e sabi noti moro èn fu dati-ede no kan nyan pina. Na ini en fosi publiki taki baka Penkstri na ini na yari 33 G.T. na apostru Petrus ben fruklari: „Iya, ibri sili di no e arki na Profeyti dati [Yeyses], sa way puru krinkrin fu na mindri fu na pipri.” Na sili e dede fu dati-ede.—Tori fu den Apostru 3:23.

Den dede sma sa kon a libi baka?

Ala sma di e bribi taki na beybri de tru sabi taki Yeyses ben dede èn ben kisi opobaka na a di fu dri dey (Tori fu den Apostru 10:39, 40). Fa disi ben kan psa? Nanga na krakti fu Gado santa yeye.

Na opobaka fu Yeyses ben de wan sani di ben psa wan tron nomo? Nôno. Ini na pisi tori disi Paulus ben skrifi gi na gemeente na ini Korente: „Den ben wiki Krestes opo fu dede, na fosiwan fu den di ben sribi na ini dede. Bika fu di dede kon fu wán libisma, na so tu na opobaka fu den dedewan fu wán libisma . . . Krestes” (1 Korente sma 15:20-22). So bun furu sma den sa opo baka fu dede. Yeyses ben taki so srefi tu: „No fruwondru fu dati, bika na yuru e kon di ala sma di de na ini den memre-grebi, sa yere en sten èn kon na doro, den di du bun sani fu wan opobaka fu libi” (Yohanes 5:28, 29). Disi na wan dyaranti gi na opobaka fu milyunmilyun sma.