A kroetoe foe Jehovah tapoe den falsi leriman
„Na den profeiti foe Jerusalem mi ben si toemoesi takroe sani: a doe foe soetadoe èn a waka ini lei; . . . Den alamala kon tron gi mi leki Sodom, èn den sma di e libi na ini, leki Gomora.” — JEREMIA 23:14.
1. Foe san ede wan sma di abi foe doe nanga a leri foe Gado, e teki wan hebi frantiwortoe na en tapoe?
IBRIWAN sma di abi foe doe nanga a leri foe Gado, e teki wan hebi frantiwortoe na en tapoe. Jakobus 3:1 e warskow: „No foeroe foe oenoe moesoe de leriman, mi brada, foe di wi sabi taki wi sa kisi wan moro hebi kroetoe.” Ija, sma di e leri trawan a Wortoe foe Gado abi wan moro bigi frantiwortoe leki moro foeroe kresten èn den moesoe tjari a frantiwortoe disi na wan fasi di e fiti. San disi sa wani taki gi den sma di e sori taki den na falsi leriman? Meki wi go loekoe a situwâsi ini a ten foe Jeremia. Wi sa si fa a ben prenki na fesi san e pasa ini a ten disi.
2, 3. Sortoe kroetoe Jehovah ben gi nanga jepi foe Jeremia ini a tori foe den falsi leriman foe Jerusalem?
2 Ini 647 bifo Gewoon Teri, a di foe tinadri jari foe a tiri foe kownoe Josia, Jeremia ben poti na wroko leki profeiti foe Jehovah. Jehovah ben abi wan kragi kontrari Juda, èn foe dati ede a ben seni Jeremia foe meki disi bekènti. Ini Gado ai, den falsi profeiti foe Jerusalem noso leriman ben doe „toemoesi takroe sani”. A takroedoe foe den ben de so foeroe, taki Gado ben agersi Jerusalem èn Juda nanga Sodom èn Gomora. Jeremia kapitel 23 e froeteri wi foe disi. Vers 14 e taki:
3 „Na den profeiti foe Jerusalem mi ben si toemoesi takroe sani: a doe foe soetadoe èn a waka ini lei; èn den meki den anoe foe den ogrisma kon tranga, so taki den no sa drai kon baka, ibriwan foe den foe en eigi takroedoe. Den alamala kon tron gi mi leki Sodom, èn den sma di e libi na ini, leki Gomora.”
4. Fa den e agersi a takroe eksempre di den leriman foe Jerusalem ben gi ini a tori foe boen gwenti nanga wet, nanga di foe krestenhèit ini a ten disi?
4 Ija, den profeiti disi noso leriman, densrefi ben gi toemoesi takroe eksempre ini a tori foe boen gwenti nanga wet èn, foe taki en leti, den ben gi a pipel deki-ati foe doe a srefi. Loekoe fa sani de ini krestenhèit ini a ten disi! Den no de leki di foe Jeremia ten? Ini a ten disi, den tiriman foe krestenhèit e meki soetaman nanga tantaman tan leki wan memre foe a groepoe kerki tiriman foe den èn den e meki den teki fesi srefi ini dienst di e hori ini kerki. A de foe froewondroe dan, taki someni memre foe kerki di poti den nen skrifi na ini kerkiboekoe, e libi ini hoeroedoe toe?
5. Foe san ede a fasi fa krestenhèit no de ini akroederi nanga boen gwenti nanga wet, ogri moro leki di foe Sodom nanga Gomora?
5 Jehovah ben agersi den sma di ben libi na ini Jerusalem nanga den di foe Sodom nanga Gomora. Ma a fasi fa krestenhèit de kontrari boen gwenti nanga wet, ogri moro leki di foe Sodom nanga Gomora. Ija, ini Jehovah ai, krestenhèit abi srefi moro fowtoe. Den leriman foe krestenhèit e spotoe nanga den kresten reglementi ini a tori foe boen gwenti nanga wet. Èn disi e meki wan situwâsi kon pe boen gwenti nanga wet e go na baka, èn pe joe abi ala sortoe triki sani foe kori sma foe doe san takroe. A situwâsi disi, di abi foe doe nanga boen gwenti nanga wet, panja ensrefi so na ala sei, taki ini a ten disi sma e si takroedoe leki wan gewoon sani.
„Waka ini lei”
6. San Jeremia ben taki foe a takroedoe foe den profeiti foe Jerusalem?
6 Loekoe now san vers 14 e taki foe den profeiti foe Jerusalem. Den ben „waka ini lei”. Èn a lasti pisi foe vers 15 e taki: „A fadon komoto na bribi, kon foe den profeiti foe Jerusalem go na a heri kondre.” Baka dati vers 16 e taki moro fara: „Disi na san Jehovah foe den legre ben taki: ’No arki den wortoe foe den profeiti di e froeteri oenoe profeititori. Den e meki oenoe tron soso-sani. A fisjoen foe den eigi ati na san den e taki — no di foe a mofo foe Jehovah.’”
7, 8. Foe san ede den tiriman foe krestenhèit de neleki den falsi profeiti foe Jerusalem èn fa disi ben abi krakti na tapoe den sma di e go na kerki?
7 Neleki den falsi profeiti foe Jerusalem, na so den tiriman foe krestenhèit e waka ini lei toe, e panja leri di no de ini akroederi nanga a troe bribi, leri di no de foe feni ini Gado Wortoe. San na wan toe foe den falsi leri disi? A leri taki a sili no man dede, a Dri-wánfasi, a vagevuur, nanga wan hèlfaja foe pina sma foe têgo. Den e tigri den jesi toe foe den arkiman foe den, foe di den e preiki san sma lobi foe jere. Ibritron baka den e taki dati no wan rampoe e wakti krestenhèit, bika a abi a vrede foe Gado. Ma den tiriman foe krestenhèit e taki „a fisjoen foe den eigi ati”. A de wan lei. Den sma di e bribi den sortoe lei disi, e njan vergif na jeje fasi. Den e kori den foe den kisi pori!
8 Go prakseri san Jehovah e taki foe den falsi leriman disi ini vers 21: „Mi no ben seni den profeiti go, ma tokoe densrefi ben lon. Mi no ben taki nanga den, ma tokoe densrefi ben froeteri profeititori.” Na so a de ini a ten disi, taki Gado no ben seni den tiriman foe krestenhèit go, èn den no e leri sma den waarheid foe en toe. San na a bakapisi foe disi? A de wan sani di e gi foe skreki taki wan heri ipi sma di e go na kerki no sabi noti foe bijbel, bika den leriman foe den e foeroe den ede nanga den grontapoe filosofie.
9, 10. (a) Sortoe dren den falsi leriman foe Jerusalem ben abi? (b) Fa den tiriman foe krestenhèit ben leri sma „falsi dren” na a srefi fasi?
9 Moro fara, den tiriman foe krestenhèit ini a ten disi e meki falsi howpoe bekènti. Loekoe vers 25: „Mi ben jere san den profeiti ben taki di e froeteri lei ini mi eigi nen, taki: ’Mi ben abi wan dren! Mi ben abi wan dren!’” Sortoe dren na den dren dati? Vers 32 e froeteri wi: „’Dja mi de kontrari den profeiti foe falsi dren’, na so Jehovah e taki, ’di e froeteri den èn e meki taki a pipel foe mi e wakawaka lontoe foe den lei foe den ede èn bika den e skepi. Ma misrefi no ben seni den go noso gi den komando. Foe dati ede, den no sa de wan wini gi a pipel disi kwetikweti’, na so Jehovah e taki.”
10 San na den falsi dren noso howpoe, di den tiriman foe krestenhèit ben leri sma? We, taki a wan-enkri howpoe gi libisma foe kisi vrede nanga seikerfasi ini a ten disi na den Verenigde Nâsi. Ini den jari di no pasa so langa, den ben kari den VN „a lasti howpoe gi wánfasi nanga vrede”, „a moro hei presi foe taki makandra foe vrede nanga gerègtighèit”, „a moro prenspari howpoe tapoe vrede na grontapoe foe wan pisi ten”. Fa dati na wan falsi prakseri! A wan-enkri howpoe gi a libisma famiri na a Kownoekondre foe Gado. Ma den tiriman foe krestenhèit no e preiki èn e leri sma a waarheid foe a hemel tiri dati, di ben de a moro prenspari sani di Jesus ben preiki.
11. (a) Sortoe takroe krakti den falsi leriman foe Jerusalem ben abi tapoe a nen foe Gado? (b) San den falsi leriman foe den difrenti fasi foe anbegi ini a ten disi ben doe ini a tori foe Gado eigi nen, tra fasi leki a Jeremia-groepoe?
11 Vers 27 e froeteri wi moro. „Den abi na prakseri foe meki mi pipel frigiti mi nen nanga jepi foe den dren foe den, di den e tan froeteri makandra, neleki fa den papa foe den ben frigiti mi nen foe Ba-al ede.” Den falsi profeiti foe Jerusalem ben meki a pipel frigiti Gado nen. Den falsi leriman foe den difrenti fasi foe anbegi ini a ten disi no ben doe a srefi sani? Moro ogri ete, den e kibri Gado nen, Jehovah, gi sma. Den e leri taki a no de fanowdoe foe gebroiki en èn den e poeroe en foe den bijbel vertaling foe den. Nanga faja den e gens ibriwan sma di e leri sma taki a nen foe Gado, na Jehovah. Ma a Jeremia-groepoe, a fikapisi foe den kresten di salfoe nanga santa jeje, makandra nanga den kompe foe den, ben doe neleki fa Jesus ben doe. Den ben leri miljoenmiljoen sma foe Gado nen. — Johanes 17:6.
Tjari a fowtoefasi foe den kon na krin
12. (a) Foe san ede wan bigi broedoe-paiman de na tapoe den falsi leriman foe den difrenti fasi foe anbegi? (b) San ben de a prati di den tiriman foe krestenhèit ben abi ini den toe grontapoe orlokoe?
12 Ibritron baka a Jeremia-groepoe ben tjari kon na krin, taki den tiriman foe krestenhèit na falsi leriman di e tjari den ipi foe den go na a bradi pasi foe den kisi pori. Ija, a fikapisi ben taki krin foe san ede a fiti taki den dren-man disi kisi a takroe kroetoe foe Jehovah. Foe eksempre, nofotron den foetoeboi foe Jehovah ben taki foe Openbaring 18:24, di e taki dati ini Babilon a Bigiwan den ben feni a broedoe foe „ala den sma di den ben kiri na grontapoe”. Go prakseri foe ala den orlokoe di den ben feti foe kesekese na mindri kerki groepoe ede. Fa a broedoe-paiman bigi, di de na tapoe den falsi leriman foe den difrenti fasi foe anbegi! Den leri foe den ben meki pratifasi kon èn ben meki a si di sma foe difrenti bribi nanga nationaal groepoe no wani si makandra na ai, kon moro bigi. Foe a Fosi Grontapoe Orlokoe a boekoe Preachers Present Arms e taki: „Den tiriman foe krestenhèit ben meki orlokoe wani taki wan faja sani na jeje fasi èn den ben gi na orlokoe krakti toe foe kon moro faja. . . . Na so fasi kerki ben kon tron wan prenspari pisi foe a wrokosani foe orlokoe.” So a ben de toe ini Grontapoe Orlokoe di foe Toe. Nanga den heri ati den tiriman foe krestenhèit ben horibaka gi kondre di ben de ini orlokoe èn ben blesi den legre foe den. Toe grontapoe orlokoe ben bigin ini krestenhèit, pe kompe kerkisma ben kiri makandra. Te na ini a ten disi, grontapoe nanga kerki groepoe na ini krestenhèit e go doro foe trowe broedoe meki a lasi gowe. Fa den falsi leri foe den ben abi toemoesi takroe bakapisi!
13. Fa Jeremia 23:22 e boeweisi taki den tiriman foe krestenhèit no abi wan matifasi nanga Jehovah?
13 Grantangi, loekoe Jeremia kapitel 23, vers 22: „Efoe den ben tanapoe ini mi groepoe foe krosibei mati, dan den ben sa meki a pipel foe mi jere mi eigi wortoe èn den ben sa meki den drai kon baka foe a takroe pasi foe den èn foe den takroedoe foe den.” Efoe den profeiti foe den difrenti fasi foe anbegi foe krestenhèit ben tanapoe ini Jehovah en groepoe foe krosibei mati, èn ben abi wan krosibei matifasi nanga en leki wan getrow èn koni foetoeboi, dan den ben sa libi ini akroederi nanga den markitiki foe Gado toe. Den toe ben sa meki den sma foe krestenhèit jere Gado eigi wortoe. Na presi foe dati, den disiten falsi leriman ben meki den bakaman foe den kon tron breni foetoeboi foe Gado Feanti, Satan Didibri.
14. Sortoe krakti sani, di ben tjari den tiriman foe krestenhèit kon na krin, den ben tjari kon na doro ini 1958?
14 Na wan krakti fasi a Jeremia-groepoe tjari a waarheid kon na krin ini a tori foe den tiriman foe krestenhèit. Foe eksempre, na a „Wani foe Gado”-Internationaal kongres foe Jehovah Kotoigi ini 1958, ini New York City, na ondro-presidenti foe a Waktitoren Genootschap ben pristeri wan froeklari di foe wan pisi ben taki: „Sondro hoigrifasi noso sondro foe degedege, wi e meki bekènti taki a moro prenspari reide disi foe ala ogridoe, a pasa di sma e pasa wet, a si di sma no wani si trawan na ai, a feti di sma e feti, a kroetoe di sma e kroetoe sani na fesi sondro foe ondrosoekoe a tori, . . . èn a bigi broeja, na fowtoe fasi foe anbegi, falsi fasi foe anbegi; di abi na en baka wan feanti di sma no man si, Satan Didibri. Den man di abi a moro bigi frantiwortoe foe a fasi fa grontapoe de, na den leriman nanga fesiman foe den difrenti fasi foe anbegi; èn den sma di abi a moro bigi fowtoe foe den disi, na den tiriman foe krestenhèit. . . . Baka ala den jari disi foe sensi a Fosi Grontapoe Orlokoe, krestenhèit ben abi a srefi matifasi nanga Gado leki di foe Israèl ini a ten foe Jeremia. Ija, wan pori e wakti krestenhèit, wan pori di e gi moro frede èn di takroe moro leki a wan di Jeremia ben si e pasa nanga Jerusalem.”
A kroetoe di den falsi leriman e kisi
15. Sortoe profeititori foe vrede den tiriman foe krestenhèit ben meki? Den sa kon troe?
15 Ala di a warskow disi ben gi, fa den tiriman foe krestenhèit ben handri sensi a ten dati? Neleki fa vers 17 e taki: „Ibritron baka den e taigi denwan di no e lespeki mi: ’Jehovah ben taki: „Vrede na san oenoe sa kisi.”’ Èn gi ibri sma di e waka ini a tranga-edefasi foe en ati den ben taki: ’No wan rampoe sa kon tapoe oenoe.’” Disi troe? Nôno! Jehovah sa tjari a lei foe den profeititori disi foe den tiriman foe krestenhèit kon na krin. A no sa meki kon troe san den e taki na ini en nen. Ma a falsi djaranti foe vrede nanga Gado di den tiriman foe krestenhèit e gi, de wan sani di e kori sma srefisrefi!
16. (a) San na a situwâsi foe a grontapoe disi ini a tori foe boen gwenti nanga wet, èn soema de frantiwortoe toe foe disi? (b) San a Jeremia-groepoe e doe ini a tori foe den takroe fasi fa a grontapoe disi e si sani di abi foe doe nanga boen gwenti nanga wet?
16 Joe e denki: ’San, den falsi leri foe den tiriman foe krestenhèit kan kori mi? Noiti!’ We, no de so seiker foe dati! Memre taki den falsi leri foe den tiriman foe krestenhèit ben horibaka gi wan toemoesi takroe èn triki situwâsi ini a tori foe boen gwenti nanga wet. Den leri foe den, di e gi pasi foe sma doe ala san den wani, e feni pikinmoro ala sani boen, awansi fa den de kontrari boen gwenti nanga wet. Èn a situwâsi disi ini a tori foe boen gwenti nanga wet di e go na baka dei foe dei, de foe feni na ini ala sortoe ontspanning, kino, TV, tijdschrift nanga pokoe. Foe dati ede wi moesoe loekoe boen srefisrefi, taki a situwâsi disi no abi krakti na tapoe wi, ini a tori foe boen gwenti nanga wet di e go na baka dei foe dei, ma di e hari sma na wan trikifasi. Jongoewan kan kon ini a trapoe foe takroe video nanga pokoe. Memre taki a fasi disi di sma ini a ten disi abi foe gi pasi foe sma doe ala san den wani, na wan bakapisi di e kon langalanga foe den falsi leri foe den tiriman foe krestenhèit èn a misi di den e misi foe hori den regtfardiki markitiki foe Gado hei. A Jeremia-groepoe e feti nanga den fasi disi foe si sani di no de ini akroederi nanga boen gwenti nanga wet èn a e jepi den foetoeboi foe Jehovah foe weigri foe teki a takroedoe di de pasa marki ini krestenhèit.
17. (a) Sortoe kroetoe ben de foe kon na tapoe na ogri Jerusalem, so leki fa Jeremia skrifi? (b) San sa pasa heri esi nanga krestenhèit?
17 Sortoe kroetoe den falsi leriman foe krestenhèit sa kisi foe Jehovah, a bigi Kroetoeman? Vers 19, 20, 39 nanga 40 e piki: „Loekoe! A tranga winti foe Jehovah, soso atibron, sa saka kon foe troe, ija, wan bigi draiwinti. Na tapoe na ede foe den ogrisma a sa wai kon srefi. Na atibron foe Jehovah no sa drai gowe baka, te leki a sa doe san a moesoe doe èn te leki a sa meki den prakseri foe en ati kon troe. . . . Foe ala ten mi wani gi oenoe abra na a frigiti di mi sa frigiti oenoe, èn mi wani libi oenoe nanga a foto di mi ben gi oenoe nanga oen fositen tata — komoto na mi fesi. Èn mi wani poti sjen na oen tapoe te ten di no abi marki èn lagi oenoe te ten di no abi marki, di sma no sa frigiti.” Ala den sani dati ben pasa nanga na ogri Jerusalem èn nanga a tempel foe en, èn now wan srefi sortoe rampoe sa kon heri esi tapoe na ogri krestenhèit!
Meki „a hebi foe Jehovah” bekènti
18, 19. Sortoe „hebi foe Jehovah” Jeremia ben meki bekènti gi Juda, èn san den ben wani taki?
18 So boen, san na a frantiwortoe foe a Jeremia-groepoe nanga den kompe foe en? Vers 33 e froeteri wi: „Te a pipel disi noso a profeiti noso a priester e aksi joe, èn e taki: ’San na a hebi foe Jehovah?’, dan joe moesoe taigi den: ’„Oen pipel de — o fa a de wan hebi! Èn mi sa libi oenoe foe troe”, na so Jehovah e taki.’”
19 A Hebrew wortoe gi „hebi” wani taki toe sani. A kan sori tapoe wan prenspari sani di Gado e meki bekènti noso tapoe wan sani di de wan hebi gi wan sma èn di e weri en skin. Dja den wortoe „hebi foe Jehovah” e sori tapoe wan prenspari profeititori — a meki di a e meki bekènti taki a ben kroetoe Jerusalem foe kisi pori. A pipel ben lobi foe jere den sortoe hebi profeiti wortoe disi foe Jehovah di Jeremia ben taki ibritron baka? Nôno, a pipel ben spotoe nanga Jeremia: ’Sortoe profeititori (hebi) joe abi now? Wi de seiker taki a profeititori foe joe sa de wan tra hebi di e weri sma skin!’ Ma san Jehovah ben taigi den? Disi: „Oen pipel de — o fa a de wan hebi! Èn foe troe mi sa libi oenoe.” Ija, den sma disi ben de wan hebi gi Jehovah, èn a ben de foe poeroe den foe den no de wan hebi moro gi en.
20. San na „a hebi foe Jehovah” ini a ten disi?
20 San na „a hebi foe Jehovah” ini a ten disi? A de a prenspari profeiti boskopoe foe Gado Wortoe. A lai nanga kroetoe, èn a e meki a pori foe krestenhèit bekènti di den sa kisi heri esi. Wi, leki a pipel foe Jehovah, abi a hebi frantiwortoe foe meki a „hebi [disi] foe Jehovah” bekènti. Ala di a kaba e kon krosibei moro nanga moro, wi moesoe froeteri ala sma taki a trangajesi pipel foe krestenhèit de wan „hebi”, ija, „o fa a de wan hebi!” gi Jehovah Gado, èn taki heri esi a sa poeroe a „hebi” disi na en tapoe, foe di a sa gi krestenhèit abra na rampoe.
21. (a) Foe san ede Jerusalem ben kisi pori ini 607 bifo Gewoon Teri? (b) San ben pasa nanga den falsi profeiti èn nanga a troe profeiti foe Jehovah, baka di Jerusalem kisi pori èn sortoe djaranti a e gi wi ini a ten disi?
21 Ini a ten foe Jeremia a kroetoe foe Jehovah ben tjari kon, di den Babilonsma ben pori Jerusalem ini 607 bifo Gewoon Teri. So leki fa a ben froeteri na fesi, dan dati ben de wan ’sjen èn lagi sani’ gi den tranga-ede Israèlsma, di no ben de getrow (Jeremia 23:39, 40). A ben sori den taki, foe di ibritron baka den no ben gi Jehovah grani, te foe kaba a ben libi den nanga den takroe bakapisi foe a takroedoe foe den. Te foe kaba a mofo ben tapoe foe den falsi profeiti di ben abi heimemrefasi. Ma tokoe, a mofo foe Jeremia ben tan froeteri profeititori. Jehovah no ben libi en. Neleki fa a de nanga na a eksempre disi, na so Jehovah no sa libi a Jeremia-groepoe, te a hebi bosroiti foe en sa abi leki bakapisi taki den sa kwinsi a libi poeroe foe den tiriman foe krestenhèit nanga denwan di e bribi den lei foe den.
22. Fa a kroetoe foe Jehovah sa meki krestenhèit kon tron?
22 Ija, a fasi fa Jerusalem ben kon de baka 607 bifo Gewoon Teri, foe di a ben kisi pori èn sma no ben libi drape, de a srefi fasi fa a krestenhèit foe den difrenti fasi foe anbegi sa kon tan, baka te den poeroe ala goedoe foe en èn den tjari en kon na krin na wan sjenfasi. Disi na a kroetoe di Jehovah ben leisi gi den falsi leriman, ala di a fiti foe den kisi a kroetoe disi. A kroetoe dati no sa misi. Neleki fa ala den warskow boskopoe di Jeremia ben gi ondro krakti foe santa jeje, ben kon troe ini a ten di pasa, na so den sa kisi a disiten kontroe foe den. Foe dati ede, meki wi de leki Jeremia. Meki wi meki a profeiti hebi foe Jehovah bekènti na sma, sondro foe frede, so taki den sa kon sabi foe san ede ala a hebi foe a regtfardiki kroetoe foe en e kon tapoe ala den falsi leriman foe den difrenti fasi foe anbegi!
Aksi foe loekoe sani sjatoe baka
◻ O takroe Jerusalem foe owroeten ben de ini Jehovah ai?
◻ Na sortoe fasi krestenhèit ben ’waka ini lei’?
◻ Fa a fowtoefasi foe den disiten tiriman foe krestenhèit ben tjari kon na krin?
◻ Sortoe „hebi foe Jehovah” den e meki bekènti now?
[Prenki na tapoe bladzijde 8]
Den profeiti foe Jerusalem ben doe „toemoesi takroe sani”
[Prenki na tapoe bladzijde 9]
„A fisjoen foe den eigi ati na san den e taki”
[Prenki na tapoe bladzijde 10]
Jerusalem, baka di a kisi pori, e sori san sa pasa te foe kaba nanga krestenhèit