Taki Nanga Ala Sma Di Wani Arki
1 ¡Ete wan sma di no de na oso! ¿Yu yere a sani disi kaba? Wan kringopziener ben taki dati a ben wroko na ini wan gebied na ini New York State pe 75 procent fu den sma no ben de na oso. Kande a gebied fu yu de a srefi.
2 Fa wi kan doro den sma disi? A de wan yepi fu go baka na den, ma moro furu a de den srefi sma di no de na oso. Wan tra sani de fanowdu. Informeel kotoigi? ¡Iya! Na ondrofenitori di e kon now e sori o bun a e wroko.
3 Wan trowpaar ben stòp na wan supermarket. A sisa ben bigin taki fu a nyun grontapu nanga a sraktiman, èn a ben piki heri bun na tapu disi. A ben aksi ensrefi fa so wan sani ben sa man pasa. A masra fu a sisa ben kon na ini a takimakandra èn a ben gi leki idea fu den go doro nanga a takimakandra na a oso fu a sraktiman. A sraktiman ben agri, èn a ben kari den fu kon na en oso a srefi neti dati. A trowpaar ben taki fu wán penti nomo nanga a man èn a wefi fu en, èn dati ben de a prakseri di Gado abi nanga grontapu. Disi ben naki na ati fu den so kefalek, dati a tra dei a sraktiman nanga en wefi ben go na a Kownukondre zaal. Now den teki dopu, èn den e gi informeel kotoigi na furu fu den famiriman fu den. ¿A gi fu informeel kotoigi ben kan yepi yu fu doro moro sma?
4 Te yu e gi informeel kotoigi na sma di yu no sabi, dan a rai di e kon now kan de wan yepi gi yu. Abi switifasi, sori waran firi, èn prèise a sma èn de seiker taki den kan si a switifasi disi na tapu yu fesi tu. Taki fu wan tori di den sma na ini a libimakandra abi belangstelling gi dati. Kande yu wani pristeri wan tu publikâsi di e taki fu a tori dati, noso kande yu wani leisi wan tu tekst di abi fu du nanga a tori. Efu den sma e sori belangstelling, dan yu kan aksi den efu yu kan go doro nanga a takimakandra na a oso fu den. Efu den no wani dati, dan taigi den dati yu e howpu taki sani sa waka bun nanga den èn dati yu ben lobi fu taki nanga den.
5 Teki a fosi stap. Prati a boskopu di wi abi èn di kan kibri e gi libi nanga someni sma leki yu kan. Te ala ten yu abi wan tu traktaat na yu, dan disi sa gi yu deki-ati fu suku okasi fu gi informeel kotoigi.
6 Moro furu a e tjari bun bakapisi kon te yu e gi kotoigi na sma di yu sabi soleki birtisma, famiriman, kompe-wrokoman, èn so moro fara. A no de fu taki, dati a bun fasi fa yu e tjari yusrefi, e gi wan kotoigi kaba. Fu di yu sabi kaba gi sortu sani den abi belangstelling, dan gebroiki dati leki a thema fu yu takimakandra.
7 Wan tu sani fu denki fu dati: Hori sma na prakseri. A no de wan koni sani fu taki nanga wan sma te trawan e wakti en. Memre taki yu no kan gi kotoigi na sma na ini a ten di yu musu wroko gi yu basi. A ben sa moro bun fu taki fu wán makriki penti nomo di a sma kan memre èn di a kan denki fu en te a doro oso. Meki muiti fu abi publikâsi na yu. Oefen nanga yu osofamiri fa yu o bigin taki nanga sma.
8 Wi alamala lobi sma èn wi wani yepi den (2 Kor. 1:3, 4) ¿Yu sa meki muiti fu doro moro sma fu di yu e gi informeel kotoigi? ¡Yu musu du dati seiker!