Na gewoon pionierdienst — Joe kan bigin nanga dati ini september
1 Ini september na njoen dienstjari 1988 e bigin. A sa de ooktoe na fosi moen na ini san foeroe sma sa bigin nanga na gewone pionier-wroko. Faja de nanga joe? Joe kan bigin ini september nanga na gewone pionierdienst?
2 Foeroe ben de ini na jepipionierdienst ini na dienstjari 1987. Soleki wi ben taki na ini wi Kownoekondredienst foe juli, dan na jepipionierdienst ben sa kan de heri boen wan djompo-planga na a gewone pionierdienst. Efoe dati de na ini joe geval, foe san-ede joe no sa bigin na ini september? Aladi a de boen foe sreka joesrefi nofo a fesi, dan tokoe ete wan balansi loekoe de fanowdoe sodati na prenspari persoonlek marki disi no grati komoto foe joe anoe. Nanga leti na bijbel e gi na fermane: „No doe joe wroko safri-safri. De faja foe jeje. Dini Jehovah leki srafoe.” — Romeini 12:11.
3 Bifo joe meki den skrifi joe nen leki gewone pionier, dan joe moe waka baka Jezus fermane ’foe go sidon fosi foe bereken den kostoe’ (Luk. 14:28). Sani leki gesontoe, osofamiri ferplekti, libimarki èn gemeentefrantwortoe wi moe loekoe toe. Ma joe ben loekoe kaba den omstandigheden foe joe èn ben kon na a bosroiti dati nanga wantoe kenki joe kan go ini na gewone pionierdienst, dan joe no moe hori joesrefi a baka.
FERTROW INI JEHOVAH MAKTI
4 Te joe loekoe den persoonlek omstandigheden foe joe dan no kon na a bosroiti dati ibri moeilijkheid èn situatie di no boen ofoe osofamiri ferplekti sa tapoe joe foe de wan pionier di e doe en boen. Kande joe sabi gewone pionier di aladi den owroe, no de gesontoe èn abi difrenti persoonlek frantwortoe nanga osofamiri ferplekti tokoe de ini na foeroeten dienst. Den sortoe sani disi joe kan loekoe tapoe a gron foe a sma srefi ini na fertrow dorodoro dati wi kan kisi „krakti di e psa san de normaal” te wi no e fertrow tapoe wi égi krakti ma moro foeroe tapoe Jehovah. — 2 Korinte 4:7.
5 Na Genootschap e kisi kaba aksi foe sma di wani bigin ini september nanga na gewone pionierdienst. Wi e ferwakti dati foeroe sma bifo a kaba foe augustus sa seni wan formulier foe aksi foe de gewone pionier. Foe ala disi e kon a krin dati Jehovah krakti e wroko. Nanga meki plan na ini begi èn fertrow ini Jehovah sondro wan kondisi meki foeroe sma kan tjari den fanowdoe kenki kon èn kan poti densrefi ini na bigin foe na dienstjari foe 1988 ini a groepoe foe den gewone pionier. Joe sa de wan foe den?
6 A mindri foe den blesi gi den sma di e tron gewone pionier, a prisiri de foe abi wan prati leki foeroeten wrokoman na a prékiwroko èn foe kan jepi njoen sma ini na veld. Den sma di kan bigin ini september nanga na pionierwroko, kan abi ooktoe na ferwakti foe kan fisiti ini 1988 na pionierskoro. O troe na odo de: „na blesi foe Jehovah na dati e meki wan sma kon goedoe, èn a no e poti no wan sari a tapoe”! — Odo 10:22.