Abi pasensi èn de dorodoro ini a diniwroko
1 Na apostel Paulus ben tan hori wan tranga firi foe frantiwortoe na fesi foe Jehovah foe de nanga pasensi èn finifini te a e preiki na boen njoensoe gi ala sma di ben wani foe arki. Foeroe nanga overtoigi a ben taigi den opziener foe Efeise di ben kon a wan: „Mi no e si mi sili leki wan warti sani, neleki a ben sa de diri gi mi, efoe mi ben mag kaba na pasi foe mi di mi ben kisi foe Jesus foe gi kotoigi dorodoro foe a boen njoensoe foe na no froedini boenfasi foe Gado” (Tori 20:24). Wi de sabisabi foe a tranga fanowdoe di ben poti na wi tapoe foe doe a srefi?—1 Kor. 9:16.
INI KONTREN PE DEN E WROKO FOEROE
2 Pasensi de spesroetoe tranga fanowdoe te den e wroko pikinmoro foeroe tron ini a kontren foe wi. Awasi a kontren foe wi skotoe, wi inisei moesoe boeweigi wi foe go naki na sma doro ala joeroe. Doe moeiti foe miti foe ala oso ala sma di e libi drape, èn jepi opregti sma na wan progressief fasi foe kon kisi moro warderi gi na howpoe foe Gado kownoekondre di abi bijbel leki gron.
3 Efoe wi e wroko foeroe tron ini a kontren foe wi, dan pasensi foe wi sei sa abi leki wini taki wi kan leri sabi den ososma persoonlijk. Disi sa meki den firi densrefi moro switi te den e opo a doro. Na ini a Taki-go-taki-kon boekoe, toemoesi moi rai de di wi kan gebroiki foe wi kan tjari kenki kon ini wi inleiding ini kontren pe wi e wroko foeroe.—Loekoe Taki-go-taki-kon, blz. 9-15.
4 A kan pasa taki wi e kon na sma di e sori pikinso belangstelling, ma di no wani teki boekoe foe wi. Fa wi moesoe doe dan? A moeiti foe wi foe de dorodoro sa boeweigi wi foe wi hori doro foe kweki na belangstelling. Te wi e sorgoe moro fara gi na sani di prani na ini den ati, dan kande te foe kaba dati sa boeweigi den foe teki wan bijbelstudie. Wan brada ben kon feifi wiki baka makandra na a doro foe wan sma di ben sori belangstelling sondro foe ben libi boekoe na baka. Na a di foe siksi tron a ososma ben teki boekoe, èn te foe kaba den ben bigin wan bijbelstudie.
PRISTERI DEN BROCHURE
5 Ini augustus nanga september wi Tori foe takimakandra sa de: „Wan njoen grontapoe—Nanga jepi foe soema?” Na tori disi de makriki nofo foe wi kan tjari kenki na ini en te wi e pristeri den brochure di e kon now: Njanboen foe têgo foe a libi na grontapoe!, „Loekoe! Mi e meki ala sani kon njoen”, Joe moesoe poti bribi na ini a Driwanfasi?, Na nen foe Gado di sa tan foe têgo èn Na tiri di sa tjari na Paradijs kon. Efoe wi teki ten foe kon sabi den brochure disi, wi sa feni wan toe penti foe takimakandra di e fiti foe wi kan gebroiki makandra nanga a Tori foe takimakandra.
6 Foe eksempel wi ben sa kan kari wi nen èn dan wi kan taki: „Fa joe e prakseri foe a pramisi foe libisma, foe tjari vrede kon na a grontapoe? [Gi pasi foe piki.] Loekoe pikinso san bijbel abi foe taki foe na aksi efoe libisma man foe doe dati. [Leisi Jeremia 10:23.] Ini den jarihondro di pasa libisma boeweisi taki, te joe loekoe en boen, a no man foe tiri ensrefi. Ma loekoe pikinso san na a froetrow pramisi foe Gado. [Leisi 2 Petrus 3:13.] So boen Gado en pramisi foe wan njoen grontapoe di no kan misi, sa kon troe.” Moro fara wi ben sa kan gi a ososma deki-ati foe leisi wan foe den brochure. Efoe wi e meki gebroiki foe a Loekoe!-brochure, wi ben sa kan poti na prakseri foe na ososma tapoe san tanapoe na ini paragraaf 58 na bladzijde 30. Te wi e pristeri na Tiri-brochure, wi ben sa kan tjari kon a fesi san den e taki na ini a fosi paragraaf na bladzijde 3. Na prenki na fesisei foe a Libi na grontapoe-brochure, de toemoesi moi èn a e fiti boen na a Tori foe takimakandra. Joe ben sa kan gebroiki so srefi na di foe dri paragraaf na bladzijde 31 foe na Nen foe Gado-brochure.
7 Te wi wroko wi kontren nanga pasensi èn dorodoro, dan disi sa tjari froeloesoe kon gi den wan di e arki wi (1 Tim. 4:16). Na ten e doro en kaba! Meki foe dati-ede wi sori pasensi èn gi dorodoro kotoigi, ala di wi abi wan dorodoro prati na a preiki foe a boskopoe disi foe froeloesoe.