Joe sa gi okasi preiki ini den moen di e kon?
1 Ini wi normaal libipatron wi abi fasti ten te wi e taki foe Jehovah nanga sma. Wi e poti ten na wan sei foe gi kotoigi, di wi ben sreka a fesi, oso-foe-oso, a tjari foe gobaka nanga a hori foe bijbelstudie. Ma foeroe tra okasi, di wi no sreka toemoesi boen gi den, de so toe pe wi kan taki nanga sma foe a waarheid. A sortoe fasi disi foe preiki wi e kari okasi preiki.
2 Sonwan foe den preikiman e feni foeroe okasi foe abi prati na a pisi disi foe a dienst. Wi ala kan proeberi foe feni den sortoe okasi disi, te wi e rèis go na noso te wi e komoto foe kongres, e go nanga fakansi noso e go foe fisiti famirimemre. Joe sa graboe den okasi disi dan foe gi okasi preiki?
3 Meki plan na fesi: Sreka a fesi nanga meki plan sa meki oen man foe gi okasi preiki. Foe a sei foe a tori disi wi abi ala sortoe boekoe di e jepi wi foe doro a marki disi. Na sei foe A Waktitoren èn Ontwaakt! wi abi difrenti traktaat nanga titel di e poti sma na prakseri broki foe wiki a belangstelling. Brochure de di e naki na ati foe sma foe difrenti bakagron. Sortoe boekoe joe lobi foe gebroiki? Poti leki osofamiri prakseri na a tori disi. Oefen baka dati san joe sa taki te oenoe kisi wan boen okasi foe doe dati.
4 Te joe de nanga fakansi: Wan toemoesi moi ten te joe kan gi okasi preiki na te joe de nanga fakansi. Joe abi a plan foe rèis nanga opolani, trèin noso bus? Teki nanga joe dan wan bijbel nanga wan foe den boekoe di kari na tapoesei. Foe di joe e leisi den sortoe lektuur disi ini den poebliki vervoer, dan so foeroe tron joe e taki wan sani foe kisi wan sma so fara foe bigin wan takimakandra. Efoe joe de nanga oto, prakseri san joe ben sa kan taki dan te joe stop na wan oli station noso wan restaurant. Foe den sortoe okasi disi joe ben sa kan abi wan toe traktaat na joe foe gi sma di abi belangstellling.
5 Na a distriktkongres: So srefi na a distriktkongres wi kan feni okasi foe gi okasi preiki. Foeroe ben abi wini foe di den ben taki nanga sma tapoe strati noso na bushalte. Sorgoe taki na a ten foe a kongres joe weri wan lapelkarta. Kande joe e kon leki klanti ini restaurant, na ini birti nanga wenkri, èn kande den sma wani sabi san na a lapelkarta di joe weri. Disi kan opo a okasi foe gi wan boen kotoigi.
6 Den moen di e kon kan meki wi kisi kowroe ati èn gi wi ontspanning, ma no meki den okasi pasa di wi abi foe gi okasi preiki. A fasi disi foe preiki e gi boen pai, èn Jehovah dienstknekti moesoe abi prati na disi. Meki a lobi di wi abi gi wi birti sma boeweigi wi foe taki fri na ibri boen okasi neleki Jesus! — Mat. 5:14-16.