A spesroetoe Kownoekondre njoensoe gi ala sma
1 Tapoe 24 april, wi ben bigin foe prati a spesroetoe Kownoekondre njoensoe (traktaat) na ala sei, di wiki a belangstelling foe sma di abi broko-ede na alape! A boskopoe disi no wawan ben kon na a joisti ten, ma a de tranga fanowdoe toe. Preikiman na ini ala gemeente sori taki den ben horibaka gi dati nanga den heri ati, foe di den wani foe meki doesoendoesoen sma kisi a boskopoe disi. Joe e soekoe foe abi wan prati dorodoro?
2 Wan porsi foe a Kownoekondre njoensoe ben seni go na ala gemeente, èn ibri preikiman ben kisi wan sani foe 50 eksemplaar èn ibri pionier 250 eksemplaar. Omeni joe ben man foe prati? Efoe joe no ben man foe doe so foeroe leki joe ben wani, dan joe loekoe foe feni fasi foe doe moro bifo a prati foe den sa kaba tapoe 14 mei? Fa a de nanga a gi foe joe nen foe tron wan jepi-pionier? Joe kan meki gebroiki foe den ekstra velddienst konmakandra na ini a wiki, soleki den wan foe gi kotoigi na mofoneti?
3 Den owroeman sa loekoe finifini baka fa a gebied e wroko. Efoe a gemeente di abi a frantiwortoe, no sa man foe wroko wan toe pisi foe a gebied foe den, dan den owroeman moesoe meki kontakti nanga gemeente di de krosibei foe aksi efoe den kan jepi den. Den moeiti di wi e meki nanga wi heri ati, makandra nanga a wroko di den gemeente e wroko makandra na wan boen fasi, sa moesoe meki a wroko waka boen.
4 Kande joe ondrofeni moro foeroe prisiri na ini a wroko disi, foe di someni sma ben man teki prati, so srefi njoen preikiman nanga jongoewan. Wi e howpoe, taki a prisiri jeje disi sa tan, so taki a sa gi ala sma deki-ati foe go baka foe fisiti den wan di piki na wan boen fasi. Wi ben kisi tranga foe hori wan boen oso-foe-oso raport, foe skrifi den nen èn tra bodoi na tapoe foe den wan di ben sori belangstelling. A kaba pisi foe mei ben kan de wan boen ten foe poti prakseri na tapoe den gobaka nanga a marki foe bigin njoen studie.
5 San wi kan taki te wi go baka? Joe ben sa kan abi wan boen bakapisi foe di joe e taki: „Kande joe e memre a traktaat di mi ben libi gi joe no so langa pasa; mi howpoe taki joe ben abi na okasi foe leisi en èn ben prakseri a tori pikinso. A boskopoe disi seiker ben meki foeroe takimakandra bigin na ini wi birti, foe di a e taki foe toemoesi prenspari tori di abi foe doe nanga ala libisma.” Sori go na wan toe foe den froeklari di e boeweigi sma foe prakseri, tapoe bladzijde toe èn baka dati poti na aksi: „San joe e prakseri wi moesoe doe foe de seiker taki wi de sreka-sreka gi san a ten di de na wi fesi sa tjari kon?” Gi okasi foe piki. Efoe a sma e sori belangstelling, taki makandra foe tra penti tapoe bladzijde 2 te nanga 4 foe a Kownoekondre njoensoe èn pristeri wan bijbelstudie noso, efoe dati no man, dan pristeri den lasti tijdschrift.
6 Efoe joe e wroko na ini a gebied foe wan tra gemeente, sorgoe taki joe gi den nen foe ala den wan di joe miti di abi belangstelling, so taki den preikiman foe a gemeente dati kan meki den gobaka. So srefi toe, efoe den ben gi joe den nen foe wan toe sma foe go baka na den, sorgoe taki joe drai go baka wantewante.
7 A spesroetoe prati foe a Kownoekondre njoensoe disi tjari bigi prisiri kon èn gi wi alamala deki-ati foe doe moro moeiti na ini a Kownoekondre preikiwroko. Wi kan froetrow, taki a sa abi toemoesi boen bakapisi di sa meki taki sma na ala sei e kon froestan moro foe a bigi nen foe Jehovah èn a prakseri foe en (Jes. 12:4, 5). O moro wi man foe doe, o moro bigi a prisiri foe wi sa de.—Ps. 126:3.