Boen njoensoe gi den safri-ati sma
1 Wi e libi na ini wan ten foe kroetoe di de krosibei (Esek. 9:5, 6). A de toemoesi prenspari taki den safri-ati sma na ala sei moesoe kon sabi dati, foe den kan sreka densrefi gi san e kon. Na ini en lobi boen-atifasi, Jehovah gi en pipel a komando „foe taigi den safri-ati sma a boen njoensoe” (Jes. 61:1, 2). Den tijdschrift foe wi e jepi wi foe meki a boen njoensoe disi bekènti na ala sei èn na den moro farawe presi.
2 A Waktitoren nanga Ontwaakt! e gi wi krakti jeje njanjan di e gi wi deki-ati èn di e boeweigi wi foe doe sani. A Waktitoren e trowstoe den safri-ati sma nanga a boen njoensoe, taki a Kownoekondre foe Gado sa kenki grontapoe na ini wan paradijs heri-esi. Na Ontwaakt! e bow froetrow na ini a pramisi foe wi Mekiman, foe wan njoen grontapoe pe vrede nanga seikerfasi sa de. Wan foe den moro esi fasi foe tjari a boen njoensoe gi den safri-ati sma, na foe prati den tijdschrift disi na ala sei. Sortoe penti foe den moro njoen tijdschrift wi kan tjari kon na fesi?
3 Joe ben kan pristeri a „Waktitoren” foe 1 mei, foe di joe e sori na tapoe na artikel „Kisi winimarki foe leisi bijbel ibri dei” èn e poti na aksi:
◼ „Sortoe winimarki joe prakseri wi kan kisi te wi e leisi bijbel? [Gi okasi foe piki.] Na ini Romesma 15:4 bijbel srefi e jepi wi foe poti prakseri na tapoe na aksi disi. [Leisi Romesma 15:4.] Foeroe sma na ini wi birti abi wan bijbel, ma wan toe sma nomo feni ten foe leisi en dorodoro. Wi e bribi taki a wan enkri seiker howpoe foe a ten di de na wi fesi de foe feni na ini bijbel èn wi sa kisi blesi te wi e leisi en.” Taki foe wan toe sani moro di fiti, èn baka dati pristeri den tijdschrift.
4 A „Waktitoren” foe 1 mei e poti prakseri na tapoe wan artikel di e hari belangstelling nanga a titel: „Wan njoen libi gi den afo foe wi.” Joe ben sa kan wiki a belangstelling nanga na inleiding disi:
◼ „Someni sma e aksi densrefi foeroetron fa den afo foe den ben de. Foe di den dede kaba èn no de moro, foeroe sma e taki dan, dati wi no sa sabi dati noiti. Joe prakseri taki wi sa abi wan okasi foe kon sabi den afo foe wi oiti?” Gi okasi foe piki. Leisi Johanes 5:28, 29 èn tjari kon na krin fa Gado pramisi foe gi den afo foe wi wan njoen libi na ini a paradijs grontapoe.
5 Joe ben kan pristeri na „Ontwaakt” foe 8 mei foe di joe e poti wan aksi:
◼ „San joe e prakseri ben sa de fanowdoe foe meki a libi de troetroe warti foe libi?” Gi okasi foe piki. Sori go na a artikel „Wat is de zin van het leven”, bladzijde 26, èn leisi den wortoe foe Salomo na ini Preikiman 2:11. Baka dati, sori na tapoe a rai foe en na ini kapitel 12 vers 13. Gi na ososma wan kari foe teki a tijdschrift.
6 Efoe joe e wroko bifo 14 mei nanga den tijdschrift, dan sorgoe taki joe tjari eksemplaar foe a Kownoekondre njoensoe nr. 34 èn pristeri den na ala sma di no kisi wan eksemplaar ete. Wi moesoe de alaten sreka-sreka foe prati den poeblikâsi foe wi, foe di wi e froestan taki tra sma na ini na osofamiri noso srefi mati di e fisiti den, ben sa kan leisi den (1 Tim. 6:18). A boen njoensoe di wi e tjari go na den safri-ati sma kan kibri den libi.—1 Tim. 4:16.