Jehovah e gi krakti
1 Leki a pipel foe Jehovah, wi kisi a komando foe preiki a boen njoensoe ala di wi e tan tjari wisrefi „boen na ondro den nâsi” (1 Petr. 2:12; Mat. 24:14). Efoe wi hori na prakseri den moeilek ten èn so srefi den eigi swakifasi foe wi, dan noiti wi no ben kan doe a wroko disi wi wawan (2 Tim. 3:1-5). O kolokoe wi de taki wi kan loekoe go na Jehovah foe feni jepi!
2 Na apostel Paulus ben horidoro na ondro foeroe tesi (2 Kor. 11:23-27). Fa a ben man kakafoetoe gi den tesi disi èn kaba a wroko di a ben kisi foe doe? Jehovah ben gi en „krakti di e pasa a marki foe san de normaal” (2 Kor. 4:7). Paulus ben erken den sortoe jepi foe Gado disi di a ben skrifi: „Gi ala sani mi abi a tranga foe En di e gi mi krakti” (Fil. 4:13). Jehovah sa jepi wi na a srefi fasi. Fa wi kan kisi a jepi disi?
3 Foe di wi e tan begi doronomo: Jesus ben gi wi tranga foe ’tan aksi, tan soekoe, èn tan naki’, èn foe no lasi-ati (Luk. 11:5-10). A hori di wi e horidoro na ini begi, e sori Jehovah o foeroe a broko-ede foe wi de, o faja a wani foe wi de, èn o opregti a reide foe wi de foe san ede wi wani doe wan sani (Ps. 55: 17; 88:1, 13; Rom. 1:9-11). Paulus ben erken a prensparifasi foe horidoro na ini begi di a ben gi wi tranga foe „tan begi doronomo” (1 Tes. 5:17). Begi na wan foe den fosi fasi fa wi e kisi a jepi foe Jehovah.
4 Foe di wi e poti prakseri na tapoe theokrasia tiri: „Theokrasia” wani taki „tiri foe Gado”, di na lobi. Wi e njan boen foe en tiri te wi e erken en makti, èn e poti prakseri na tapoe den rai foe en te wi e teki bigi nanga pikin bosroiti. A „getrow èn koni srafoe” e teki presi gi theokrasia tiri na tapoe a grontapoe disi (Mat. 24:45-47). A wroko di wi e wroko makandra nanga na organisâsi di a „srafoe” e gebroiki, de toemoesi prenspari efoe wi wani kisi a blesi foe Jehovah. (Teki gersi Hebrewsma 13:17.) Jehovah sa pai a loyaalfasi foe wi èn a de di wi de klariklari foe gi jesi na den wet foe en, foe di a e gi wi a krakti di wi abi fanowdoe na a joisti ten.—Hebr. 4:16.
5 Foe di wi e tan krosibei foe wi brada: Lobi na a marki foe kon sabi den disipel foe Jesus (Joh. 13:34, 35). Foe di someni difrenti persoonlijkheid de, meki wi problema kan kon na mindri wi, foe di a wan sma e difrenti foe a trawan. Wi moesoe abi safoe sari-atifasi, èn wi moesoe gi trawan pardon sondro degedege (Ef. 4:32). Disi e meki, taki wi man foe tan krosibei foe wi brada na ini a bribi, èn foe kisi deki-ati te wi e si fa den e horidoro kánkan na ondro tesi. „Foe di wi sabi taki den srefi sani, leki wan fasi foe njan pina, e pasa na ini a heri libimakandra foe wi brada”, meki wi abi a krakti di komoto na Gado foe handri, te wi kisi foe doe nanga den srefi hebi.—1 Petr. 5:9.
6 Foe di wi e tan hori wan boen gwenti foe persoonlijk studie: Te wi e tranga wi prakseri nanga wi ati na jejefasi, dan disi e meki wi man foe wai pasi gi den sani di Satan e doe foe doe wi ogri (1 Petr. 5:8). Wan boen gwenti foe persoonlijk studie sa meki a sabi di wi abi foe Gado kon moro foeroe. Wi kan gebroiki a sabi disi te wi e kisi foe doe nanga den aladei tjalensi. Paulus ben poti krakti na tapoe a toemoesi prenspari ròl di „soifri sabi” e plèi na ini a kisi di wi kisi froeloesoe (1 Tim. 2:3, 4). A de toemoesi prenspari foe teki njanjan na jejefasi doronomo.
7 Ala den sani di de fanowdoe foe jepi wi foe tan tranga, de makriki foe kisi nanga jepi foe a kresten gemeente. Te wi horibaka gi den aktiviteit foe a gemeente nanga wi heri ati, dan dati sa gi wi a djaranti taki wi „sa waka èn no sa kon weri”.—Jes. 40:29-31.