Sori lespeki gi Jehovah en anbegi presi
1 Te wi de wan fisitiman na ini na oso foe wan sma, dan wi e sori lespeki gi den sani di de foe a sma, wi no e doe no wan sani foe broko den sani foe a sma, èn wi no e broeja a fasi fa sma e doe sani na wan orde fasi na ini na oso. Wi moesoe tjari wisrefi nanga moro lespeki srefi te wi de fisitiman foe Jehovah! Wi moesoe sabi fa wi moesoe tjari wisrefi na ini en oso (Ps. 15:1; 1 Tim. 3:15). Awansi a kresten konmakandra foe wi e hori na ini a Kownoekondre zaal, na ini na oso foe wan sma, noso na wan poebliki presi, moro foeroe foe wi ala ten e sori lespeki gi a presi pe wi e anbegi neleki a ben de na oso foe Jehovah, di „a wartifasi foe en hei moro grontapoe nanga hemel”. — Ps. 148:13.
2 Son brada no e sori lespeki na den konmakandra, foe di den e meki foeroe babari noso den e doe neleki a bodoi di e gi no ben de prenspari. Wan toe bigisma e hori takimakandra di no de fanowdoe, na ini a lobby, a toilet, noso dorosei foe a Kownoekondre zaal, ala di a konmakandra e hori ete. Te wan moro owroe pikin de en wawan e loekoe wan moro jongoewan, dan sontron den toe pikin e bigin plèi èn no e feni foeroe winimarki foe a programa. Son jongoewan ben go dorosei foe a Kownoekondre zaal na baka den konmakandra, èn den e plèi, e meki kefalek foeroe babari, èn den e plèi karate nanga makandra. Na ini wan toe situwâsi den hendri den birtisma noso hendri a verkeer na a parkeerpresi noso na tapoe strati.
3 Fa wi kan sorgoe taki wi no de sondro lespeki: Te wi e froestan a wartifasi nanga a santafasi foe wi anbegi, dan seiker wi no ben sa wani poeroe a prakseri foe tra sma foe di wi e sjoesjoe, e njan, e kaw kawgum, e fromoefromoe nanga papira, e go na toilet sondro taki a de fanowdoe, noso abi a gwenti foe kon lati na den konmakandra. Papa nanga mama di e sori lespeki èn di abi warderi no e gi den pikin foe den na okasi foe doti a gron, den stoeroe, noso den skotoe foe a Kownoekondre zaal noso foe na oso pe a boekoestudie e hori. Èn seiker wi alamala e agri taki a no e fiti srefisrefi taki sma e tjari densrefi na wan sjen fasi drape, e taki don sani, noso e taki morsoe tori na tapoe den konmakandra foe wi. — Ef. 5:4.
4 Efoe ala ten wi e prakseri san na a marki foe den kresten konmakandra foe wi, dan wi sa sorgoe taki wi nanga den pikin foe wi e sori a joisti lespeki gi Jehovah en anbegi presi, pe wi „froekisi foe tanapoe”. — Ps. 84:10.