„De srekasreka dorodoro gi ibri boen wroko”
1 Na ini a ten disi a pipel foe Jehovah blesi nanga hila-hila boen jeje njanjan (Jes. 25:6). Wi kan njanboen foe foeroe sani di komoto foe bijbel nanga jepi foe persoonlijk studie nanga osofamiri studie èn na den gemeente konmakandra, kring-konmakandra nanga spesroetoe dei-konmakandra, nanga na den kongres. Ma wi e gebroiki den sani disi boen nanga na prakseri foe kon „koni dorodoro, foe de srekasreka dorodoro gi ibri boen wroko”? — 2 Tim. 3:17.
2 Prakseri nomo foe den sani di de foe njan na jejefasi gi a jari 1998, di pasa afoe kaba! Nanga jepi foe den alawiki gemeente konmakandra, wi e loekoe wan toe edepenti foe 23 boekoe foe den kresten Griki Boekoe foe bijbel, e loekoe den bodoi baka di de foe feni na ini Inzicht in de Schrift èn di abi foe doe nanga a libi foe 49 sma foe bijbel, èn wi e poti prakseri na tapoe 138 bladzijde foe a Verkondigers-boekoe. So srefi wi e loekoe baka wan di foe dri pisi foe a Sabi-boekoe, pikinmoro a heri Kolokoe osofamiri-boekoe, nanga a heri Gods woord-boekoe. Moro fara, wi e kisi njanjan nanga jepi foe 12 uitgave foe Wi Kownoekondre Dienst, 52 Waktitoren-studieartikel, èn pikinmoro 52 poeblikitaki di e taki foe difrenti bijbel tori. Boen kongres nanga kring-konmakandra programa nanga spesroetoe dei-konmakandra programa de toe boiti ala den sani disi. Dati na boen foeroe goedoe na jejefasi di wi kan feni srefisrefi!
3 Warderi den sani di Jehovah gi: Efoe wi wani kisi winimarki dorodoro, dan wi moesoe froestan foe san ede Jehovah e gi so foeroe jeje goedoe pasa marki. Efoe wi e njan foe den boen sani disi, dan dati e bow wi bribi èn e tranga a matifasi di wi abi nanga en (1 Tim. 4:6). Ma jeje njanjan no meki nomo foe wi kisi bodoi. A e boeweigi wi foe prati waarheid nanga trawan èn a e meki wi de srekasreka foe abi boen bakapisi te wi e doe so, leki bedinari foe a boen njoensoe. — 2 Tim. 4:5.
4 No meki a de so taki wi no e sorgoe gi wi jeje nowtoe, ma ala ten meki wi kweki na angri di wi e angri gi den boen sani di e gi satisfaksi na jejefasi èn di e komoto foe a tafra foe Jehovah (Mat. 5:3; 1 Petr. 2:2). Foe kisi winimarki dorodoro, wi moesoe poti nofo ten na wan sei gi den sortoe prenspari sani leki doronomo persoonlijk studie nanga osofamiri studie èn foe fisiti konmakandra dorodoro (Ef. 5:15, 16). Te wi e doe disi, dan den kolokoe paiman sa kroederi nanga a deki-ati di Gado ben meki Paulus skrifi nanga jepi foe santa jeje gi den getrow Hebrew kresten, soleki fa skrifi na Hebrewsma 13:20, 21.