April — ¡Wan Ten fu De Fayafaya gi Tumusi Bun Wroko!
1 Te wan bigi, ogri winti e kon krosibei fu wan presi pe sma e libi, dan a de tumusi prenspari fu warskow sma fu a kefar di de na pasi e kon. O moro krosibei a bigi, ogri winti e kon, o moro prenspari a de fu poti krakti tapu den warskow. Fu san ede? ¡Fu di a libi fu sma de na ini kefar! A ben kan de so taki son sma no yere den warskow di ben gi kaba. Kande tra sma yere den, ma den no ben broko den ede fu du wan sani. Na so a de tu nanga a warskow di e kon fu Gado èn di wi kisi a wroko fu meki bekènti bifo a „bigi winti” fu na atibron fu Gado, di de regtfardiki, e wai ala sani gowe di de wan pisi fu a godelowsu grontapu disi (Odo 10:25). ¡A têgo libi fu milyardmilyard libisma de na ini kefar! Wi musu meki a warskow bekènti. Wi musu de „fayafaya gi tumusi bun wroko”.—Tit. 2:11-14.
2 Gi someni tenti yari, Yehovah en pipel kisi a deki-ati fu meki a ten fu a Memrefesa de wan ten fu sori spesrutu faya na ini a diniwroko. Na ini a lente fu 1939, na Informateur, di ben kon fosi Wi Kownukondre Dienst, ben gi a deki-ati disi: „Fu di lente e kon, èn wi abi bun weer, dan wi musu fruwakti taki [gemeente] preikiman sa wroko tu tron moro langa na ini a diniwroko leki san den ben gwenti èn taki a yuru fu den pionier sa kon hei srefisrefi. April na wan mun di abi feifi sonde. A abi feifi satra tu. Meki ibri satra nanga sonde na ini april . . . de wan ten fu gi kotoigi na wan spesrutu fasi.” ¡Dati ben de trutru wan muilek marki di den brada ben wani doro 60 yari pasa! Na ini a yari disi, neleki na ini 1939, a mun april abi feifi satra nanga feifi sonde. San yu prakseri fu du na ini a mun disi? Sortu sani yu skrifi na tapu yu kalender gi april 2000? Sreka yusrefi fu abi wan bun prati na den tumusi bun wroko makandra nanga a pipel fu Yehovah na ini a spesrutu mun disi fu du moro wroko na yeye fasi.
3 San Wi Wani Doro: A moro prenspari dei fu a yari 2000 de na ini a mun disi. A de 19 april, a dei te wi sa memre a dede fu Yesus. Meki wi du muiti spesrutu fu gi someni sma leki wi man wan kari fu kon na a Memrefesa. Leki fa wi ben kisi a rai na ini a mun di pasa, dan meki wan lijst fu ala sma di kande ben sa man kon na a Memrefesa èn luku taki yu no frigiti no wan sma. Ala preikiman di tapu fu preiki, bijbelstudenti, sma pe yu e tyari gobaka, sma di ben studeri fosi, sma na yu wrokope, skoromati, birtisma, famiri nanga tra sma di yu sabi musu de tu na mindri den sma di e kisi wan kari. ¿Den sma di wani kon, abi wan fasi kaba fu kon? Efu den no abi no wan fasi ete, dan yu kan yepi den na wan lobi-ati fasi? Na a neti fu a Memrefesa, wi alamala sa abi a grani fu meki den wan di o kon na a Memrefesa firi taki wi breiti fu abi den na wi mindri. Baka a Memrefesa wi kan go moro fara fu gi den sortu sma disi di abi belangstelling, yepi na yeye fasi.
4 Fu de „fayafaya gi tumusi bun wroko” na ini den dei na fesi nanga den dei baka a Memrefesa, na wan moi fasi fu sori taki wi e warderi ala san Yehovah du gi wi trutru. A de wan tyalensi gi furu fu wi fu du moro muiti na ini na evangelie wroko ala di a weer takru. Efu yu e du yepi-pionierwroko, dan kande yu kan du ala san yu man fu wroko 50 yuru noso moro na ini a diniwroko (Mat. 5:37). Hori yusrefi na a schema di yu ben seti na a bigin fu a mun (Preik. 3:1; 1 Kor. 14:40). Meki a de so taki wi alamala e du san wi man du fu horibaka gi den pionier fu di wi e gi den deki-ati èn fu di wi e wroko nanga den na ini a diniwroko. (Teki gersi 2 Kownu 10:15, 16.) Efu wi e sai fayafaya na ini april, dan wi kan fruwakti taki wi sa prisiri srefisrefi èn taki Yehovah sa blesi wi (Mal. 3:10). Kande disi sa de wan yepi fu go doro fu du yepi-pionierwroko noso fu du gewoon pionierwroko. Meki a de so taki a faya di wi kisi na yeye fasi na ini a mun april e tan na ini den mun di e kon, ala di wi e go doro fu de preikiman di e preiki a Kownukondre doronomo.
5 A de seiker taki na ini a mun disi dusundusun fu Yehovah en pipel sa opo moro oso-bijbelstudie. ¿Yu wani opo wan oso-bijbelstudie? Begi spesrutu gi wan studie èn du leki fa yu begi. Yu kan de seiker taki Yehovah sa warderi taki yu e aksi en nanga sakafasi efu a kan yepi yu fu feni wan opregti sma di yu kan gi leri.—1 Yoh. 3:22.
6 Wan fasi di gebroiki na ini a diniwroko kaba fu taki nanga sma èn di abi bun bakapisi fu bigin takimakandra, na a wan disi. Bigin aksi: „¿Yu e denki taki a du di sma e du ogri nanga tranga na skoro, na wan bakapisi fu den sani di ogri yeye e du noso a e pasa fu di papa nanga mama no e gi den pikin nofo leri?” Gi a sma na okasi fu piki. Efu a sma e taki „fu den sani di ogri yeye e du”, dan leisi Openbaring 12:9, 12 èn poti krakti tapu san Didibri e du fu meki a situwâsi na grontapu kon bruya moro. Baka dati, opo les 4 fu a San Gado e aksi-brochure èn aksi a sma efu oiti a ben aksi ensrefi pe Didibri ben komopo. Go doro fu leisi èn fu taki fu den fosi tu paragraaf. Efu a sma e piki taki ogri di e du nanga tranga, de na skoro „fu di papa nanga mama no e gi den pikin nofo leri”, dan leisi 2 Timoteus 3:1-3 èn sori den eigifasi di, soleki fa a de fu si krin, e meki a problema disi kon. Baka dati, opo les 8 fu a San Gado e aksi-brochure, leisi paragraaf 5 èn go doro nanga a takimakandra. Efu yu kan meki mofo fu go baka, dan kande disi e opo na okasi fu go studeri Bijbel nanga a sma doronomo. Te yu de na a sma wan tra leisi, dan aksi en efu a sabi iniwan tra sma di kande ben sa kan abi belangstelling fu yere san a e leri.
7 Wan tra fasi fu de „fayafaya gi tumusi bun wroko” na ini april na fu teki prati na difrenti fasi fu a preikiwroko. ¿Yu ben prakseri kaba fu gi kotoigi na wan presi pe sma e koiri noso na wan parkeerpresi? ¿Na wan bushalte noso na taximan? Fu san ede yu no e pruberi fu gi kotoigi nanga telefon, na strati, noso na ini bisnis kontren? ¿Fu san ede yu no e go du den sani di yu abi na prakseri, na ini a mun disi? Yehovah sa yepi yu fu kisi a deki-ati di de fanowdu (Tori. 4:31; 1 Tes. 2:2b). Kande yu kan meki mofo fu wroko nanga wan pionier noso nanga wan preikiman di abi furu ondrofeni na ini den fasi disi fu a diniwroko.
8 Iniwan sma di trutru wani du moro na ini a wroko fu gi kotoigi kande kan teki prati na a gi fu kotoigi na okasi. Furutron ala san wi musu du, na fu bigin wan switi takimakandra nanga a sma. Taki fu wan tori di e hari a prakseri fu furu sma, kande fu di yu e gebroiki a fasi fu taki nanga sma di skrifi na ini paragraaf 6. Pruberi fu gebroiki srefi den pikin okasi fu a ten di yu abi na wan bun fasi so taki yu ten no e lasi fu soso. Fu san ede yu no e gebroiki srefi feifi miniti, tin miniti, noso tinafeifi miniti na wan bun fasi fu gi kotoigi na okasi?
9 Wan Ten fu Prakseri Baka: Prakseri den penti baka di ben abi krakti na tapu sma èn di ben tyari kon na krin ini a drama na „A Profeiti Wortu fu Gado”-Distrikt Kongres a yari di pasa. A drama, di ben nen Abi Warderi gi a Yeye Gudu Di Wi Kisi, ben meki wi prakseri bun fu a difrenti na mindri Yakob nanga Esau. Esau ben taki dati a ben abi a srefi belangstelling leki Yakob gi den sani na yeye fasi, ma disi no ben de fu si na den sani di Esau ben du (Gen. 25:29-34). ¡Disi na trutru wan krakti warskow gi wi! Neleki Yakob, meki wi de klariklari fu du muiti srefisrefi, kande fu feti srefi, fu kisi blesi fu Yehovah (Gen. 32:24-29). Fu meki taki a no de so noiti taki wi de sondro tangi gi a tumusi moi yeye gudu di wi kisi, dan fu san ede wi no e gebroiki april nanga ala den mun di e kon baka dati, fu meki wi kon kisi a faya baka di wi ben abi?
10 „A bigi dei fu Yehovah de krosibei. A de krosibei, èn a e hasti ensrefi fu tru” (Sef. 1:14). Wi musu meki a bun nyunsu fu a Kownukondre bekènti. ¡A libi fu sma de na ini kefar! Meki a de so taki a mun disi na wan spesrutu mun gi Yehovah en pipel na heri grontapu ala di wi e sori na ini wánfasi taki wi de „fayafaya gi tumusi bun wroko”.
[Faki na tapu bladzijde 4]
Sani Di Wi Musu Hori na Prakseri gi a Memrefesa
A yari disi a Memrefesa sa de dridewroko 19 april. Den owruman musu poti prakseri na den sani di e kon now:
◼ Te unu e bosroiti o lati a fesa o hori, dan sorgu taki a brede nanga a win prati baka te sondongo.
◼ Ala sma, so srefi a takiman, musu sabi a yoisti ten nanga presi pe a Memrefesa sa hori.
◼ Unu musu suku a yoisti sortu brede nanga win èn a musu de srekasreka.—Luku A Waktitoren fu 15 februari 1985, bladzijde 10.
◼ Unu musu tyari preti, grasi èn wan bun tafra nanga wan tafraduku, go na a zaal èn poti den na a yoisti presi fosi a konmakandra e bigin.
◼ Langa ten na fesi a Kownukondre zaal noso wan tra konmakandra presi musu krin bun.
◼ Den owruman musu luku suma den o teki fu hori wakti èn suma den o teki fu prati a brede nanga a win èn unu musu sori den na fesi san den musu du èn fa den musu du den sani na wan yoisti fasi.
◼ Sani musu sreka fu gi a brede nanga a win na iniwan fu den salfuwan di siki èn di no man de drape.
◼ Te moro leki wán gemeente sa gebroiki a srefi Kownukondre zaal, dan wan bun wrokomakandra musu de na mindri den gemeente, so taki fesisei fu a zaal, a doromofo, a futupasi pe sma e waka èn a parkeerpresi no sa lai nanga sma di no man pasa go makriki pe den musu go.