„Luku Fosi Fu Si Efu Den Bun Nofo”—Fa?
1 Fu di na organisâsi fu Yehovah e gro kon moro bigi, bekwaam brada de fanowdu doronomo fu dini leki dinari ini a diniwroko. Furu brada di no poti ete leki dinari ini a diniwroko, so srefi yongu brada di de na ini den tini yari tu, abi a tranga winsi fu dini na ini a gemeente. Te den e kisi moro wroko, dan den e firi taki den e teri èn taki den man du wan sani. Den kan go moro na fesi soso te den owruman e „luku fosi fu si efu den bun nofo [fu dini]” (1 Tim. 3:10). Fa den owruman e du disi?
2 A Rol fu den Owruman: Den owruman sa luku fosi fu si efu wan brada bun nofo fu teki frantwortu fu di den e gebroiki den markitiki fu Bijbel gi dinari ini a diniwroko, di de fu feni na 1 Timoteus 3:8-13. Owruman kan gi en a wroko fu sorgu gi tijdschrift nanga buku, fu waka nanga mikrofon, fu ondrow a Kownukondre zaal èn go so moro fara. Den owruman sa luku san a e du te a e kisi den wroko fu en èn fa a e du den. Den sa luku efu den kan frutrow na en tapu, efu a lobi fu du sani wantewante, efu a e du en wroko nanga faya, efu a abi sakafasi, efu a de klariklari fu du wroko èn efu a abi bun matifasi nanga trawan (Fil. 2:20). A de wan eksempre na ini a fasi fa a e weri krosi èn a fasi fa a e sorgu ensrefi? A frustan san a wani taki fu tyari frantwortu? Den wani si na ini ’a tumusi bun fasi fa a e tyari ensrefi, taki den wroko fu en’ e du „na wan safri-ati fasi di e fiti koni” (Yak. 3:13). A e meki muiti trutru fu de wan yepi na ini a gemeente? A e hori a komando fu Yesus „fu meki disipel”, fu di a abi wan fayafaya prati na a preikiwroko?—Mat. 28:19; Luku A Waktitoren fu 1 september 1990, bladzijde 9-19.
3 Ala di Bijbel no poti wan yari di wan sma musu doro fosi den poti en leki dinari ini a diniwroko, toku a e taki fu den sortu brada disi leki „man di e dini”. Wi no ben sa fruwakti srefisrefi taki den de na a bigin fu den tini yari noso taki den de leti na mindri den tini yari, spesrutu fu di Bijbel e taki dati den kan abi wan uma nanga pikin (1 Tim. 3:12, 13). Den sortu man disi no musu gi densrefi abra na „den lostu di den yongu sma abi”, ma den musu tyari densrefi na wan seryusu fasi, èn den musu abi wan bun nen nanga wan krin konsensi na fesi Gado nanga sma.—2 Tim. 2:22.
4 Ala di owruman kan gebroiki wan sma di fu ensrefi abi bekwaamfasi, toku a fasi fa wan sma e handri èn e denki, na sani di e teri trutru. Wan brada abi a winsi èn a sakafasi fu prèise Gado? A abi a tranga winsi tu fu dini den brada fu en? Efu disi de so, dan Yehovah sa blesi den muiti di a e meki fu go na fesi na ini a gemeente.