„Feti a Tumusi Bun Feti fu a Bribi”
1 Na apostel Paulus ben frumane Timoteus fu „feti a tumusi bun feti fu a bribi” (1 Tim. 6:12). Paulus srefi ben handri akruderi den wortu disi. Na ini a kaba pisi fu en libi, a ben taki sondro fu tweifri, taki ensrefi ben feti wan bun feti (2 Tim. 4:6-8). Na ala fasi, a ben tan du a diniwroko fu en nanga deki-ati, èn a ben horidoro. Te wi e waka baka na eksempre fu en, dan wi kan abi a srefi seikerfasi na ini wi ati, taki wi e du ala san wi man du na ini a feti gi a Kresten bribi.
2 Du Ala San De Fanowdu: Paulus ben wroko tranga na ini a diniwroko (1 Kor. 15:10). Wi e du dati tu te wi e suku fu feni ala den sma di warti na ini a kontren pe wi e preiki (Mat. 10:11). Fu miti son wan fu den, dan kande wi sa abi fu wiki frukufruku fu kan gi kotoigi na den sma di wi e miti na strati. Noso kande wi musu wroko lati na bakadina noso fruku na mofoneti, fu miti sma te den doro baka na oso.
3 Wi musu man dwengi wisrefi fu tan du den sani di wi musu du, èn wi musu seti sani bun so taki wi no e doro lati na a presi pe wi musu kon makandra nanga wi bukustudie grupu fu go na ini a preikiwroko. Teki leki eksempre, wan tu memre fu a Bethelfamiri di de na pasi pikinmoro 60 miniti go-kon, so taki na a kaba fu a wiki den kan teki prati na a diniwroko, makandra nanga a gemeente fu den. So srefi wi e warderi wan tu preikiman nanga wan tu osofamiri na ini wi gemeente di e libi fara, ma toku den no e doro lati na den konmakandra. A bun fu waka baka den eksempre fu den sma disi di e meki muiti, èn di seti den afersi bun.
4 A musu de so taki wi wani go baka na ala den sma di ben arki. Srefi te wi e pristeri tijdschrift na strati noso na tra presi, dan wi musu du muiti fu kisi na adres noso a telefon nomru fu a sma. Baka dati dan wi musu go na a sma oso fu fruteri en moro, èn wi musu pruberi fu bigin wan bijbelstudie nanga en.
5 Abi wan Prati Doronomo na a Diniwroko: Paulus ben preiki doronomo èn dorodoro (Rom. 15:19). Fa a de nanga yu? Yu e teki prati doronomo na a preikiwroko? Yu teki prati kaba na a preikiwroko a mun disi? Gemeente Bukustudie fesiman wani si taki ibri sma na ini a grupu fu den e teki prati na a preikiwroko na ini augustus. Den sa yepi yu fu du dati.
6 Te wi e waka baka na eksempre fu Paulus di ben horibaka dorodoro gi a bun nyunsu, dan wi sa tan „feti a tumusi bun feti fu a bribi”.