Tan kisi winimarki fu A Waktitoren nanga Ontwaakt!
Now di wi no e seni A Waktitoren nanga Ontwaakt! leki abonnement moro gi sma, dan wi abi fu meki muiti fu sorgu taki wi èn den wan di wi e preiki gi, no misi nowan fu den tijdschrift.
Wi eigi tijdschrift: Te yu eigi abonnement kaba, dan yu kan aksi moro tijdschrift na a tijdschrift tafra na ini yu gemeente. Papa nanga mama musu aksi nofo tijdschrift, so taki ibri memre fu na osofamiri kan kisi wan gi ensrefi. Efu yu nen skrifi na tapu yu tijdschrift, dan yu no sa prati a tijdschrift fu yu na ini a preikiwroko sondro fu sabi dati. Te nyun tijdschrift kon, dan den brada di abi a frantwortu fu prati den sa sorgu taki sma kan kisi den wantewante na a Kownukondre konmakandra-presi.
Sma di e teki tijdschrift doronomo: Preikiman musu meki muiti fu tyari den tijdschrift doronomo gi den wan di wani ibriwan fu den tijdschrift di e kon na doro. Te wisrefi e tyari den tijdschrift go gi den sma, dan dati sa gi wi na okasi fu yepi den fu kon sabi moro èn fu bigin wan oso-bijbelstudie nanga den.—Luku Wi Kownoekondre Dienst fu oktober 1998, bladzijde 8.
Te a de fanowdu fu seti sani trafasi gi sma: Kande wan sma sori trutru taki a wani fu kon sabi moro, aladi a e libi na ini wan kontren di no gi na nowan gemeente. Aladi wi no e pristeri ala sma wan abonnement moro, dan toku wi kan seti wan abonnement gi den sma disi so taki wi kan seni den tijdschrift gi den. Efu a de so taki nowan fasi no de fu tyari den tijdschrift doronomo gi wan sma di e libi na ini a kontren pe wan gemeente e wroko, èn efu a de so taki a sma wani fu leisi den tijdschrift trutru, dan wi kan taki fu a pisi tori disi nanga a Diniwroko Komte fu wi gemeente. Efu den brada disi agri nanga a tori, dan wi kan aksi wan abonnement gi so wan sma efu a wani fu kon sabi moro. Yu kan skrifi dati na tapu den abonnement papira (M-1 nanga M-101) di wi ben gwenti fu gebroiki fu du dati.
Wi kan abi a frutrow taki Yehovah sa tan blesi ala den muiti di wi e du fu taki fu a Kownukondre nanga yepi fu A Waktitoren nanga Ontwaakt!