A nyun spesrutu dei konmakandra programa
1 Telefisi, radio nanga koranti èn grontapu leriman e gi glori na materia gudu, ma a Wortu fu Gado e gi wi a rai fu „Du furu bun wroko (1 Tim. 6:18). Disi na a thema fu a spesrutu dei konmakandra programa di e bigin na ini september 2002. Sortu deki-ati wi sa kisi tapu a konmakandra disi?
2 A kringopziener sa sori wi san a wani taki fu „Suku a gudu di Gado feni bun”, èn a sa interview son preikiman di e meki tranga muiti fu kisi yeye gudu. Ini a fosi lezing di a sa hori a dei dati, a fisiti takiman sa sori wi fa a pipel fu Gado e du „Bun wroko na ini a ten disi fu a kotiwroko”. Wi alamala sa kisi a deki-ati fu luku san wi ben kan du moro srefi na ini a kotiwroko di Gado gi wi fu du na ini a ten disi.
3 Wi breiti srefisrefi te wi e si fa yongu Kresten e feti fu kisi yeye gudu! Disi e gi Yehovah glori èn a e yepi yonguwan fu bow wan bun fondamenti fu kisi moro grani na ini a diniwroko na ini a ten di de na den fesi. A lezing „Prèise den yonguwan di e gi Yehovah grani nanga den bun wroko di den e du” sa tyari kon na krin sortu bun wroko yongu Kresten na ini a kring ben du.
4 San na a bakapisi te wi e suku fu du bun wroko? A fisiti takiman sa taki fu a bakapisi disi ini en lasti lezing di nen „Tan du bun wroko èn yu sa kisi blesi fu Yehovah”. A takiman disi sa poti prakseri na fo kontren fu sori fa wi kan kisi bigi blesi: (1) leki sma, (2) leki osofamiri, (3) leki gemeente èn (4) leki organisâsi na heri grontapu.
5 Ala sma di ben gi densrefi abra na Yehovah sa kisi na okasi fu teki dopu. Efu yu klari fu teki dopu, dan taigi a fesiman opziener dati wantewante.
6 Te a dei fu a konmakandra disi meki bekènti, dan bigin seti sani wantewante so taki yu sa man de drape. Meki muiti fu doro fruku, so taki yu man singi èn begi makandra nanga den brada nanga sisa te a programa e bigin. Te wi de drape èn e poti prakseri na a heri spesrutu dei konmakandra programa, dan wi sa kisi deki-ati fu tan waka a pasi di e gi wi a gudu di wi Gado, Yehovah, feni bun.