Gi yepi na a yoisti ten

¹ Na apostel Petrus ben si taki a ben de fanowdu fu tranga den Kresten brada nanga sisa fu en. Fu di a ben e broko en ede nanga den, meki na wan lobi-ati fasi a memre den na prenspari sani èn a gi den deki-ati (2 Petr. 1:12, 13; 3:1). A gi deki-ati na „den wan di kisi wan bribi” fu tan go na fesi na yeye fasi, so taki den no tron „sma di no e du notinoti noso di de sondro froktu na a sei fu a soifri sabi fu wi Masra Yesus Krestes” (2 Petr. 1:1, 5-8). A marki fu Petrus ben de fu yepi den meki a kari èn a frukisi di den ben kisi fu Yehovah kon seiker gi densrefi, so taki ’A feni den sondro flaka èn sondro fowtu èn na ini vrede te fu kaba’ (2 Petr. 1:10, 11; 3:14). Gi furu fu den bribiman na a ten dati, a deki-ati di Petrus gi, ben de wan yepi na a yoisti ten.

² Na ini a ten disi, na a srefi fasi Kresten opziener e broko den ede nanga a pipel fu Gado. Na ini den „muilek ten” disi „di tranga fu pasa”, furu futuboi fu Yehovah musu horidoro na ondro muilek situwâsi (2 Tim. 3:1). Fu di son sma abi problema na moni sei, na ini na osofamiri, noso tra problema di densrefi abi, meki sonwan fu den kan firi neleki fa David ben e firi: „Furu rampu ben lontu mi teleki mi no ben man teri den moro. Den sondu fu mi ben kon tron so furu taki mi no ben man si den moro; den ben kon tron moro furu leki den wiwiri na tapu mi ede, èn na ati fu mi ben libi mi” (Ps. 40:12). Den problema disi kan kon so hebi taki den e frigiti den prenspari yeye frantwortu fu den èn den e tapu fu abi wan prati na a Kresten diniwroko. Ma aladi den abi problema, toku ’den no frigiti den komando fu Yehovah’ (Ps. 119:176). Now na a yoisti ten gi owruman fu gi den wan disi a yepi di den abi fanowdu.​—Yes. 32:1, 2.

³ Fu man gi a yepi disi, den owruman ben kisi deki-ati fu meki spesrutu muiti fu yepi den wan di no e preiki moro. Den e meki a spesrutu muiti disi nownow èn den sa go doro fu du disi te na a kaba fu a mun maart. Wi e aksi den bukustudie opziener fu go luku den sma di no e no preiki moro nanga a marki fu yepi den fu bigin preiki baka. Efu a de fanowdu, dan sani kan seti fu studeri Bijbel nanga den. Kande den owruman sa aksi tra brada noso sisa fu yepi den. Efu den owruman aksi yu fu yepi den, dan den sortu sma disi kan kisi furu wini fu a muiti di yu e du, spesrutu te yu e gi deki-ati na wan switi fasi èn na wan fasi di e sori taki yu e frustan den.

⁴ A de wan prisiri sani gi wi alamala te wan sma e bigin preiki baka, makandra nanga a gemeente (Luk. 15:6). Te wi e meki muiti fu gi deki-ati na den wan di no e preiki moro, dan a bakapisi sa de leki ’wan wortu di taki na a yoisti ten’.​—Odo 25:11.