Wan skoro di e yepi wi na ini a libi
1 Te wi o luku den sani di skrifi na ini a Schema gi a Theokrasia Diniwroko-skoro fu 2006, dan wi sa meki muiti fu kisi wini fu den Bijbel leri fu di wi o gebroiki dati na ini wi santa diniwroko èn na ini wi aladei libi. Wi abi a fasti bosroiti fu du san wi leri.—Yoh. 13:17; Fil. 4:9.
2 Gi piki: A schema gi a yari disi e sori taki den arkiman e kisi ete wán miniti fu teki prati na den edepenti fu a leisipisi fu Bijbel. Disi wani taki dati a brada di o taki fu den edepenti, musu sorgu taki a e du dati na ini feifi miniti, na presi fu siksi miniti. Den arkiman di e gi piki, musu hori a ten na prakseri tu. Te wan arkiman e prakseri na fesi san a o taki, dan na ini 30 sekonde noso moro mendri leki dati srefi, a sa man gi wan piki di kan yepi trawan. Disi sa meki taki sowan tin sma sa man gi piki na ini den feifi miniti di den arkiman e kisi fu teki prati na a pisi disi.
3 Lezing di e leri wi wan sani: Na den edepenti fu Bijbel èn na a instruktielezing a musu kon na krin o prenspari den leri de, èn fa wi kan gebroiki den sani dati na ini wi diniwroko èn na ini wi aladei libi. A takiman no musu abi a winsi nomo fu meki den arkiman handri akruderi den sani di den yere. A musu taki krin san den musu du, a musu sori den fa den kan du dati, èn a musu meki den poti prakseri na den wini di den o kisi te den handri na so wan fasi. Kande a kan taki: „Disi na a rai di a tekst disi e gi wi”, noso „Na so wi kan gebroiki den tekst disi na ini a preikiwroko”. Owruman nanga dinari ini a diniwroko di sabi fa den sma na ini a birti de, musu du muiti so furu leki den man, fu sori den arkiman krin fa den kan gebroiki den sani di den e leri.
4 Te wan takiman e gi eksempre fu Bijbel, dan nofo tron dati e sori den arkiman krin fa den musu gebroiki den sani di den e leri. Baka te a takiman taki fu wan Bijbel eksempre, dan a kan taki: „Kande yu de na ini wan srefi sortu situwâsi leki disi.” A musu luku taki a Bijbel eksempre e fiti na den sani di a e taki, den sani di skrifi na ini Bijbel, èn den sani di „a getrow èn koni srafu” e leri.—Mat. 24:45.
5 Koni na te wan sma e gebroiki a sabi di a abi, so taki sani kan waka bun gi en. „Koni na a moro prenspari sani” (Odo 4:7). Meki a de so, taki wi e tan gebroiki a koni di wi e kisi nanga yepi fu a Theokrasia Diniwroko-skoro, èn taki wi e leri trawan fu kisi a koni disi tu.