Yu sori sma fa wi e hori Bijbelstudie te yu miti den fu a fosi leisi?
Te wi e aksi ososma efu den wani studeri Bijbel, dan sonwan fu den e taki dati den no wani, noso taki den e studeri Bijbel kaba na den kerki. Fu di den no sabi taki wi e studeri Bijbel tra fasi leki den tra kerki, meki den no sabi taki den kan leri furu èn taki a kan gi den prisiri te den e studeri Bijbel nanga wi. Fu dati ede na presi fu aksi sma nomo efu den wani studeri Bijbel, a ben o bun fu sori den fa wi e studeri Bijbel a fosi leisi te wi miti den. Yu kan agersi en so: No taigi den sma nomo taki yu sabi bori bun èn taki yu o tyari wan nyanyan gi den te yu kon baka, ma meki den tesi wan mofo wantewante! Luku fa yu kan du disi na ini wan tu miniti nomo, nanga yepi fu den sani di skrifi na tapu bladzijde 6 fu Wi Kownukondre diniwroko fu yanuari 2006:
„Yu denki taki wan ten sa kon te den wortu disi sa kon tru? [Leisi Yesaya 33:24, èn gi a sma na okasi fu piki.] Luku wan moi sani di abi fu du nanga a tori disi.” Gi na ososma wan Bijbel leri-buku, èn meki a luku paragraaf 22 na tapu bladzijde 36. Leisi na aksi na ondrosei fu a bladzijde, èn aksi na ososma fu luku efu a man feni a piki te yu e leisi a paragraaf. Dan yu kan poti na aksi baka èn arki te na ososma e gi piki. Leisi wan fu den tra Bijbeltekst makandra nanga en. Poti wan aksi di yu o piki a tra leisi te yu go baka na a sma, èn seti sani bun fu go baka na en. Na so, yu bigin wan Bijbelstudie kaba!