A nâsi di e hori en soifri retifasi
„Opo den doro . . . so taki a regtfardiki nâsi di e tjari ensrefi na wan getrowfasi kan kon na inisei.” — JESAJA 26:2.
1. Foe san ede den wortoe di Jesaja ben taki foe wan „regtfardiki nâsi” kan de wan froewondroe sani?
INI a ten disi, foeroe sortoe nâsi de. Wan toe nâsi abi demokrasia tiri, wan toe abi diktator leki tiriman. Wan toe foe den nâsi goedoe, wan toe pôti. Na ini wán sani den de a srefi: Den alamala na wan pisi foe grontapoe, foe san Satan na a gado (2 Korentesma 4:4). Nanga disi na prakseri, den wortoe foe Jesaja kan de wan froewondroe sani gi son sma, te a e taki: „Opo den doro, oenoe man, so taki a regtfardiki nâsi di e tjari ensrefi na wan getrowfasi kan kon na inisei” (Jesaja 26:2). Wan regtfardiki nâsi? Ija, wan regtfardiki nâsi de troetroe, foe di a profeititori e sori taki a regtfardiki nâsi de troetroe ini den dei foe wi. Fa wan sma kan kon sabi na aparti regtfardiki nâsi disi?
2. San na „a regtfardiki nâsi”? Fa wi doe sabi dati?
2 Na a fasi fa a Nieuwe-Wereldvertaling e vertaal Jesaja 26:2, a e taki foe a nâsi leki wan nâsi di „e tjari ensrefi na wan getrowfasi”. A King James Version (seilin) e vertaal a tekst nanga: „a regtfardiki nâsi di e hori den waarheid”. Ala toe foe den fasi foe vertaal a tekst e fiti. Foe taki en leti, a de makriki foe kon sabi a regtfardiki nâsi, foe di a de a wan-enkri nâsi na grontapoe di e saka ensrefi na ondro Krestes, a Kownoe. So boen, a no de wan pisi foe a grontapoe foe Satan (Johanes 17:16). Foe dati ede, sma sabi den memre foe a nâsi leki sma di ’e tjari densrefi na wan toemoesi boen fasi na mindri den nâsi’. Den e libi na wan fasi di e gi Gado grani (1 Petrus 2:12). Boiti dati, awinsi pe den de na grontapoe, den de wan pisi foe „a gemeente foe a libi Gado, wan stonfoetoe èn wan sani di e horibaka gi a waarheid” (1 Timoteus 3:15). Foe di den e horibaka gi a waarheid, meki den e kakafoetoe gi den heiden filosofia di krestenhèit ben leri èn den e horibaka gi „a merki di no falsi, di de foe a wortoe” — Gado Wortoe, bijbel (1 Petrus 2:2). Moro fara, nanga faja den e preiki a boen njoensoe foe a Kownoekondre „ini a heri mekisani di de na ondro hemel” (Kolosesma 1:23). Iniwan tweifri kan de taki a nâsi disi meki foe denwan di fika foe „na Israèl foe Gado”, a gemeente foe den salfoe kresten? Kwetikweti! — Galasiasma 6:16.
A nâsi gebore
3. Froeteri fa „a regtfardiki nâsi” ben gebore.
3 O ten „a regtfardiki nâsi” ben gebore? Den ben taki na fesi foe a bigin foe en ini a boekoe Jesaja. Na Jesaja 66:7, 8 wi e leisi: „Bifo a [Sion] ben bigin foe kisi pen, a ben meki wan pikin kaba. Bifo en bere ben bigin hati en, a ben meki srefi wan manpikin . . . Sion kisi pen èn a ben meki den manpikin foe en toe.” Wan toemoesi ongewoon sani, Sion, a hemel organisâsi foe Gado, ben de foe meki „wan manpikin” bifo a ben abi pen. Ini 1914 a Mesian Kownoekondre ben meki na ini hemel (Openbaring 12:5). Baka di a manpikin ben gebore, dan moro nanga moro nâsi ben kon abi foe doe nanga a fosi grontapoe feti èn den salfoe kresten ben kisi tranga banawtoe nanga froefolgoe. Te foe kaba, ini a jari 1919, a jeje nâsi, „a manpikin,” ben meki na grontapoe. Na so wan fasi Sion ’ben meki den manpikin foe en’ — den salfoe memre foe a njoen „regtfardiki nâsi — èn den disi ben orga foe doe a preikiwroko di ben tan gro. — Mateus 24:3, 7, 8, 14; 1 Petrus 2:9.
4. Foe san ede a regtfardiki nâsi foe Gado ben abi foe doe foeroe moeiti foe hori en soifri retifasi?
4 Foe sensi a bigin foe en, a nâsi disi toeka nanga tranga tesi foe hori en soifri retifasi. Foe san ede? Di a hemel Kownoekondre ben gebore, dan Satan nanga den ogri jeje foe en ben fringi komoto foe hemel go na grontapoe. Wan tranga sten ben meki bekènti: „Now a froeloesoe nanga a krakti nanga a kownoekondre foe wi Gado nanga a makti foe en Krestes kon, bikasi a kragiman foe den brada foe wi, di e kragi den na wi Gado fesi dei nanga neti, ben fringi go na gron! Èn den wini en nanga jepi foe a broedoe foe a Pikin Skapoe èn nanga jepi foe a wortoe foe a kotoigi di den e gi, èn den no ben lobi den sili foe den, srefi te den e tanapoe na fesi dede.” Di a situwâsi ben kenki, dan Satan ben handri nanga bigi atibron, „èn a ben opo foe feti nanga denwan foe a siri [foe na oema] di tan abra, di e hori den komando foe Gado èn di abi a wroko foe e gi kotoigi foe Jesus”. Den salfoe kresten ben tanapoe steifi, ala di den ben tanapoe na fesi a toemoesi ogri-ati feti di Satan ben e opo feti nanga den. Te na a dei foe tide, den fajafaja memre foe Gado en regtfardiki nâsi, e sori bribi na ini a broedoe foe Jesus di e loesoe sma èn den e tan go doro foe gi Jehovah wan piki na tapoe den kragi foe a bigi kragiman, foe di den e hori den soifri retifasi „srefi te den e tanapoe na fesi dede”. — Openbaring 12:1, 5, 9-12, 17; Odo 27:11.
5. Sortoe toemoesi boen fasi fa den disiten Kotoigi tjari densrefi jepi den foe hori den soifri retifasi?
5 Ini 1919, di a disiten gi foe kotoigi foe Gado Kownoekondre ben bigin, den Bijbel Ondrosoekoeman, so leki fa den ben kari den Kotoigi foe Jehovah na a ten dati, ben de pikinso nomo, ma den ben abi wan tranga bribi. Den ben tron memre di de stonfoetoe foe ’a tranga foto, nanga froeloesoe di poti gi den skotoe nanga dam’. Den ben froetrow tapoe „Jah, Jehovah [di] de a klipston te ten di no abi skotoe” (Jesaja 26:1, 3, 4). Neleki Moses foe owroeten, den ben meki bekènti: „Mi sa bari kari a nen foe Jehovah. Froeteri foe a granfasi foe wi Gado! A Stonbergi, a wroko foe en de volmaakti, bika ala den pasi foe en na geregtighèit. Wan Gado foe getrowfasi di no abi kroektoedoe; regtfardiki èn opregti a de.” — Deuteronomium 32:3, 4.
6. Na sortoe fasi Jehovah blesi a pipel foe en ini den lasti dei disi?
6 Foe sensi a ten dati, den doro foe den sani di Gado Kownoekondre seti, tan opo bradi gi ala pipel. Na a fosi presi, denwan foe den 144.000 salfoe kresten di tan abra, ben tjari kon makandra èn now wan bigi ipi foe „tra skapoe” e moksi densrefi nanga den, foe meki den Kownoekondre prakseri foe Jehovah bekènti (Johanes 10:16). Foe dati ede, nanga prisiri wi kan meki bekènti: „Joe meki a nâsi kon moro bigi; O Jehovah, joe meki a nâsi kon moro bigi; joe gi joesrefi glori. Joe meki ala den grens foe a kondre kon moro bradi” (Jesaja 26:15). Te wi e loekoe a veld foe a grontapoe moro fini ini a ten disi, dan wi e si o troe den wortoe disi de srefisrefi! A kotoigi di gi foe Krestes en Kownoekondre di de na pasi e kon, gi nanga jepi foe a krakti foe a santa jeje „na den moro farawe kontren foe grontapoe” (Tori foe den Apostel 1:8). Efoe wi wani si o bigi a gro ben de, dan wi kan loekoe a Raport foe a Dienstjari 1994 foe den Kotoigi foe Jehovah na heri grontapoe, di de foe si tapoe den bladzijde 12 te go miti 15.
Wan njoen heimarki foe preikiman
7, 8. (a) Sortoe boeweisi de taki a pipel foe Gado ’langa den titei foe a tenti foe den’? (b) Na tapoe sortoe kontren joe e si taki den ’ben e bradi den grens foe den’ na wan toemoesi boen fasi, te joe e loekoe a Raport foe a Dienstjari 1994?
7 Loekoe wan toe foe den heimarki foe a raport disi. A heimarki foe Kownoekondre preikiman ini a veld ben doro 4.914.094! A e naki sma ati srefisrefi foe si a doronomo tjari kon na wan foe a „bigi ipi . . . foe ala nâsi nanga lo nanga pipel nanga tongo di e tanapoe na fesi a kownoestoeroe èn na fesi a Pikin Skapoe, èn den weri weti tapoesei krosi!” Ija, denwan disi boeweisi toe, taki den de sma di e hori den soifri retifasi. „Den wasi den tapoesei krosi foe den èn den meki den weti ini a broedoe foe a Pikin Skapoe”, èn den e si den leki regtfardiki sma, foe di den e sori bribi ini a froeloesoe ofrandi foe Jesus. — Openbaring 7:9, 14.
8 Spesroetoe sensi 1919, a komando tjari abra go na Jehovah en organisâsi: „Meki a presi foe a tenti foe joe kon moro bradi. Èn meki den bradi den krosi foe a tenti foe a bigi tabernakel foe joe. No hori na baka. Langa den titei foe a tenti foe joe, èn meki den spikri foe den tenti foe joe moro tranga” (Jesaja 54:2). Foe di den gi jesi na dati, meki a preikiwroko e tan go doro sondro foe go na baka, srefi ini a kowroe Yukon, di e didon sei Alaska, pe wan groepoe foe pionier de, di man horidoro na ondro moeilek situwâsi. Den horidoro na ondro temparatuur di kan saka go doro -45° te go miti -50° Celcius foeroe wiki langa. Ini den jari no so langa pasa, ipi-ipi sma e kon makandra moro nanga moro èn moro esi, go na a nâsi foe Jehovah di e hori den soifri retifasi. Den doro opo moro bradi foe teki denwan disi foe den Asia kondre di no de wan pisi foe krestenhèit, foe kondre di fosi ben de ondro Komunist tiri, foe foeroe Afrikan kondre èn foe kondre pe a Lomsoe kerki abi foeroe makti, so leki Italia, Spanjorokondre, Portugal, nanga Zuid-Amerika. Den sma di den ben dwengi foe gowe libi den kondre go na wan tra presi, ben opo a veld ini gebied pe sma e taki tra tongo. Na Ingrisikondre foe eksempre, den Kotoigi e sorgoe gi den fanowdoe foe sma foe 13 ras di e taki tra tongo.
„Tan doe disi”
9. (a) San a nomroe foe sma di fisiti a Memrefesa foe 1994 e sori? (b) San na wan toe kondre pe a nomroe foe fisitiman foe a Memrefesa, ben de wan aparti sani?
9 Wan tra heimarki foe a jari-raport na a nomroe foe sma di ben fisiti a Memrefesa. Leti bifo Jesus dede, a ben seti a Memrefesa foe en dede, èn a ben taigi den bakaman foe en: „Tan doe disi foe memre mi” (1 Korentesma 11:24). A ben naki wi ati srefisrefi foe si taki ini 1994, 12.288.917 sma — toetron moro leki a nomroe foe aktief preikiman — kon makandra foe di den gi jesi na a komando dati, leki sma di e njan na a fesa noso leki sma di e arki èn e loekoe. Ini wan toe kondre, a nomroe foe fisitiman foe a Memrefesa de moro hei srefi leki a nomroe foe preikiman ini den kondre dati. Den 4049 preikiman na Estonia, Latfia, nanga Litoewania ben breiti foe di den ben abi 12.876 sma di ben fisiti a Memrefesa, di de moro leki dritron a nomroe foe preikiman. Èn na Benin, den 16.786 fisitiman foe a Memrefesa ben de pikinmoro feifitron a nomroe foe den preikiman. Wán gemeente di abi wan sani foe 45 preikiman, ben abi 831 sma di ben fisiti a Memrefesa!
10. (a) Sortoe frantiwortoe a bigi nomroe foe sma di ben fisiti a Memrefesa e poti na wi tapoe? (b) Froeteri san kan pasa te wan sma di ben fisiti a Memrefesa e kisi moro jepi.
10 Den Kotoigi foe Jehovah breiti foe di someni sma di abi belangstelling ben kon makandra nanga den na tapoe na okasi dati, di e foeroe wi nanga froewakti foe den sani di sa pasa na a ten di e kon. Now den wani foe jepi den sma disi foe gro ini a froestan di den e froestan èn a lobi di den lobi a waarheid. Kande wan toe sma sa handri neleki fa Alla ben doe na Rosiakondre. Alla ben e studeri nanga wan sisa di ben de wan spesroetoe pionier, ma Alla ben go pikinso nomo na fesi. Foe dati ede a studie ben stop. Tokoe, Alla ben teki a kari foe fisiti a Memrefesa. A konmakandra dati, di wani taki foeroe, ben naki en ati srefisrefi. Di na oema disi ben doro na oso, a ben trowe ala den popki foe en èn a ben begi Jehovah foe kisi jepi. Toe dei baka dati, a pionier sisa ben fisiti Alla foe kon sabi na sortoe fasi Alla ben njanboen foe a Memrefesa. Den ben bigin wan takimakandra di ben abi boen bakapisi. Alla ben bigin baka nanga wan bijbelstudie. No so langa na baka, a ben abi wan prati ini a kotoigi wroko. Na ondrofenitori disi e sori a waarde foe meki gobaka na denwan di ben fisiti a Memrefesa. Kande foeroe sma sa handri neleki fa Alla ben handri.
„No libi den konmakandra foe wi”
11-13. (a) San de toe ini a getrowfasi fa a regtfardiki nâsi e tjari ensrefi? (b) Foe san ede a de fanowdoe taki troe kresten e fisiti den konmakandra?
11 A Memrefesa na a moro prenspari konmakandra na tapoe a schema foe den Kotoigi foe Jehovah, ma a no de srefisrefi a wan-enkriwan. Ibri Jehovah Kotoigi e kon makandra foe di den e gi jesi na den wortoe foe na apostel Paulus: „Meki wi poti prakseri na tapoe makandra foe gi makandra deki-ati foe sori lobi èn toemoesi boen wroko, ala di wi no e libi den konmakandra foe wi, so leki fa son wan abi a gwenti, ma e gi makandra deki-ati, èn dati moro foeroe, te joe e si a dei e kon moro krosibei” (Hebrewsma 10:24, 25). Den de makandra nanga a regtfardiki nâsi foe Jehovah, di sma kon sabi foe a getrowfasi fa den e tjari densrefi. A getrowfasi foe tjari wisrefi abi na ini toe a fisiti di wi e fisiti den konmakandra na wan getrowfasi.
12 So leki fa a sori dan den e froestan disi boen na Filipinas, pe a gemiddelde foe fisitiman na den konmakandra tapoe sonde ini a heri kondre, de 125 procent foe a nomroe foe den preikiman. Wan groepoe foe Kotoigi èn sma di abi belangstelling ini Argentinia e froestan disi boen toe. Den e libi sowan 20 km foe a Kownoekondrezaal. Tokoe, a kring-opziener e froeteri taki, boiti efoe siki de ini a tori, nowan foe den noiti e misi den konmakandra. Fo joeroe langa den e rèis nanga wan sortoe asi wagi, noso na tapoe asi, èn na ini winter den e waka a srefi pasi disi go na oso ini a doengroe foe a neti.
13 Ala di a kaba foe a seti disi e kon moro krosibei, a libi e kon moro tranga, èn a e kon moro moeilek foe fisiti den konmakandra na wan doronomo fasi. Ma na ondro den sortoe situwâsi disi, a de moro fanowdoe gi wi leki oiti wan ten bifo, foe kisi jeje njanjan èn a waran demakandra di wi kan feni soso na den sortoe konmakandra disi.
„Doe en leki wan tranga fanowdoe afersi”
14. Foe san ede den Jehovah Kotoigi sabi taki a diniwroko foe den de tranga fanowdoe, èn sortoe bakapisi e sori disi?
14 A jari di pasa, a Lomsoe Kerki na ini Italia ben taki foe a wroko foe den Jehovah Kotoigi leki „wan krasi èn grofoe fasi foe dwengi sma foe kon abra na a bribi foe den”. Ma troetroe, no wan sani foe a diniwroko di den Kotoigi e doe, den e doe na wan krasi èn grofoe fasi. Na presi foe dati, a diniwroko foe den na wan fasi fa den e sori a dipi lobi di den abi gi den sma na den sei. A de wan boeweisi toe foe a gi di den e gi jesi na den wortoe foe Paulus: „Preiki a wortoe, doe en leki wan tranga fanowdoe afersi, ini boen ten, èn ini moeilek ten” (2 Timoteus 4:2). Foe di den sabi taki a de tranga fanowdoe, meki dati e boeweigi den Jehovah Kotoigi foe de fajafaja ini a diniwroko foe den, so leki fa wi kan si dati ini den 1.096.065.354 joeroe di den ben e gebroiki ala nanga ala ini 1994 di den ben e preiki na den birtisma, e meki gobaka, èn e hori 4.701.357 bijbelstudie. Foeroe foe den ben man abi wan prati na a pionierwroko, èn dati e sori taki a jeje foe go pionier de fajafaja. A gemiddelde foe 636.202 pionier na heri grontapoe e boeweisi disi.
15, 16. (a) Na sortoe fasi jongoewan nanga owroewan ben sori taki den abi a jeje foe pionier? (b) Pe joe e si toemoesi boen nomroe foe pionier, te joe e loekoe ibri kondre aparti ini a Raport foe a Dienstjari 1994?
15 Na mindri den pionier dati, foeroe tini de. Wan toe foe den na ini Verenigde Staten, e wroko now leki gewoon pionier ala di den de na Mulo nanga Middelbare skoro ete. A moro prenspari gebied foe den di den e wroko, na den skoro mati foe den ini klas. Den jongoewan disi kon si taki a pionierwroko na a moro boen fasi foe kibri densrefi teige drug, hoeroedoe, nanga ogridoe di de foe si na foeroe foe den skoro ini a kondre dati. Foeroe tra jongoewan abi a pionierwroko leki a marki foe den te den kaba nanga skoro. Irina, na Oekraine, ben de ini a jepi-pionierwroko na a ten di a ben de na Mulo nanga Middelbare skoro, so taki a kan sreka ensrefi foe doe pionierwroko baka te a slaag foe skoro. Di a ben kaba nanga skoro, en oso famiri ben gi densrefi foe jepi en na moni sei, so taki a ben kan teki presi gi na osofamiri foe en ini a gewoon pionierwroko. Sani no makriki na ekonomia sei na ini Oekraine. Ma Irina e taki: „Mi sabi taki mi e doe wan wroko di wani taki libi, no soso gi mi, ma so srefi gi denwan gi soema mi e preiki.” A de troetroe wan prisiri sani foe si taki so foeroe jongoewan e denki leki Irina ini a ten disi. Sortoe moro boen fasi de gi den foe ’prakseri a Gran Mekiman foe den ini den jongoe jari foe den leki mansma nanga oemasma’? — Preikiman 12:1.
16 Foeroe pionier kon owroe ini jari kaba. Wán foe den, di de wan sisa, e froeteri taki na a ten foe a di foe toe grontapoe feti, a papa èn a brada foe en ben lasi den libi foe den di den ben feti na ini a feti, èn sma ben soetoe en mama nanga en sisa na ini wan pôti birti. Baka ten, a manpikin foe en ben dede. Now, di a e kon moro owroe èn e go na baka na froestan nanga na skin sei, èn e pina na ondro wan takroe gosontoe, dan Jehovah gi en, na ini a kresten gemeente, wan moro bigi osofamiri leki a wan di a ben lasi. Èn a e feni prisiri foe di leki wan gewoon pionier a e jepi trawan.
17, 18. Fa ibriwan foe wi kan sori a jeje foe go pionier, awinsi wi e pionier efoe no?
17 A no de foe taki, dati a no ala sma kan de wan pionier. Nanga prisiri Jehovah e teki ala di foe tin pisi foe wi, a moro boen sani di wi kan gi, awinsi san disi de gi ibriwan foe wi persoonlijk (Maleaki 3:10, foetoewortoe). Foe troe, wi alamala kan kweki a jeje disi foe pionier, di den fajafaja pionier disi abi, èn foe doe ala san a situwâsi foe wi e gi pasi foe dati, foe meki a preikiwroko foe a boen njoensoe go na fesi.
18 Foe eksempre, na ini Australia, den ben poti 16 april leki wan spesroetoe dei foe doe strati kotoigiwroko. Preikiman èn so srefi pionier ben horibaka boen gi dati, so leki fa dati de foe si ini a njoen heimarki foe 58.780 preikiman a moen dati. Boiti dati, den ben prati 90.000 tijdschrift moro leki a jari di pasa ini a srefi moen dati. Na tapoe a spesroetoe dei dati, wan sisa ben libi tijdschrift na wan man, èn di a ben e skrifi a nen èn a tanpresi foe a man foe go baka foe di a man ben sori belangstelling, a ben kon sabi taki en nanga a man na famiri! A ben de so taki a man ben de wan manpikin foe a moro owroe sisa foe a mama foe a preikiman, èn den no ben si makandra 30 jari langa. Foe troe, dati ben opo na okasi foe meki wan toe prisiri gobaka!
Hori a soifri retifasi te na a kaba
19. Foe san ede a de tranga fanowdoe taki a regtfardiki nâsi foe Jehovah e tan hori en soifri retifasi te na a kaba?
19 A de tranga fanowdoe taki ala sma ini Gado en regtfardiki nâsi e hori den soifri retifasi now di a grontapoe foe Satan e kon na wan kaba. Heri esi, a santa nâsi foe Jehovah sa jere a kari: „Go, mi pipel, go na ini den inisei kamra foe oenoe, èn tapoe den doro foe oenoe na oen baka. Kibri oensrefi gi wan momenti nomo, teleki a kroetoe di de krin foe si pasa.” A grontapoe disi di abi broedoe paiman, seiker sa abi foe tanapoe na fesi a kroetoe foe Gado. „Bika, loekoe! Jehovah e komoto na a presi foe en foe aksi frantiwortoe foe a sma di ben meki fowtoe teige en, èn di e tan ini a kondre, èn seiker a kondre sa poeroe a broedoe di a ben trowe, kon na doro, èn a no sa tapoe den sma moro, di a ben kiri” (Jesaja 26:20, 21). Meki a de so taki ibriwan foe wi e tanapoe steifi leki wan kresten di e hori en soifri retifasi di de makandra nanga a regtfardiki nâsi foe Jehovah. Dan wi sa prisiri foe kisi a têgo libi ini a kontren foe a Kownoekondre foe Krestes na grontapoe noso na hemel.
Joe e memre disi ete?
◻ O ten „a regtfardiki nâsi” ben gebore?
◻ Foe san ede a de fanowdoe taki a pipel foe Gado e horidoro ini den lasti dei disi?
◻ San a bigi nomroe foe preikiman nanga a nomroe foe joeroe di den gebroiki ini a diniwroko e sori, so leki fa dati de foe si ini a Raport foe a Dienstjari 1994?
◻ Foe san ede a de so prenspari foe fisiti den konmakandra, now di a grontapoe disi e kon moro krosibei foe a kaba foe en?
◻ Foe san ede ala sma di de makandra nanga a regtfardiki nâsi foe Gado, moesoe hori den soifri retifasi?
[Raportoe na tapoe bladzijde 12-15]
1994 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 18]
Denwan ini Jehovah en regtfardiki nâsi di e hori den soifri retifasi sa kisi volmaakti libi foe têgo