Aksi foe leisiman

San bijbel e sori ini a tori foe dedestrafoe gi ogriman?

Wi kan froestan taki, ibriwan foe wi ben sa kan abi en eigi persoonlijk firi foe a tori disi, di gron na tapoe wi eigi ondrofeni noso a situwâsi foe wi na ini a libi. Tokoe, leki Jehovah Kotoigi, wi moesoe proeberi foe abi a srefi prakseri leki Gado na ini a tori foe dedestrafoe, ala di wi e tan neutraal na ini den politiek denki di sma abi na ini na afersi disi.

Foe taki en soifri, na ini en Wortoe di skrifi, Gado no e sori taki dedestrafoe na wan fowtoe sani.

Boen froekoe kaba na ini a libisma historia, Jehovah ben taki fa a e prakseri foe na afersi disi, soleki fa wi e leisi na ini Genesis kapitel 9. Disi ben abi foe doe nanga Noa nanga en osofamiri, di ben kon tron afo foe a heri libisma famiri. Baka di den ben komoto na a ark, Gado ben taki dati den ben kan njan meti — dati wani taki, dati den ben kan kiri meti, poeroe a broedoe foe den, èn njan den. Baka dati, na Genesis 9:5, 6, Gado ben taki: „Boiti dati, a broedoe foe oen sili mi sa aksi baka. Mi sa aksi en baka foe na anoe foe ibri kriatoeroe di e libi; èn foe na anoe foe libisma, foe na anoe foe ibriwan sma di de en brada, mi sa aksi baka a sili foe libisma. Iniwan sma di e trowe libisma broedoe, sma sa trowe en broedoe, bika na a prenki foe en, Gado ben meki libisma.” So boen, Jehovah ben gi sma a reti foe gi a dedestrafoe na kiriman.

Ala di Gado ben handri nanga Israèl leki en pipel, sma ben kisi dedestrafoe gi difrenti tra serjoesoe sondoe teige a wet foe Gado. Na Numeri 15:30, wi e leisi den algemeen wortoe disi: „A sili di e doe wan sani foe espresi, awansi a de wan sma di gebore djaso noso wan doroseisma di e libi djaso, foe di a e skempi Jehovah, ini a kefal dati a sili dati moesoe koti poeroe na mindri en pipel.”

Ma fa a de baka di a kresten gemeente ben seti? We, wi sabi taki Jehovah ben gi den libisma tirimakti a reti foe de, èn a ben kari den, den hei tirimakti. Te joe loekoe en boen, baka di bijbel ben gi kresten a rai foe gi jesi na den tirimakti disi, bijbel e taki dati den e dini leki „Gado en bedinari gi oenoe, foe oen boen ede. Ma efoe oenoe e doe san takroe, dan abi frede: bika a no foe soso a e tjari a feti-owroe; bika a de Gado en bedinari, wan sma di e teki refensi foe tjari atibron kon na tapoe a sma di e doe san takroe.” — Romesma 13:1-4.

Dati wani taki dati den tirimakti kisi a makti srefi foe kiri den wan di e doe serjoesoe ogridoe? Foe den wortoe na ini 1 Petrus 4:15, wi ben sa kan taki, ija. Na ini a pisi dati na apostel ben froemane den brada foe en: „No meki no wan foe oenoe pina leki wan kiriman noso wan foefoeroeman noso wan ogriman noso leki wan sma di e boemoei nanga tra sma tori.” Joe ben si dati a e taki, „no meki no wan foe oenoe pina leki wan kiriman”? Petrus no ben gi a prakseri taki den tirimakti no ben abi a reti foe meki wan kiriman pina foe na ogridoe foe en. Kontrari foe dati, a ben sori taki nanga reti wan kiriman ben sa kan kisi strafoe di a e froedini. Dati ben sa wani taki toe taki a ben kan kisi a dedestrafoe?

A kan. Disi de krin foe si na ini den wortoe foe Paulus di de foe feni na ini Tori foe den Apostel kapitel 25. Den djoe ben kroetoe Paulus taki a ben sondoe teige a wet. A sroedati komandanti di ben seni en strafoeman, Paulus, go na a tiriman foe Rome, ben taki soleki fa Tori foe den Apostel 23:29, taki: „Mi ben kon si taki den ben kragi en foe tori na ini Wet foe den, ma den no kragi en foe no wan sani di e froedini dede noso boei.” Na baka toe jari, Paulus ben kon doro na fesi Tiriman Festus. Wi e leisi ini na Tori foe den Apostel 25:8: „Paulus ben opo taki gi ensrefi taki: ’No na a Wet foe den djoe, no na a tempel, no na caesar mi doe wan sondoe.’” Ma poti prakseri now na tapoe den sani di a e taki di abi foe doe nanga strafoe, srefi dedestrafoe. Wi e leisi na Tori foe den Apostel 25:10, 11:

„Paulus ben taki: ’Mi e tanapoe na fesi a kroetoestoeroe foe caesar, pe mi moesoe kisi kroetoe. Mi no doe no wan ogri teige den djoe, soleki fa joesrefi e si heri boen. Ma efoe mi de wan ogriman troetroe èn doe wan sani di mi moesoe dede foe dati, dan mi no e aksi foe poeroe mi foe dede; ma efoe no wan foe den sani de troe, di den [man] disi taki mi doe, dan no wan sma kan gi mi abra na den, foe feni boen na a fasi dati. Mi e aksi a jepi foe caesar!’”

Paulus, di ben e tanapoe na fesi tirimakti di ben poti na wan joisti fasi, ben erken taki caesar ben abi a reti foe strafoe sma di doe ogri, srefi foe kiri den. A no ben weigri foe kisi strafoe ini a kefal foe en efoe a ben fowtoe. Boiti dati, a no ben taki dati Caesar ben kan gebroiki dedestrafoe soso gi kiriman.

Wi moesoe erken taki a kroetoe sistema foe Rome no ben de volmaakti; èn na so libisma kroetoe sistema no de volmaakti na ini a ten disi. Wan toe sma na ini a ten dati èn na ini a ten disi, di no ben fowtoe, kisi kroetoe èn kisi strafoe. Srefi Pilatus ben taki foe Jesus: „Mi no ben feni no wan sani na en di e meki a froedini dede; foe dati ede mi sa fon en èn mi sa loesoe en.” Ija, ala di a tirimakti foe lanti ben erken taki Jesus no ben fowtoe, tokoe den ben kiri a man disi di no ben abi fowtoe. — Lukas 23:22-25.

Den sortoe kroektoedoe disi no ben meki Paulus noso Petrus ben kroetoe taki a dedestrafoe na wan sani di no de akroederi boen gwenti nanga wet srefisrefi. Na presi foe dati, a fasi fa Gado e prakseri foe na afersi, na taki so langa leki den hei tirimakti foe Caesar de, den ’e tjari a feti-owroe foe tjari atibron na tapoe den sma di e doe san takroe’. Dati wani taki toe dati den kan gebroiki a feti-owroe toe na wan fasi foe gi dedestrafoe. Ma efoe a abi foe doe nanga a strei aksi efoe iniwan tiri foe a grontapoe disi moesoe gebroiki en reti foe kiri kiriman, dan troetroe kresten e doe ala moeiti foe tan neutraal. Tra fasi leki den kerki tiriman foe krestenhèit, den no e teki prati na iniwan haritaki foe a tori disi.