Pristeri na boen njoensoe — Nanga tijdschrift ini kontren di wroko foeroetron kaba
1 Ini Tori foe den Apostel 8:25, wi e leisi taki Petrus nanga Johanes ben e gi dorodoro kotoigi na ini Samria èn baka dati ‘ben e meki a boen njoensoe bekènti na foeroe dorpoe’. Ini a ten disi wi toe moesoe wroko fajafaja ini a kontren di a gemeente foe wi kisi foe wroko, so taki a preikiwroko e doe dorodoro.
2 Foe di na nomroe foe preikiman e gro esi, meki foeroe gemeente e wroko den kontren foeroetron now. Ala di biginbigin oenoe no ben de so positief foe wroko den kontren so foeroe, tokoe reide no de foe disi. Nanga ala uitgave foe Na Waktitoren nanga Ontwaakt! ala ten njoen èn moi tori de di wi kan prati nanga den sma ini wi kontren. Now di wi e wroko wi kontren moro foeroe, wi abi boiti dati na okasi foe gi a ekstra ten na ala doro.
ABI WAN TAKIMAKANDRA NANGA DEN SMA
3 Troetroe sjatoe tijdschrift pristeri ben gebroiki foe wroko na heri kontren foe wi èn foe prati den tijdschrift na ala sei. Ma preikiman di e preiki ini den kontren di wroko foeroe tron, seiker kan teki moro ten foe abi wan takimakandra nanga den oso sma. Srefi jongoe pikin kan taki pikinso moro foe san den ben feni moi ini wan artikel. Fa disi kan doe? A de wan troetroe prenspari sani foe sabi san tanapoe na ini den tijdschriftartikel. Joe moesoe gi ten na disi èn prakseri foe en na fesi. Te joe e leisi den tijdschrift, dan loekoe san sa hari a parkseri foe den sma ini joe kontren. Bifosi joe go ini a dienst, dan loekoe den tijdschrift èn poeroe den tori na ini di joe sa taki foe den. Loekoe sortoe tori joe sa gebroiki ini den difrenti situwâsi di joe kan miti na den doro. Gebroiki wan foe den toemoesi moi tori ini wan foe den tijdschrift leki wan mamapenti ini joe inleiding. Proeberi, nanga jepi foe wan switi takimakandra, foe meki na oso sma kan taki san a e denki. Pristeri den tijdschrift pe sma e sori belangstelling.
HORI WI MARKI INI PRAKSERI
4 Wi no e go oso-foe-oso foe prati so foeroe tijdschrift ofoe boekoe leki a kan. A de wi winsi foe jepi trawan foe kisi soifri sabi foe na waarheid. Petrus nanga Johanes ben e taki finifini foe a wortoe foe Jehovah nanga den Samaria sma èn wi toe wani gi nofo ten foe gi sma ini wi kontren na okasi foe piki boen tapoe na waarheid.
5 Wi kan doro na marki disi te wi e gebroiki den tijdschrift nanga boen bakapisi leki gron foe wi takimakandra nanga sma. Meki wi begi gi wisrefi èn gi trawan taki ‘wi mag kisi na koni foe taki, foe meki na santa kibritori foe a boen njoensoe bekènti fri èn sondro frede’. — Ef. 6:18-20.