Teki na frantiwortoe foe tjari gobaka
1 Foeroe reide di e poesoe wi de foe teki prati so foeroe leki a kan ini a tjari foe gobaka. Wi wani kaba a wroko di oenoe ben kisi foe doe dorodoro neleki fa Paulus ben doe (Tori. 20:21, 24). Efoe wi de serjoesoe foe gobaka na ala sma di abi belangstelling, dan wi sa hori wan boen konsensi ala di wi e proeberi foe doe wi diniwroko dorodoro.—2 Tim. 4:5.
2 Sabi e meki wi abi frantiwortoe: Na troe tori taki sma kan lasi den libi, moesoe boeweigi wi foe de fajafaja ini a tjari foe gobaka (Joh. 17:3). A sabi di wi abi foe na kroetoe foe Jehovah èn taki Armagedon de krosibei, moesoe gi wi deki-ati foe no warskow den ogriwan soso, ma so srefi foe jepi den di e ‘geme èn e soktoe foe den tegoe sani di e pasa na grontapoe’ (Eseik. 9:4). A de fanowdoe foe wi tjari den kon makandra nanga Jehovah en organisâsi di de foe si.
3 Sma abi jepi fanowdoe foe kon sabi na waarheid soifri (Tori. 8:30, 31; 18:26). Disi na wan tra reide foe wi foe teki wi frantiwortoe foe gobaka èn gi „watra” na den siri foe waarheid di wi ben sai. Omeni wisrefi ben o go a fesi na jejefasi efoe wan sma no ben tan kon ibri tron baka na wi foe jepi wi foe kisi soifri sabi foe Jehovah nanga En pramisi di de toemoesi moi?—Mat. 7:12.
4 Sori lobi èn faja: Tjari gobaka na wan toemoesi boen fasi foe sori wi lobi gi libisma. Wan breni brada di e dini leki wan gewoon pionier ben taki: „Sensi mi dopoe, mi ben winsi ala ten foe froeteri trawan foe san mi ben leri na ini bijbel. Mi ben breiti taki na malengrifasi foe mi, no ben tapoe mi foe e doe disi. . . . Mi leri so srefi foe memre ibri oso ini a strati, èn na a fasi disi, mi ben man foe tjari gobaka na sma di ben abi belangstelling gi wan bijbelstudie.” A breni brada disi, troetroe man si nanga en ati, èn a no e tapoe foe tjari gobaka èn sori en kresten lobi gi trawan.
5 Te wi e tjari gobaka, wi abi ala ten na okasi foe meki boen gebroiki foe a bijbel èn gi reide foe na howpoe ini wi (1 Petr. 3:15). Disi no e jepi na ososma wawan, ma so toe a e gi wi moro faja èn warderi gi na waarheid. Tjari gobaka e tjari wan prisiri di joe no kan feni na no wan tra fasi. Èn a eigifasi foe a prisiri no e saka noiti. Wi kan meki en njoen ala joeroe baka nanga a tjari foe gobaka na wan fajafasi.—Odo 10:22.
6 Wi moesoe teki wi frantiwortoe foe tjari gobaka serjoesoe. Jehovah pipel no e hori na baka san boen gi trawan, èn wi kan si disi na den aktiviteit foe wi gi na dienstjari 1991 na heri grontapoe (Odo 3:27). Wi ben meki 344.926.952 gobaka èn wi ben hori 3.947.261 oso-bijbelstudie. Dan joe ben abi 300.945 njoen disipel di ben gi densrefi abra na Jehovah èn di ben teki dopoe. Wi no ben sa doro na toemoesi moi gro disi noiti, efoe a no ben de taki wi ben wani foe teki na frantiwortoe foe tjari gobaka.—1 Tes. 2:8.