A gro di e go doro nomonomo e meki a fanowdoe foe Kownoekondrezaal moro bigi
1 Langa ten pasa kaba Jehovah profeiti ben froeteri na fesi taki „den sani foe ala den nâsi di sma wani sote moesoe tjari kon na ini” (Hag. 2:7). Seiker wi e si den boeweisi fa a leri foe Gado e meki taki a kan dati bigi groepoe sma e leri a waarheid èn kon tron anbegiman foe Jehovah. Fa a e naki wi ati foe si taki 83 sma ben teki dopoe ini Sranan ini a dienstjari 1993 èn na a kongres makandra ben de 75. Foe tan jepi ala den njoenwan disi, a de fanowdoe foe wi ’poti wi ati tapoe den pasi foe wi’ foe kan de seiker taki wi e horibaka gi a wroko foe Gado so foeroe leki a kan. (Teki gersi Hag. 1:5.) Ija, wan prenspari pisi foe a hori di wi e horibaka gi a wroko foe Gado na foe go doro foe jepi foe sorgoe gi oso di fiti gi anbegi gi den ipi-ipi njoen sma di e prèise Jehovah.
2 A ben de wan toemoesi prisiri sani foe si taki ini Sranan toe difrenti zaal ben bow ini den jari di pasa. Flora, Geyersvlijt, Gosoetoe, Lelydorp, Meerzorg, Nickerie, èn Onverdacht, abi moi zaal, èn meki wi no frigiti a Kongreshal nanga a meki kon boen baka foe difrenti tra zaal. Di foe Pont Buiten no kaba ete, èn tra plan de kaba di de foe meki ete.
3 Kisi jepi foe Bowkomte: A Bowkomte ini Sranan e jepi den owroeman di abi foe doe nanga bow-wroko di abi foe doe nanga njoen Kownoekondrezaal nanga projekt foe meki sani kon boen baka. A e jepi foe bepaal a fanowdoe foe wan njoen Kownoekondrezaal noso wan projekt foe kenki a model èn e gi jepi foe dorosei di de fanowdoe na bigin foe a ten fosi den bai wan gron te leki a Kownoekondrezaal kaba bow.
4 Foeroe sma di wani wroko leki friwani wrokoman ben gi densrefi foe abi prati na ini a wroko foe meki den Kownoekondrezaal kon boen baka èn bow njoen wan. Den friwani wrokoman disi, di abi na ini foeroe bekwaamman nanga vakman, e gi den ten nanga den krakti na wan fri fasi foe doe den sani so leki, a bai foe gron, a aksi na lanti foe gi primisi, a meki foe wan tekening foe a fasi fa na oso sa de èn a meki foe lijst foe materiaal di moesoe bai. Den e jepi so srefi nanga a bai foe kwaliteit-materiaal gi wan boen prijs, a jepi nanga a wroko di moesoe doe na fesi na a presi pe den sa bow èn a teki fesi ini a bow-wroko srefi. A gi di den e gi sani nanga den heri ati, gi Kownoekondre afersi de foe prèise toemoesi èn disi e tjari foeroe blesi foe Jehovah kon.— Odo 11:25.
5 Den owroeman moesoe taki nanga a bowkomte te a gemeente foe den e bigin prakseri foe meki wan Kownoekondrezaal di de kaba, kon boen baka noso foe bow wan njoen wan. Foe san ede? A komte abi markitiki di kan jepi den gemeente te den e bigin prakseri foe bow. A loekoe foe wan presi foe bow abi foe doe nanga foeroe sani boiti a moni foe pai a pisi gron. Tra sani kan meki den troetroe kostoe foe a pisi gron kon moro foeroe, so leki a meki klari foe a gron di abi foeroe wroko, a poeroe foe kefarlek sani noso sani di abi fergif, noso den afersi di abi foe doe nanga wet. Efoe wan gemeente abi jepi fanowdoe foe a Genootschap na moni sei, dan a komte di abi formulier kan jepi den owroeman foe a gemeente foe kaba skrifi sani na tapoe.
6 A Genootschap ben gi a bowkomte tekening leki idea foe a gron foe Kownoekondrezaal. Gemeente owroeman moesoe taki nanga a komte èn taki makandra foe a heri bowplan, bifo den o teki wan model, ala di den e gebroiki den tekening di a Genootschap gi leki wan idea. Boiti taki den kostoe foe a bowprojekt no sa de so hei, a fasi disi sa jepi a gemeente toe foe meki wan oso di de bescheiden èn di boen foe gebroiki.
7 Den moesoe hori wan soifri èn finifini raport foe ala moni afersi. Brada di abi sabi foe sani ben gi densrefi nanga friwani foe wroko makandra nanga a komte, foe jepi den gemeente nanga a fanowdoe foe meki wan boekhoud-sistema èn hori dati na a heri bowprojekt. Tra brada di e wroko makandra nanga a bowkomte e jepi den gemeente nanga a gi piki tapoe na aksilijst di e taki foe a leni foe moni. Disi de wan bigi jepi, foe di den owroeman foe den gemeente srefi no abi a gwenti foe wroko nanga den sortoe raport foe moni afersi dati ini a tori foe a bow foe Kownoekondrezaal so leki den brada disi di abi ondrofeni èn di kisi boen skoro ini a afersi disi. Te a wroko kaba, a komte moesoe kisi wan kopi foe a heri raport foe den moni afersi foe a projekt.
8 A e naki na ati foe sma di e si dati: A krinkrin boeweisi taki Jehovah en santa jeje e wroko na tapoe den brada di e wroko na den Kownoekondrezaal bowprojekt, e dini leki wan kotoigi gi trawan. Den ben bai den materiaal foe wan zaal na wan presi na Amerkankondre pe den e seri oedoe èn baka ten a driktoro ben skrifi: „Mi no kan memre wan ten taki wan groepoe sma ben naki mi ati so, leki a de a kefal nanga Jehovah Kotoigi di den ben wroko na a projekt foe den. Gi mi a ben de wan prisiri sani nanga wan sani di ben naki mi ati foe de kotoigi foe so wan sani di pasa èn mi ben breiti foe kan abi wan pikin prati na dati. Sma moesoe prèise oenoe nanga den sma foe oenoe, èn mi e winsi oenoe foeroe boen bakapisi nanga den projekt foe oenoe ini a ten di e kon.”
9 Na wan tra okasi, wan sma di e teki presi gi wan wenkriman ben kisi a wroko foe go loekoe dri dei langa fa a e go nanga a bow. A ben taki: „Mi libi kon kisi waarde foe di mi ben kan de na oen mindri na a kaba foe a wiki disi. A fasi fa mi ben denki foe Jehovah Kotoigi kenki. Oenoe e doe foeroe moro leki naki na den doro. A ben de wan grani foe kan teki prati na dati. No loekoe froewondroe te oenoe si mi na tapoe oenoe poebliki konmakandra.”
10 Di wan projekt ben kaba, na edeman foe wan foto ben skrifi wan brifi na ini a nen foe a foto, taki: „A ben gi wi deki-ati foe si fa den foeroe friwani wrokoman e wroko makandra foe bow a zaal so esi. A de foetroe wan moi oso. Den birtisma ben e taki foe a fasi fa na oso ben bow so esi. A njoen Kownoekondrezaal de wan troetroe grani gi wi libimakandra, èn wi breiti foe gi na oso nanga oenoe gemeente wan switi kon.
11 Moro friwani-wrokoman de fanowdoe: A komte e soekoe foe gebroiki bekwaam brada di sabi den vak boen èn di de foe feni ini den gemeente di sa kon makandra ini den njoen Kownoekondrezaal noso den wan di den meki kon boen baka. Den e wroko so srefi makandra nanga tra brada foe a gemeente, spesroetoe owroeman nanga dinari ini a diniwroko, foe gi den leri foe doe den wroko di moesoe foe doe. Te den brada disi di lepi na jejefasi, gro na ini den bekwaamfasi di de fanowdoe, èn di kan gebroiki foe bow Kownoekondrezaal, dan bakaten den kan jepi nanga a bow foe tra Kownoekondrezaal na ini a kontren. So boen, den sma di de ini den gemeente di abi foe doe nanga a bowprojekt foe wan Kownoekondrezaal, moesoe sori taki den abi wan jeje foe wani foe doe sani nanga wan jeje foe wani wroko makandra èn no e froewakti taki a komte nanga den sma di e wroko makandra nanga dati sa sorgoe gi ala wroko na a Kownoekondrezaal foe den (Neh. 4:6b). Baka te brada kisi leri, dan lobi moesoe poesoe den foe jepi bow Kownoekondrezaal gi tra gemeente di abi a tranga fanowdoe foe wan njoen zaal noso wan zaal di moesoe meki kon njoen baka.—Neh. 5:19; Fil. 2:3, 4.
12 Preikiman di dopoe èn di abi a bekwaam fasi di fiti èn di abi wan boen nen ini a gemeente, e kisi a deki-ati foe gi densrefi leki friwani-wrokoman foe jepi nanga a bigi wroko disi. Sma di sabi a wroko kaba èn sma di no sabi a wroko ete, de fanowdoe. Friwani-wrokoman kan kisi den formulier di de fanowdoe foe den fesiman opziener noso foe a sekretarsi ini den gemeente èn drape den kan skrifi sortoe ondrofeni den abi leki vakman noso ini wan tra fasi so leki sorgoe gi njanjan, beveiliging, sorgoe gi wroko-sani, boekhouding nanga a sreka foe papira. (Efoe a gemeente abi moro friwani-wrokoman formulier fanowdoe, dan den kan bisteri den now na a Genootschap makandra nanga den ala moen boekoe bisteri.) Piki na tapoe a fasi disi de wan boeweisi foe a lobi foe wi gi den sma di de moro krosibei na wi sei—wi kresten brada.—Mat. 7:12; 22:39; Joh. 13:35.
13 Wi e warderi a jepi foe friwani-wrokoman: Wan toe sma nomo e froestan o bigi a wroko de foe kaba bow wan Kownoekondrezaal, te leki densrefi kon abi foe doe nanga wan projekt. Baka di den ben kaba nanga wan Kownoekondrezaal projekt na Amerkankondre, den owroeman ben skrifi: „A tiri di wi ben kisi nanga pasensi foe den brada foe a bowkomte ben de wan toemoesi moi blesi gi wi. Te wi e prakseri fa den horibaka gi wi nanga jepi foe a tiri di den ben gi wi èn a seti di den ben seti a wroko ondro den bekwaam wrokoman, dan 1 Petrus 5:2, 3, e kon na wi prakseri pe wi e leisi taki wan herder moesoe doe en wroko ’no nanga dwengi ma foe di a wani troetroe; no foe lobi foe wini na wan oneerlek fasi, ma di a de klariklari; no leki sma di e basi den di de a goedoe foe Gado, ma leki eksempre gi na ipi’. Den brada disi troetroe de moi eksempre foe sma di gi densrefi ini a dini foe Jehovah. Ini a heri pisiten foe a projekt, okasi ben de toemoesi foeroe foe kari pe brada di ben rèis foe farawe presi, ben e wroko foeroe joeroe langa èn ben e gi den masjin nanga tra wrokosani èn den ben gi srefi materiaal, èn ben doe ala den sani disi foe jepi wi nanga a bow foe wi njoen Kownoekondrezaal. Den brada disi di ben gi nanga den heri ati ben sori na wan bigi fasi taki troetroe den ’abi lobi gi a heri gemeenschap foe brada’, èn fa dati ben de wan deki-ati gi wi.—1 Petr. 2:17.”
14 A jeje foe wani wroko èn a faja foe den brada de krin foe si, so leki wan groepoe ini Amerkankondre ben skrifi: „Fa a ben de wan bigi prisiri foe si fa den gemeente pe den e taki Korean, Spanjoro, nanga Ingrisitongo e wroko so boen makandra ini a wánfasi foe na anbegi foe Jehovah!” Den wortoe foe Psalm 133:1, 3 de seiker troe: „Loekoe! O boen èn o switi a de te brada e libi makandra ini wánfasi!” Wan owroeman di e wroko makandra nanga wan komte, ben skrifi wan brifi foe taki fa a ben de wan grani foe dini tra brada. A ben taki dati den „gemeente ben kisi so wan deki-ati foe brada di e rèis hondrohondro kilometer, foe jepi den doe den dienst gi Jehovah nanga den heri ati. . . . Foe troe, wi de wan lobi bradafasi!”
15 Foe sori warderi gi a wroko di den ben doe na wan Kownoekondrezaal foe wán gemeente ini Amerkankondre, wan fesiman opziener ben skrifi: „Foe di a gemeente disi abi someni owroe brada, a projekt disi no ben sa kaba nanga wi eigi moeiti nomo. Dati meki wi wani gi oenoe nanga den brada leki oenoe di e firi a lobi foe Jehovah èn di no wani foe firi en wawan, ma wani sori disi toe, wan bigi grantangi. Meki wi taigi wi brada: „Go doro nanga a boen wroko.’ Foeroe foe wi brada e firi den moeiti foe oenoe èn sondro degedege a e gi wi Tata, Jehovah, prisiri.” Wan tra bowkomte ben skrifi: „Wi sabi foe wi eigi ondrofeni a tranga wroko di foeroe foe oenoe ben gi (Fileim. 21). Sma di no de Kotoigi ini a birti, ben bari taki: ’Jehovah de nanga oenoe!’”
16 Bijdrage ini moni e go doro foe gi jepi: Bijdrage di gi nanga a heri ati na a Genootschap ben jepi gemeente fositen èn sa go doro foe doe disi ini a ten di e kon. A no Jehovah srefi e teki fesi ini a gi sondro foe prakseri en eigi boen? (Jak. 1:17) Ala di a de so taki wi alamala no abi densrefi fasi foe doe nanga densrefi okasi foe gi, wi sa kon si taki wi efoe wi fiti den persoonlijk kostoe di wi abi, dan wi kan abi wan dorodoro prati na a hori di wi e horibaka gi a bow-wroko. Seiker a sortoe fri fasi disi foe gi e meki Jehovah ati prisiri èn a de wan bigi deki-ati gi den brada foe wi toe.
17 „Wan bigi ipi” di e gro nomonomo, e doe wan sani tapoe a boskopoe foe a Kownoekondre ini a ten disi. „Den sani di sma e angri foe dati” e lon go na a tempel foe Jehovah na jeje fasi, èn a e ’foeroe en oso nanga glori’ (Openb. 7:9; Hag. 2:7). Meki wi, leki den getrow djoe foe a ten foe Hagai, poti wi ati tapoe a wroko foe Gado foe di wi e gi jepi dorodoro na a tranga fanowdoe foe moro Kownoekondrezaal. Ala di foeroe moi Kownoekondrezaal ben bow ini den jari di pasa, tokoe a gro e tan go doro moro esi. A hori di wi e horibaka dorodoro gi a Kownoekondrezaal-fondsoe foe a Genootschap de wan toemoesi moi fasi foe kan abi prati na a wroko foe Gado.