De nanga tangi gi den sani di wi abi
1 „Gado e rikomanderi en eigi lobi na wi na ini disi, taki Krestes dede gi wi, ala di wi ben de sondari ete” (Rom. 5:8). Fa wi alamala moesoe de nanga tangi gi a moro bigi ofrandi di Jehovah Gado nanga en Manpikin ben tjari gi a boen foe wi! Nanga jepi foe a broedoe di Krestes ben trowe gi wi, wi e kisi na okasi foe libi foe têgo, wan sani di no wan libisma kan gi wi.
2 Fa wi kan sori taki wi e warderi disi? Foeroe sma de, di e angri foe troe sabi, di wi kan feni soso na ini a Santa Wortoe foe Gado. Na a wani foe Jehovah taki den kon sabi a waarheid (1 Tim. 2:4). Wi e sori taki wi e warderi a waarheid, foe di wi ’e meki a boen njoensoe foe a kownoekondre foe Gado bekènti’ (Luk. 4:43). Te wi e teki prati nanga wi heri ati na ini a wroko disi, dan wi e sori taki wi e warderi taki Krestes dede gi wi èn taki wi wani waka na en baka, foe di wi e gi jesi na wan getrowfasi na en komando foe meki disipel foe tra sma.—Mat. 28:19, 20.
3 San na wan toe fasi foe preiki, di opo gi wi? A de so, taki wi kan poti wi nen foe wroko leki jepipionier ten na ten? Kande son wan ben man foe bigin nanga a gewoon pionierwroko, baka di den teri den kostoe. Te wi e meki boen gebroiki foe den moi okasi disi, dan wi e gi moro ten na a prati di wi e prati a boen njoensoe foe a Kownoekondre. Na ini a ten di pasa, joe prakseri kande foe poti joe nen foe wroko leki pionier, ma wan toe problema ben de. Kande joe situwâsi kon kenki now. Efoe dati de so, joe prakseri serjoesoe foe bigin nanga a pionier diniwroko noso foe dini leki jepipionier?
4 A de di wi de nanga tangi, e kon moro faja te wi e loekoe san e pasa lontoe wi. Na heri grontapoe wan bigi gro de ini ogridoe di doe nanga tranga, a si di sma no wani si makandra na ai, nanga a feti di sma e feti nanga makandra. Paulus ben taki boen foe den ten foe wi leki ten di „moeilek” èn di „tranga foe pasa” (2 Tim. 3:1). Na mindri den broeja situwâsi disi, wi abi boen njoensoe pasa marki foe prati nanga trawan. Wi abi toe moi tijdschrift, A Waktitoren nanga Ontwaakt! A moen disi, wi kan tjari den wanwan gi sma noso wi kan pristeri den wan abonement. So srefi wi abi brochure di e taki foe foeroe tori. Den poeblikâsi disi kan gi troetroe kowroe-ati na den wan di leisi den. A de di wi de nanga tangi gi den sani di wi abi, sa moesoe boeweigi wi foe prati den foeroe nanga trawan.—Hebr. 13:16.
5 A kan de, taki na ini a gebied pe joe e libi, sma no e sori foeroe belangstelling gi jeje afersi. Na a tra sei, joe abi gebied pe sma abi foeroe belangstelling. Foeroe belangstelling de foe feni na mindri sma, di e taki wan tra tongo. Efoe joe man taki moro leki wán tongo, dan a kan taki joe kan dini ini wan kontren na ini a kondre disi pe a jepi foe joe de tranga fanowdoe? Kande joe kringopziener kan gi joe wan toe rai ini a tori disi.
6 Reide lai foe san ede wi moesoe de nanga tangi gi den sani di wi abi, troetroe boen sani pasa marki. A moro boen fasi fa wi kan sori Jehovah taki wi de nanga tangi, na foe meki en nen nanga en prakseri bekènti na trawan.—Jes. 12:4, 5.