De klariklari foe gi wisrefi
1 A psalm singiman David ben profeteri taki a pipel foe Jehovah „sa de klariklari foe gi densrefi”; dati wani taki, leki „friwani wrokoman di e gi densrefi wantewante” (Ps. 110:3, foetoewortoe). Disi e kon troe srefisrefi na mindri wi bradafasi na heri grontapoe. Na ibriwan foe den fo dienstjari di pasa, a pipel foe Jehovah gi moro leki wán miljard joeroe foe prati a boen njoensoe foe a Kownoekondre. Èn boiti a preikiwroko nanga a wroko foe meki disipel, foeroe fasi de pe wi kan de klariklari foe gi wisrefi foe jepi tra sma.
2 Fasi fa wi kan sori taki wi de klariklari: Son sma na ini a gemeente ben sa kan abi jepi fanowdoe foe man go na den konmakandra. Foe san ede joe no e gi joesrefi foe teki den nanga joe? Tra sma kande siki, swaki, noso de na ati-oso. Joesrefi ben kan bigin doe wan sani foe fisiti den noso foe jepi den na wan fasi? A kan de taki wan sma noso wan osofamiri abi deki-ati fanowdoe. Joe prakseri foe gi den sma disi wan kari foe sidon wawan leisi na joe osofamiri studie? Wan pionier noso wan preikiman kande abi wan patna fanowdoe na ini a diniwroko. Foe san ede joe no e pristeri foe wroko makandra na ini a diniwroko? Disi na wan toe foe den fasi fa wi kan doe friwani wroko gi a boen foe den wan di de nanga wi na ini bribi. — Gal. 6:10.
3 Den brada kan sori taki den de klariklari foe gi densrefi na ini Jehovah organisâsi, foe di den e doe moeiti foe doro den markitiki gi owroeman nanga dinari ini a diniwroko (1 Tim. 3:2-10, 12, 13; Tit. 1:5-9). Foe di wi e tan gro na ini nomroe, wan fanowdoe de gi bekwaam brada di wani teki fesi foe preiki èn foe gi leri èn foe wei den gemeente. — 1 Tim. 3:1.
4 Kande son wan foe wi kan gi wisrefi foe doe moro foeroe na ini a diniwroko foe Jehovah, foe di wi e gi wi nen foe wroko leki jepi-pionier wawan leisi. Èn so srefi, nanga wan toe reidelek kenki na ini wi schema, wi ben sa kan doe a jepi-pionierwroko doronomo noso wi ben sa kan teki a gewoon pionierwroko srefi. Den omstandigheid foe wi de na so wan fasi taki wi ben kan froisi go na wan kontren pe moro foeroe jepi de fanowdoe? Wi ben kan gi wisrefi foe dini na Bethel èn na so fasi e jepi langalanga foe meki a wroko na heri grontapoe gro? Foeroe wroko e doe foe bow Kownoekondre zaal, kongreshal, nanga bijkantoro na heri grontapoe, pe wrokoman di de klariklari foe gi densrefi de troetroe fanowdoe. Wi e warderi srefisrefi den sma di gi densrefi gi den toemoesi boen wroko disi, èn den kisi foeroe blesi! — Luk. 6:38.
5 Disi na toemoesi span ten. Nanga jepi foe En jeje, Jehovah e doe wan toemoesi moi wroko na grontapoe nanga a pipel foe en di de klariklari foe gi densrefi! Awansi oten Jehovah, nanga jepi foe en organisâsi, e gi wan kari foe doe moro Kownoekondre wroko, a sa boen efoe wi e aksi wisrefi: ’Mi de klariklari ete foe gi misrefi?’ Dan na ondro begi wi moesoe ondrosoekoe wi ati èn den omstandigheid foe wi. A gi di wi e gi wisrefi na ini a dini foe Gado, sa poesoe wi foe doe ala san wi man na ini santa diniwroko, èn na so fasi wi sa prisiri na ati foe Jehovah srefisrefi! — Sef. 3:17.