¿Yu Sa De Drape?
1 Wan brada di de wan Kotoigi langa ten kaba, ben taki wan leisi: „¡Efu yu e misi a fosi dei fu a kongres, we, dan yu misi tumusi furu kaba!” Fu san ede a brada ben denki na a fasi dati? Bika a fosi dei na a bigin fu wan tumusi bigi fesa nyanyan na yeye fasi di na organisâsi fu Yehovah sreka gi wi (Yes. 25:6). Fu di wi drape na a bigin kaba, dan disi e sori taki wi e agri nanga den firi fu a psalm skrifiman: „Mi ben prisiri di den ben taigi mi: ’Meki wi go na a oso fu Yehovah.’”—Ps. 122:1.
2 Toku a ben de so na wan tu fu den „A Profeiti Wortu fu Gado” Distrikt Kongres a yari di pasa, taki den sma di ben kon freida ben de krinkrin moro mendri leki satra nanga sonde. Disi wani taki dati furu fu den brada fu wi, ben lasi kongres lezing di ben taki fu tumusi prenspari tori fu a profeiti wortu. Den ben misi na okasi tu fu abi prisiri demakandra nanga kompe-bribiman.
3 No Meki Wroko fu Grontapu Kon na Mindri: A frede di son sma frede fu lasi a wroko fu den, kande meki taki den no ben kon freida. Ma furu Kotoigi kon si taki den basi fu den wani wroko makandra nanga den na ini na afersi disi, te den e aksi verlof langa ten na fesi. ¡Wan basi ben fruwondru sote nanga a fasti bosroiti di wan pionier sisa ben abi fu go na ala den gemeente konmakandra nanga den bigi konmakandra, taki a basi ben tan wan heri dei na a kongres di a sisa ben fisiti!
4 Yu no musu denki taki a basi fu yu no wani gi yu primisi fu teki verlof, èn yu no musu denki tu taki a no sa de wan problema fu misi wán dei fu a kongres. Sreka yusrefi nanga opregti overtoigi fu sori a basi fu yu na ini Bijbel èn nanga takt, fu san ede a de so wan prenspari pisi fu na anbegi fu yu, fu go na a kongres (Hebr. 10:24, 25). Dan yu musu frutrow tapu den pramisi fu Yehovah dorodoro èn erken taki ala sani di yu abi fanowdu na materia sei yu sa kisi efu yu e tan si den sani di de fanowdu na yeye fasi, leki a moro prenspari sani na ini yu libi.—Mat. 6:33; Hebr. 13:5, 6.
5 A moro bigi sani musu de a warderi di wi e warderi „den moro prenspari sani” (Fil. 1:10, 11; Ps. 27:4). Disi e buweigi wi fu prakseri den sani di wi musu du fu kan nyan bun dorodoro fu a tumusi prenspari sani disi di Yehovah seti gi wi. ¡Bigin nownow fu meki plan di de seiker, èn abi a fasti bosroiti taki yu sa de drape ala den dri dei!