Prèise Yehovah na ini a bigi gemeente
1, 2. Sortu okasi wi e kisi te wi e go na a distrikt kongres, èn fa wi kan doro a marki disi?
1 Den distrikt kongres di wi e hori ibri yari e gi wi wan moi okasi fu prèise Yehovah. Wi e firi neleki David di ben singi: „Mi sa prèise yu na ini a bigi gemeente; na mindri wan bigi grupu fu sma mi sa prèise yu” (Ps. 35:18). Heri-esi wi e kisi a „Gi yesi na Gado” Distrikt Kongres. Fa wi kan de seiker taki wi e prèise Yehovah leki wán man na a kongres?
2 Wan fasi fa wi kan du disi de nanga a fasi fa wi e tyari wisrefi. Den sma di ben drai wan fu den presi pe wan kongres ben e hori, ben taki: „Fu di wi si fa unu e hori un kongres, meki wi taigi tra kerkigrupu di wani yuru a presi disi tu, fu kon èn fu luku fa den Kotoigi fu Yehovah e sreka wan kongres, fu di den Kotoigi e seti sani na wan moi fasi.” Nanga a fasi fa wi e moi wisrefi, a fasi fa wi e wroko nanga makandra, èn a fasi fa wi e tyari wisrefi, ibriwan fu wi e du sani di e meki taki Gado e kisi a tumusi moi prèise disi, di a e frudini nanga reti.—1 Petr. 2:12.
3, 4. Fa lespekifasi sa yepi wi fu weri krosi na wan fasi di fiti wan Kresten dinari, na a kongres èn baka a programa?
3 A fasi fa wi e moi wisrefi: Efu wi wani weri krosi èn efu wi wani moi wisrefi na wan fasi di e prèise Yehovah, dan wi musu sori lespeki (1 Tim. 2:9). A Diniwroko-skoro-buku e taki na tapu bladzijde 132: „Wan sma di e lespeki ensrefi èn di e lespeki trawan tu, e broko en ede fu no hati a firi fu trawan efu a kan. So wan sma no e hari a prakseri fu trawan tu sondro taki dati de fanowdu.” Na ini furu kondre, a de wan aladei sani fu weri krosi na wan fasi di no e sori lespeki. Ma Yehovah e warderi a muiti di wi e du fu di wi e teki presi gi en na wan fasi di fiti (Tori. 15:14). Awansi pe a kongres fu wi e hori, a presi pe wi e kon makandra e tron „a bigi gemeente” gi wi na den dri dei fu a kongres. Fu dati ede, te wi e kon makandra na fesi Yehovah, wi musu weri krosi di fiti a wartifasi fu a moro hei Sma na hemel nanga grontapu.—1 Kron. 29:11.
4 Wi musu poti prakseri sosrefi na a fasi fa wi e weri krosi baka a programa ibri dei. Aladi a kan taki wi wani weri tra sortu krosi na ini wi fri ten noso te wi e go nyan na wan restaurant, toku a de prenspari taki a fasi fa wi e weri krosi èn e moi wisrefi e fiti ete gi sma „di e taki dati den e lespeki Gado” (1 Tim. 2:10). Krosi di fiti, no abi fu de krosi di furu sma na grontapu e weri (1 Yoh. 2:16, 17). Den Kresten publikâsi fu wi abi prenki fu man nanga uma na ini difrenti situwâsi di e weri krosi di fiti èn di e sori taki den e lespeki a firi fu trawan; den prenki disi kan yepi wi fu si sortu krosi e fiti. Te wi e weri den lapel karta fu wi na a kongres, dan dati sa memre wi taki ala ten wi na Kresten dinari.—2 Kor. 6:3, 4.
5, 6. Fa wi kan sori taki wi abi lespeki gi a yeye tafra fu Yehovah?
5 Abi lespeki gi a yeye tafra fu Yehovah: A Moro Hei Masra fu hemel nanga grontapu sreka wan fesa gi wi (Yes. 25:6; 1 Kor.10:21). Efu wi e warderi en trutru fu de na a yeye tafra fu Yehovah, dan wi sa abi a marki fu go ala dri dei na a kongres. Yu sreka sani fu abi wan sribi presi, yu luku kaba fa yu o go na a kongres, èn yu teki fakansi fu a grontapuwroko fu yu? Yu poti nofo ten na wan sei fu sreka yusrefi èn fu teki pasi go na a kongres? Na so fasi yu kan doro fruku drape fu feni wan sidon presi, fu abi demakandra nanga den brada nanga sisa fu yu, èn fu teki prati na a prèise di wi e prèise Yehovah nanga a fosi singi nanga begi.—Ps. 147:1.
6 Fu di wi abi lespeki gi Yehovah en yeye tafra, meki wi sa poti seryusu prakseri na a programa, wi sa wani luku bun fu no takitaki nanga trawan, fu no nyan, noso fu no waka lontu efu dati no de fanowdu. Nanga yepi fu a getrow èn koni srafu, Yehovah e sorgu taki wi e kisi a yeye nyanyan di wi abi fanowdu nownowde (Mat. 24:45). Wi no musu misi nowan pisi fu a programa. Papa nanga mama musu sidon nanga den pikin fu den èn den musu yepi den pikin fu kisi wini dorodoro fu a programa.—Deut. 31:12.
7. Sortu rai wi kisi di abi fu du nanga wi brekten nyanyan, èn fu san ede disi bun?
7 Wi wani aksi unu fu tyari un eigi brekten nyanyan, na presi fu gowe libi a kongres dyari fu go bai nyanyan na ini a pauze. A de fu prèise taki furu sma poti prakseri na a rai disi na a kongres fu a yari di pasa. A ben o de wan heri bun sani efu ala sma sa du disi a yari disi! (Hebr. 13:17) A seti disi e gi wi wan moi okasi fu kisi deki-ati fu a demakandra di wi abi nanga den brada nanga sisa fu wi, èn disi e meki taki a wánfasi nanga a vrede de, di e meki taki Yehovah e kisi grani.—Ps. 133:1.
8, 9. Sortu tra okasi wi e kisi na a kongres fu prèise Yehovah?
8 Gi kotoigi na ibri okasi: Te wi e go na a kongres èn te wi e komoto fu a kongres, dan wi e kisi furu okasi fu prèise Yehovah nanga wi mofo (Hebr. 13:15). Awansi wi de na pasi fu go na a kongres noso wi e nyan na ini wan restaurant, meki wi suku okasi fu gi kotoigi. Den prakseri fu wi nanga na ati fu wi sa furu nanga den yeye gudu di wi kisi na a kongres. Meki wi prati den bun sani disi nanga den sma di wi e miti na difrenti presi.—1 Petr. 3:15.
9 Wi e wakti fayafaya fu kisi na okasi disi fu blesi Yehovah „na mindri den ipi sma di kon makandra” (Ps. 26:12). Meki wi alamala prèise Yehovah na ini wánfasi na a „Gi yesi na Gado” Distrikt Kongres.
[Faki na tapu bladzijde 5]
Sani di wi musu hori na prakseri gi a distrikt kongres
◼ Programa ten: Tapu ala den dri dei, a programa sa bigin 9.30 mamanten. Den portu sa opo 8.00 mamanten. Wan tu miniti bifo a programa sa bigin, a fesiman sa sidon na tapu a podium aladi Kownukondre poku sa prei. Na a ten dati, wi alamala musu go sidon, so taki a programa kan bigin na wan fasi di fiti. A programa sa kaba 5.05 bakadina tapu freida nanga satra, èn tapu sonde a sa kaba 4.10 bakadina.
◼ A fasi fu poti yu wagi: Grantangi, arki den dienst-yepiman te den e sori yu pe yu kan poti yu wagi.
◼ Hori sidonpresi: Yu kan hori sidonpresi soso gi den sma di kon nanga yu na ini a srefi wagi noso boto, noso gi den sma di e libi nanga yu na ini a srefi oso.
◼ Bijdrage: Furu kostu e meki fu seti sani fu hori wan distrikt kongres. Wi kan sori taki wi e warderi disi, te wi e gi friwani bijdrage gi a wroko di e du na heri grontapu, na ini a Kownukondre zaal fu wi, noso na a kongres.
◼ Brekten nyanyan: Grantangi tyari un eigi brekten nyanyan, na presi taki unu e gowe fu a kongres dyari fu go bai nyanyan na ini a pauze. Unu kan tyari wan pikin ijsbox di e fiti na ondro wan sturu. Na a kongres sma no mag tyari bigi ijsbox, grasi kan nanga batra, nanga dringi di abi sopi na ini.
◼ Poti sani tapu cassette: Yu no musu poti sani soleki cassette-recorder nanga felem-kamera na a stroom, noso na den apparaat di den brada e gebroiki gi a programa, èn yu kan gebroiki den sani dati soso te den no e meki babari noso te den no de na pasi fu tra sma.
◼ Meki fowtow: Efu yu e meki fowtow na a ten fu a programa, dan yu no musu meki a kamera koti faya te yu e meki a fowtow.
◼ Cellulair telefon nanga pager: Den sani disi musu seti na so wan fasi taki den no e puru a prakseri fu tra sma.
◼ Te wan ongoloku pasa: Efu wan sma kisi mankeri na a presi pe a kongres e hori, dan grantangi taigi disi na wan fu dienst-yepiman di de krosibei. En sa taigi a sma di de na a EHBO wantewante so taki wan sma di sabi san fu du kan luku o seryusu a mankeri de èn a kan yepi a sma dati tu.