LES 11
San yu kan du fu kon lobi leisi Bijbel?
Oiti yu ben kisi wan bigi wroko, ma yu no ben sabi fa yu musu bigin nanga en? Fu meki en moro makelek gi yusrefi, dan kande yu no du ala sani direkt, ma yu du a wroko pisipisi. Na so a de tu te yu wani leisi Bijbel. Kande yu e aksi yusrefi: ’Pe mi musu bigin?’ Na ini a les disi wi o taki fu wan tu makelek sani di yu kan du di o yepi yu fu kon lobi leisi èn studeri Bijbel.
1. Fu san ede a bun fu leisi Bijbel ala dei?
Wan sma di e leisi „a wèt fu Yehovah” noso Bijbel ala dei, o de koloku èn sani o waka bun nanga en. (Leisi Psalm 1:1-3.) Na ini a bigin pruberi fu leisi wan tu miniti ibri dei. O moro yu e leisi Gado Wortu, o moro yu o lobi en.
2. San o yepi yu fu frustan san yu e leisi na ini Bijbel?
Baka te yu leisi wan pisi, dan a bun fu stop eife èn fu prakseri san yu leisi. Disi o yepi yu fu frustan Bijbel moro bun. Sobun, wi no musu leisi wawan, ma wi musu denki tu fu san wi e leisi (Yosua 1:8). Te yu e leisi yu kan poti den aksi disi gi yusrefi: ’San disi e leri mi fu Yehovah Gado? Fa a pisi disi kan yepi mi na ini mi libi? Fa mi kan gebroiki den vers disi fu yepi tra sma?’
3. O ten yu kan leisi Bijbel?
A muilek gi yu fu feni ten fu leisi Bijbel? Gi furu sma a muilek. Bijbel e gi wi deki-ati fu ’gebroiki a ten fu wi na wan koni fasi’ (Efeisesma 5:16). Fa yu kan du disi? Yu kan poti wan spesrutu ten ibri dei fu leisi Bijbel. Son sma e leisi Bijbel fruku mamanten. Trawan e leisi en moro lati na ini a dei. Fu eksempre, te den abi pauze na skoro noso na wroko. Tra sma e leisi Bijbel te neti, fosi den go sribi. San na a moro bun ten gi yu fu leisi Bijbel?
SORTU TRA SANI YU KAN LERI?
Wi o luku san yu kan du fu kon lobi leisi Bijbel. Wi o luku tu fa yu kan sreka bun gi a Bijbelstudie.
Neleki fa yu kan kon lobi nyan difrenti nyanyan, na so yu kan kon lobi leisi Bijbel
4. Fa yu kan kon lobi leisi Bijbel?
A no makelek fu bigin leisi Bijbel. Ma yu kan kon lobi leisi Bijbel, neleki fa wan sma e kon lobi wan nyanyan di a no ben sabi ete. Leisi 1 Petrus 2:2 èn taki fu na aksi disi:
Yu denki taki te yu o leisi Bijbel ala dei, a kan tron wan sani di yu lobi èn di yu no wani misi?
Prei a FELEM, dan yu o si fa wan tu sma kon lobi leisi Bijbel. Baka dati taki fu den aksi disi:
Fu san ede a ben muilek gi den yonguwan disi fu leisi Bijbel?
San yepi den fu leisi Bijbel ibri dei?
San den ben e du fu meki taki a no ben soi gi den fu leisi Bijbel?
Wan tu sani di kan meki en makelek gi yu fu bigin leisi Bijbel:
Suku wan Bijbel di vertaal bun èn di makelek fu frustan. Yu kan gebroiki a Nyun-Grontapuvertaling efu a de na ini a tongo fu yu.
Bigin nanga tori di span gi yu. Efu yu wani sabi sortu tori yu kan bigin leisi, dan luku a faki „Leisi Bijbel ala dei”.
Skrifi sortu pisi yu leisi kaba. Gebroiki a „Schema fu leisi Bijbel” di de na ini a buku disi.
Gebroiki a JW Library® app. Na ini na app disi yu kan leisi Bijbel noso yu kan arki en na ini furu tongo. Yu kan gebroiki na app disi awinsi pe yu de efu yu abi wan telefon noso wan tablet.
Gebroiki a brochure Studeri Gado Wortu moro fini. A abi karta, prenki nanga tra sani di kan yepi yu fu leri moro fu Bijbel.
5. Sreka gi a Bijbelstudie
Leisi Psalm 119:34 èn taki fu na aksi disi:
Fu san ede a bun fu begi fosi yu bigin leisi Bijbel noso fosi yu bigin sreka yusrefi gi a Bijbelstudie?
San o yepi yu fu frustan san yu e leri na a Bijbelstudie? Du den sani disi te yu e sreka yusrefi:
Leisi den fosi paragraaf fu a les.
Suku den Bijbeltekst èn leisi den. Pruberi fu frustan san den tekst e leri yu fu a paragraaf.
Hari wan strepi na ondro den wortu di e piki den aksi. Disi o yepi yu fu taki fu a les nanga a sma di e studeri nanga yu.
Yu ben sabi a sani disi?
Yehovah Kotoigi gebroiki difrenti Bijbelvertaling. Ma wi lobi a Bijbel—Nyun-Grontapuvertaling moro, fu di a vertaal bun, a makelek fu frustan èn a e gebroiki Gado nen.—Luku a web-artikel „Yehovah Kotoigi abi den eigi Bijbel?”
SON SMA E TAKI: „A e teki tumusi furu ten fu studeri Bijbel.”
San yu e denki?
SAN YU LERI?
Efu yu wani frustan Bijbel, dan yu musu meki ten fu leisi en, yu musu begi Gado fu yepi yu fu frustan en èn yu musu sreka gi a Bijbelstudie.
Fa yu ben o piki den aksi disi?
San o yepi yu fu frustan Bijbel?
Sortu ten bun gi yu fu leisi Bijbel èn fu studeri en?
Fu san ede a bun fu sreka gi a Bijbelstudie?
TRA SANI DI YU KAN LUKU
A Waktitoren disi abi wan tu rai di kan yepi yu fu kon lobi leisi Bijbel.
„Fa yu kan kisi moro prisiri te yu e leisi Bijbel?” (A Waktitoren Nr. 1 2017)
Na artikel disi e taki fu dri fasi fa yu kan leisi Bijbel.
„Fa Bijbel kan yepi mi?—Pisi 1: Kon sabi den moi sani fu yu Bijbel” (Web-artikel)
Na artikel disi e sori fa yu kan kon lobi leisi Bijbel.
„Fa Bijbel kan yepi mi?—Pisi 2: Meki Bijbel leisi tron wan span sani gi yu” (Web-artikel)
Na ini a felem disi wan tu sma di e leisi Bijbel furu yari kaba e fruteri san e yepi den fu studeri Bijbel bun.