Usiniketa Njani Seluleko?

Wake wacelwa yini kutsi unikete labatsite seluleko? Wake wabutwa yini imibuto lenjengalena: ‘Yini lokufanele ngiyente? Kufanele yini ngiye kulomcimbi? ngiwutsatse yini lomsebenti? kufanele yini ngishade nalomuntfu lengitsandzana naye?’

Bantfu labacotfo bangase bakucele kutsi ubasite nabenta tincumo—tincumo letingatsintsa buhlobo babo nebangani babo, umndeni ngisho naJehova imbala. Utasisekela kuphi seluleko sakho? Ubaniketa njani labanye seluleko? Nanobe lendzaba lokukhulunywa ngayo ibonakala ingakabaluleki nobe ibalulekile, Taga 15:28 titsi: “Umuntfu lolungile ucabanga kucala angakaphendvuli.” Ase sibuke kutsi letimiso letisihlanu teliBhayibheli letilandzelako tingasisita njani ekuniketeni seluleko.

1 Tfolisisa Yonkhe Indzaba.

“Kubulima nelihlazo kuphendvula umbuzo ungakeva kutsi utsini.”—TAGA 18:13.

Kute sinikete seluleko lesikahle, kufanele sicondze timo kanye nembono waloyo lofuna seluleko. Ase sifanekise: Nangabe lotsite akushayela lucingo akucele kutsi umlayele kakho, yini lokufanele uyati kute umsite? Ungamlayela yini indlela lencono lokufanele ahambe ngayo ube ungati kutsi ukuphi? Angeke! Ngendlela lefananako, kuniketa sicondziso lesikahle kudzinga kutsi ucabange ngetimo kanye nembono waloyo lofuna sicondziso. Tikhona yini timo letingabangela kutsi sitsatse lendzaba ngalenye indlela? Nasite lwati lwayo yonkhe indzaba, singatikhandza sesiniketa umuntfu seluleko lesingamenta adideke kakhulu.—Luk. 6:39.

Tfola Kutsi Lungakanani Lucwaningo Lalwentile. Kungase kube kuhlakanipha nekubuta loyo muntfu lofuna seluleko imibuto lefanana nalena: “Ngutiphi timiso teliBhayibheli locabanga kutsi tingasebenta kulendzaba?” “Ngutiphi tinzuzo lotatitfola kuloko lotakukhetsa?” “Utawulahlekelwa yini kuloko lotakukhetsa?” “Nguluphi lucwaningo lolwentile kakadze?” “Nguluphi lusito labanye labakunikete lona, njengalabadzala ebandleni, batali bakho, nobe loyo lokuchubela sifundvo seliBhayibheli?”

Timphendvulo takhe tingase tisisite sibone kutsi kungakanani lasakwentile kute alungise lendzaba. Seluleko lesitamniketa sona sitawuhlanganisa naloko lokushiwo ngulabanye. Singase sibone nekutsi lomuntfu ufuna umeluleki ‘lotamfundzisa loko latsandza kufundziswa kona’ ngeseluleko lafuna kusiva.—2 Thim. 4:3.

2 Kugweme Kuphendvula Ungakacabangisisi.

“Ngulowo nalowo muntfu akasheshe kuva, ephute kukhuluma.”—JAK. 1:19.

Singakahlosi lokubi, singase siphendvule ngekushesha. Kungaba kuhlakanipha yini kwenta njalo, ikakhulukati nasikhuluma ngendzaba lesingakayicwaningi kahle? Taga 29:20 titsi: “Uyamati nje umuntfu lophike kukhuluma angakacabangi? Sincono silima kunaye.”

Tinike sikhatsi lesenele kute ubone kutsi indlela lotawusebenta ngayo lendzaba iyahambisana yini nekuhlakanipha kwaNkulunkulu. Tibute: “Kucabanga kanye ‘nemoya welive’ kube naso yini sandla endleleni lengicabanga ngayo?” (1 Khor. 2:12, 13) Khumbula kutsi tinhloso tetfu letinhle kungase kungabi ngito kuphela letidzingekako. Ngemuva kwekutsi umphostoli Phetro sekeve ngesabelo saJesu lesilukhuni, watsi kuye: “Nkhosi, Nkulunkulu akakusite, loku kungete kwenteka kuwe!” Yini lesingayifundza endleleni Phetro latsatsa ngayo lendzaba? Kunganaki, kungabangela ngisho nemuntfu locotfo kutsi angakhutsati “lokukwaNkulunkulu, kodvwa kwebantfu!” (Mat. 16:21-23) Kubaluleke kakhulu kucabanga ngembikwekutsi sikhulume. Kuliciniso kutsi kuhlakanipha kwetfu kuncane kakhulu nasikucatsanisa nekwaNkulunkulu.—Jobe 38:1-4; Taga 11:2.

3 Ngekutitfoba Sebentisa LiVi LaNkulunkulu.

“Angenti lutfo ngekwami; kepha ngikhuluma loko, njengobe ngifundziswe nguBabe.”—JOH. 8:28.

Ungasho yini kutsi: “Kube benginguwe, bengitawu . . . ”? Ngisho nobe kusebaleni loko lobekufanele kwentiwe nguloyo lofuna lusito, utawube wenta kahle nawulandzela sibonelo saJesu sekutitfoba. Abe hlakaniphe kakhulu futsi analokuhlangenwe nako lokunyenti kwendlula bonkhe bantfu; kodvwa wamane nje watsi: “Mine angikatikhulumeli ngekwami, kodvwa Babe, . . . nguye longinike imiyalo yekutsi ngifanele ngitsini, ngikhulumeni.” (Joh. 12:49, 50) Timfundziso taJesu neteluleko takhe ngaso sonkhe sikhatsi betisekelwe entsandvweni yaBabe wakhe.

Nasi sibonelo: KuLukha 22:49 sifundza kutsi bafundzi baJesu bacela sicondziso mayelana nekutsi kufanele yini balwe nalabo labebatawubopha Jesu. Lomunye umfundzi wakhe wasebentisa inkemba kuleso simo. Naka kutsi kulandzisa kwencwadzi yaMatewu 26:52-54 kukhombisa kutsi ngisho nakuleto timo, Jesu watsatsa sikhatsi abonisana nebafundzi bakhe ngaloko lobekuyintsandvo yaJehova. Njengobe bekatati kahle timiso letitfolakala kuGenesisi 9:6 netiphrofetho letikuTihlabelelo 22 kanye na-Isaya 53, Jesu wakwati kuniketa sicondziso lesihlakaniphile lesasindzisa kuphila kwalabanyenti futsi sajabulisa naJehova.

4 Sebentisa Imitapo Lesilungiselelwe Yona.

“Ngubani losisebenti lesetsembekile nalesihlakaniphile, inkhosi yaso lesimise etikwebendlu yayo, kutsi sibanike kudla ngesikhatsi lesifanele?”—MAT. 24:45.

Jesu ubeke sisebenti lesetsembekile lesisipha kudla lokubalulekile kwakamoya. Nawuniketa seluleko kanye nesicondziso endzabeni letsite, uyatinika yini sikhatsi sekucwaninga etincwadzini letisekelwe eBhayibhelini?

I-“Watch Tower Publications Index” kanye ne-“Watchtower Library”a inemaphuzu lamanyenti lacacile lesingawasebentisa. Sitawube senta liphutsa nasingakunaki lokwatiswa. Tinkhulungwane tetihloko letivetiwe tinetindzaba letinyenti letingasita labo labafuna seluleko. Ukwati kangakanani kusita labanye kutsi bacwaninge timiso letiseBhayibhelini baphindze bacabange ngeliVi laNkulunkulu? Njengobe nelibalave lingasita umuntfu abone kutsi ukuphi, liphindze limcondzise nalapho afuna kuya khona, emathulusi ekucwaninga angakusita uyibone indlela lohamba kuyo uphindze ubone kutsi ungahlala njani endleleni leya ekuphileni.

Labadzala belibandla labanyenti baceceshe bamemeteli kutsi babuke tihloko basebentisa i-“Index” nobe i-“Watchtower Library” ngaleyondlela basita bamemeteli kutsi bacabange ngemiBhalo. Lusito lolunjalo alugcini nje ngekusita bamemeteli kutsi batilungise ngekushesha tintfo letibakhatsatako, kodvwa luphindze lubasite kutsi bakwente umkhuba kucwaninga baphindze betsembele kuJehova. Ngaleyondlela, batawuba ‘nemicondvo lehlutekile, leseyikwati kwehlukanisa lokuhle nalokubi.’—Heb. 5:14.

5 Kubalekele Kwentela Labanye Tincumo.

“Ngulowo nalowo uyawutetfwalela umtfwalo wakhe.”—GAL. 6:5.

Umuntfu ngamunye kufanele atikhetsele kutsi ngusiphi siyalo kanye neseluleko latasilalela. Jehova usinikete sonkhe inkhululeko yekutikhetsela kutsi sitawucondziswa timiso takhe yini nobe cha. (Dut. 30:19, 20) Letinye timo lesiba kuto tidzinga kutsi kusetjentiswe timiso teliBhayibheli letinyenti, futsi loyo lodzinga lusito kufanele atentele yena sincumo. Kuye ngesidzingo kanye nebudzala baloyo muntfu lofuna seluleko, kungase kube kuhle kutsi sitibute: ‘Nginalo yini vele lilungelo lekusebenta lendzaba?’ Letinye tindzaba kuncono kakhulu kutendlulisela kulabadzala belibandla nobe nangabe loyo lodzinga lusito kungulosemusha, sitendlulisele kubatali bakhe.

[Umbhalo longentansi]

[Libhokisi/Sitfombe ekhasini 8]

Leningakwenta EkuKhonteni Kwemndeni

EkuKhonteni Kwemndeni, kungani ungacwaningi kute utfole timphendvulo temibuto lobutwe yona kamuva? Ngutiphi tihloko netimiso teliBhayibheli longatitfola letingasita loyo lobute imibuto? Ase sitsi umzalwane nobe dzadze ukubuta mayelana nekutikhipha nalotsite anenhloso yekushada naye. Nawusebentisa i-Index nobe i-Watchtower Library, buka kucala tihloko letikhuluma ngalendzaba ngalokucondzile. Nasi sibonelo: Ku-Index ungase ubuke sihloko lesitsi “Dating” nobe lesitsi “Marriage.” Ngemuva kwaloko, buka tihlokwana letihlobene naleso sihloko. Nangabe ubuka sihloko lesikhulu, hlola kutsi kute yini letinye tihloko letihlobene nalendzaba locwaninga ngayo.

[Libhokisi ekhasini 9]

Sibonga emalungiselelo aJehova ngenhlangano yakhe, ngobe siyakhona kuniketa seluleko lesihle siphindze sisitfole kulabanye. Umshumayeli 12:11 utsi: “Taga tebantfu labahlakaniphile tinemavi lakhalipha njengentjumentju yemelusi, nanjengetipikili letishayelwe tacina, tinjalo taga natihlanganiswe ndzawonye, ngobe bavela kumelusi munye.” “Njengentjumentju”—tindvuku leticijile letisetjentiselwa kucondzisa tilwane—seluleko selutsandvo sicondzisa bantfu labacotfo endleleni lefanele. ‘Tipikili letishayelwe tacina’ tenta indlu icine. Ngendlela lefananako, kuhlanganyela nalabanye seluleko lesihlakaniphile kuba nemiphumela lemihle lehlala njalo. Bantfu labahlakaniphile batfola injabulo lenkhulu nabacabangisisa ‘ngemavi lahlanganiswe ndzawonye’ lakhombisa kuhlakanipha ‘kwemelusi munye,’ Jehova.

Cabanga ngemavi eMelusi nakaniketa seluleko. Kubalulekile kutsi silalele siphindze sinikete seluleko lesilusito nobe nini nasikhona. Nangabe sisekelwe etimisweni teliBhayibheli, seluleko setfu sitawuphumelela futsi singaba nesandla emiphumelweni lemihle yaloyo losilalele.