DILLO TSA JEREMIA
א [Aleph]*
1 Jerusalema ya neng a ena le baahi ba bangata,+ o se a le bodutu hakaakang!
O ne a le moholo hara ditjhaba+ empa o se a tshwana le mohlolohadi,
E ne e le kgosatsana hara diprofinse* empa e se e le lekgoba.+
ב [Beth]
2 O lla haholo bosiu kaofela+ mme meokgo ya hae e keleketla marameng.
Ha ho le ya mong wa batho ba ratanang le yena ya mo tshedisang.+
Metswalle ya hae kaofela e mo tswile tlase.+ E se e le dira tsa hae.
ג [Gimel]
3 Juda o hapuwe,+ o entswe lekgoba ebile o a hloriswa.+
O lokela ho dula hara ditjhaba.+ Ha a phomole.
Bohle ba mo hlorisang ba mo fumane nakong eo a leng mahlomoleng.
ד [Daleth]
4 Ditseleng tse yang Sione ho thotse hobane ha ho ba tlang moketeng.+
Dikeiti tsohle tsa hae di senyehile.+ Baprista ba hae ba a fehelwa.
Barwetsana ba hae ba utlwile bohloko mme o saretswe haholo.
ה [He]
5 Bahanyetsi ba hae e se e le beng ba hae. Dira tsa hae di iketlile.+
Jehova o mo baketse mesarelo hobane diphoso tsa hae di ngata.+
Bana ba hae ba hapuwe ke dira.+
ו [Waw]
6 Moradi wa Sione ha a sa na seriti.+
Dikgosana tsa hae di tshwana le ditshephe tse tona tse sa fumanang lekgulo,
Di tsamaya di kgathetse ka pela ya di hlorisang.*
ז [Zayin]
7 Nakong eo Jerusalema a neng a le mahlomoleng a bile a se na lehae, o hopotse
Dintho tsohle tsa bohlokwa tseo a neng a ena le tsona mehleng ya kgale.+
Ha setjhaba sa hae se wela matsohong a sera ebile se se na mothusi,+
Bahanyetsi ba hae ba ile ba mo bona ha a wa yaba ba a mo tsheha.*+
ח [Heth]
8 Jerusalema o entse sebe se seholo.+
Ke ka hoo a fetohileng ntho e nyatsehang.
Bohle ba neng ba mo hlompha ba mo tshwara jwalo ka ntho e nyonyehang ka ha ba mo bonetse.+
O a fehelwa+ mme o kgutla a swabile.
ט [Teth]
9 Diaparo tsa hae di ditshila.
Ha a ka a nahana ka bokamoso ba hae.+
O wele ha bohloko feela ha ho motho ya mo tshedisang.
Ka kopo Jehova, bona mesarelo ya ka hobane sera se ikgohomositse.+
י [Yod]
10 Mohanyetsi wa hae o otlolotse matsoho, a nka matlotlo ohle a hae.+
Etswe o bone ha ditjhaba di kena ka sehalalelong sa hae,+
Tseo o laetseng hore di se ke tsa kopana le batho ba hao.
כ [Kaph]
11 Batho bohle ba Jerusalema ba a fehelwa. Ba batla dijo.+
Ba fane ka dintho tsa bona tsa bohlokwa bakeng sa se yang ka maleng hore feela ba dule ba phela.
Ka kopo Jehova, bona hore ke se ke tshwana le mosadi* ya se nang thuso.
ל [Lamed]
12 Na ha le na taba lona bohle ba fetang ka tsela?
Shebang mme le bone,
Na ho na le matshwenyeho a tshwanang le ao ke otlilweng ka ona,
Ao Jehova a mpaketseng ona letsatsing la bohale ba hae bo tukang?+
מ [Mem]
13 O rometse mollo masapong a ka+ a le lehodimong mme o a tjhesitse kaofela.
O ntjhehetse leraba ka hoo o nqobeletse hore ke kgutlele morao.
O entse hore ke be jwalo ka mosadi ya lahlilweng.
Ke a kula letsatsi lohle.
נ [Nun]
14 Diphoso tsa ka di faseleditswe molaleng wa ka jwalo ka joko. O di lohelletse mmoho ka letsoho la hae.
Di tlanngwe molaleng wa ka, jwale ke feletswe ke matla.
Jehova o nehelane ka nna ho batho bao ke sa kgoneng ho ba lwantsha.+
ס [Samekh]
15 Jehova o qheletse ka thoko banna bohle ba ka ba matla.+
O bokeletse lebotho e le hore a bolaye bahlankana ba ka.+
Jehova o hataketse morwetsana wa Juda ka sehatelong sa veine.+
ע [Ayin]
16 Ke lliswa ke dintho tsena.+ Mahlo a ka a rotha dikeledi.
Motho e mong le e mong ya ka ntshedisang o hole le nna.
Bara ba ka ba utlwile bohloko hobane sera se re hlotse.
פ [Pe]
17 Sione o otlolotse matsoho,+ ha ho motho ya mo tshedisang.
Jehova o laetse hore batho bohle ba potapotileng Jakobo e be dira tsa hae.+
Jerusalema o fetohile ntho e nyonyehang ho bona.+
צ [Tsade]
18 Jehova o nkgalemetse ka nepo+ hobane ha ke a mamela melao ya hae.+
Mamelang, lona ditjhaba tsohle mme le bone ka moo ke utlwileng bohloko ka teng.
Barwetsana ba ka le bahlankana ba ka ba hapuwe.+
ק [Qoph]
19 Ke kopile thuso ho ba ratanang le nna empa ba ntswile tlase.+
Baprista ba ka le bannabaholo ba ka ba shwetse motseng,
Ha ba ntse ba ipatlela dijo e le hore ba dule ba phela.+
ר [Resh]
20 Jehova, bona ka moo ke leng mahlomoleng ka teng.
Ke tsielehile.
Pelo ya ka e utlwile bohloko haholo ka ha ke bile lerabele.+
Ka ntle sabole e ntse e bolaya bana ba ka.+ Ka tlung le teng batho ba ntse ba shwa.
ש [Shin]
21 Batho ba utlwile ha ke ntse ke fehelwa. Ha ho ya ntshedisang.
Dira tsohle tsa ka di utlwile ka tsietsi ya ka.
Di thabisitswe ke ntho eo o e entseng.+
Empa letsatsi leo o le phatlaladitseng le tla fihla+ mme di tla tshwana le nna.+
ת [Taw]
22 E se eka o ka bona bobe bohle ba dira tseo mme wa di fa kotlo+
Feela jwalo ka ha o mphile kotlo ka lebaka la diphoso tsohle tsa ka.
Etswe ke fehelwa haholo mme pelo ya ka e bohloko.
א [Aleph]
2 Jehova o kgurumetsa Jerusalema* ka bohale ba hae jwalo ka ha eka ke leru le letsho.
Botle ba Iseraele o bo lahletse fatshe bo tswa hodimo.+
Letsatsing la bohale ba hae, ha a ka a hopola setulwana sa maoto a hae.+
ב [Beth]
2 Jehova o ripitlile dibaka tsa Jakobo a se na le mohau.
Ka bohale o qhaqhile dibaka tsa Jerusalema* tse sireleditsweng.+
O theoletse mmuso+ le dikgosana+ tsa Juda tlase, a mo tlotlolla.
ג [Gimel]
3 Ka bohale o qetile matla ohle* a Iseraele.
Ha a ka a thusetsa Iseraele ha sera se e hlasela,+
Bohale ba hae ba nna ba tukela Jakobo jwalo ka mollo o tjhesang ntho e nngwe le e nngwe e haufi le wona.+
ד [Daleth]
4 O kobile* seqha sa hae jwalo ka sera. Letsoho la hae le letona le itokiseditse ho hlasela jwalo ka sera,+
O nnile a bolaya bohle bao Baiseraele ba ba ratang.+
O theoletse kgalefo ya hae ka tenteng ya Jerusalema*+ jwalo ka mollo.+
ה [He]
O ripitlile Iseraele.
O heleditse ditora tsohle tsa hae,
O sentse dibaka tsa hae tse sireleditsweng.
O etsa hore ho sarelwa le seboko di ate Jerusalema.*
ו [Waw]
6 O qhaqhile tempele ya hae ka mabifi+ jwalo ka lephephe la masimong.
O qhadile mokete wa hae.+
Jehova o lebaditse batho ba Sione mokete le sabatha,
O nyefotse morena le moprista ka bohale.+
ז [Zayin]
7 Jehova o lahlile aletare ya hae.
O furaletse sehalalelo sa hae.+
O nehelane ka mehaho ya Sione e melelele e sireletsehileng.+
Ba entse lerata ka tlung ya Jehova+ ekare ke letsatsi la mokete.
ח [Heth]
8 Jehova o entse qeto ya ho senya lerako la Jerusalema.*+
O methile marako a hae ka kgwele ya ho metha.+
Ha a thibela letsoho la hae hore le timetse.
O heletsa marako a sireletsang motse.
Kaofela ha ona a wele.
ט [Teth]
9 Dikeiti tsa Jerusalema di tetebetse fatshe.+
O sentse mekwallo a ba a e roba.
Morena wa hae le dikgosana tsa hae di hara ditjhaba.+
Ha ho ya mamelang molao.* Le baprofeta ba hae ha ba fumane pono e tswang ho Jehova.+
י [Yod]
10 Banna ba baholo ba motse wa Jerusalema* ba dula fatshe ba kgutsitse.+
Ba itshela ka mobu dihloohong mme ba itlama ka masela a hwashang.*+
Barwetsana ba Jerusalema ba inamiseditse dihlooho fatshe.
כ [Kaph]
11 Mahlo a ka a fedile ke ho lla.+
Ke tsielehile.*
Pelo ya ka e utlwile bohloko haholo* ka lebaka la ho wa ha moradi wa setjhaba sa heso*+
Le ho tepella ha bana le masea diterateng tsa motse.+
ל [Lamed]
12 Ba ntse ba re ho bomme ba bona: “Mme ke lapile ebile ke nyorilwe.”*+
Ba tepella jwalo ka motho ya tswileng leqeba diterateng tsa motse,
Bophelo ba bona bo fela ba le ka diatleng tsa bomme ba bona.
מ [Mem]
Ke tla o tshwantsha le eng hore ke o tshedise, wena Jerusalema?*
Leqeba la hao le leholo jwalo ka lewatle.+ Ke mang ya ka o fodisang?+
נ [Nun]
14 Dipono tsa baprofeta ba hao ke leshano ebile ha di na thuso,+
Ha ba a o bolella phoso ya hao e le hore o se ke wa hapuwa.+
Ho ena le hoo, ba nnile ba eba le dipono tse o kgelosang, tsa leshano.+
ס [Samekh]
15 Bohle ba fetang ka tsela ba o opela diatla ba swentse.+
Ba letsetsa moradi wa Jerusalema molodi ka ho makala+ mme ba sisinya dihlooho ba re:
“Na motse oo ke oo ba neng ba re ka wona: ‘O motle hakaakang. Lefatshe lohle le ikotla sefuba ka wona’?”+
פ [Pe]
16 Dira tsohle tsa hao di a o soma.
Di letsa molodi di bile di lomahantse meno di re: “Re mo qetile.+
Lena ke letsatsi leo re neng re le lebelletse.+ Le fihlile, re le bone.”
ע [Ayin]
17 Jehova o entse thato ya hae,+ o phethahaditse polelo ya hae,+
Ntho eo a e laetseng ho tloha kgale.+
Wena Jerusalema, o o fedisitse a se na mohau.+
O thabisitse sera ka wena. O file dira tsa hao matla.*
צ [Tsade]
18 Wena Jerusalema,* ba kopile thuso ho Jehova ba saretswe.
Tlohela meokgo e tsholohe bosiu le motshehare jwalo ka noka.
O se ke wa phomola, mahlo a hao a se ke a kgaotsa ho lla.
ק [Qoph]
19 Tsoha! O bokolle esale ka matjeke.*
O lle haholo ha o bolella Jehova dintho tsohle tse ka pelong ya hao.
Phahamisa matsoho o rapelle bophelo ba bana ba hao,
Ba ntseng ba akgehiswa ke tlala khoneng ya seterata se seng le se seng.+
ר [Resh]
20 Ka kopo Jehova, bona batho ba hao bao o ba fileng kotlo.
Na bomme ba lokela ho tswela pele ba ja bana ba bona bao ba ba tswetseng?+
Na baprista le baprofeta ba lokela ho bolaelwa ka tempeleng ya Jehova?+
ש [Shin]
21 Moshanyana le ntatemoholo ba rapaletse seterateng ba shwele.+
Barwetsana ba ka le bahlankana ba ka ba bolailwe ka sabole.+
O ba bolaile ka letsatsi la bohale ba hao. O ba rintse o se na le mohau.+
ת [Taw]
22 O bitsa dira tsa ka ka nqa tsohle jwalo ka ha eka o di etseditse mokete.+
Letsatsing la kgalefo ya Jehova ha ho a ka ha eba le ya balehang kapa ya phonyohang.+
Sera sa ka se timeditse bana bao ke ba tswetseng le ho ba hodisa.+
א [Aleph]
3 Ke nna ya boneng ha batho ba sotleha hobane Modimo a re halefetse yaba o re fa kotlo.
2 O nteleketse ka ntle mme o ntsamaisa lefifing eseng kganyeng.+
3 Ka nnete o kgahlanong le nna letsatsi lohle.+
ב [Beth]
4 O entse hore mmele wa ka o fellwe ke matla le letlalo la ka le senyehe.
O robile masapo a ka.
5 O nthibeletse ka mabota. O mpotapotile ka mathata le dimela tse tjhefo.+
6 O nqobeletse ho dula dibakeng tse lefifi jwalo ka batho bao e leng kgale ba shwele.
ג [Gimel]
7 O nthibeletse ka lerako e le hore ke se ke ka baleha.
O ntlamme ka ditlamo tse boima tsa koporo.+
8 Hape ha ke hweletsa ke kopa thuso ho yena, ha a arabele* thapelo ya ka.+
9 O thibile ditsela tsa ka ka majwe a betlilweng.
O entse hore ho be thata ho tsamaya ditseleng tsa ka.+
ד [Daleth]
10 O laletse ho ntlhasela jwalo ka bere, jwalo ka tau e tsometsang.+
11 O nkgelositse tseleng ya ka a ba a nthoba dikoto.*
O nkentse motwaitwai.+
12 O nkorotse ka seqha sa hae mme o nkemisitse jwalo ka phofu.
ה [He]
13 O hlabile diphio tsa ka ka metsu e tswang mokotleng* wa hae.
14 Batho ba bina ka nna ebile ba a ntshoma letsatsi lohle.
15 O ntjesitse dintho tse babang, a nnwesa lengana.+
ו [Waw]
16 O pshatla meno a ka ka lehlohlojane.
O mpitikisa moloreng.+
17 O ntlhokisa kgotso. Ke lebetse hore na ho thaba keng.
18 Yaba ke re: “Bokgabane ba ka bo fedile mme ha ke sa lebeletse letho ho Jehova.”
ז [Zayin]
19 Hopola mahlomola a ka le boemo ba ka ba ho hloka lehae.+ Hopola hore ke ja lengana le dimela tse tjhefo.+
20 O tla nkgopola, o tle ho nna o be o nthuse.+
21 Ke nahanne ka taba ena. Ke ka lebaka leo ke tlang ho o letela ka mamello.+
ח [Heth]
23 O re hauhela letsatsi le leng le le leng.+ Ka mehla o a tshepahala.+
24 Ke itse: “Jehova ke lefa la ka,*+ ke ka lebaka leo ke tlang ho mo letela.”+
ט [Teth]
25 Jehova o molemo ho ya mo tshepileng,+ ho motho ya batlang keletso ya hae.+
26 Ho molemo hore motho a lete ka mamello+ e le hore Jehova a mo pholose.+
27 Ho molemo hore motho a jare joko a sa le motjha.+
י [Yod]
28 A dule a le mong mme a kgutse ka ha Modimo o dumeletse hore mojaro oo o be hodima hae.+
29 A ikokobetse mme a itihele mobung ka sefahleho.+ Mohlomong ho ka ba le tshepo.+
30 A ke a tlise lerama la hae ho ya mo otlang. A ke a swabe haholo.
כ [Kaph]
31 Etswe Jehova a ke ke a re lahla ho ya ho ile.+
32 Le hoja a bakile mesarelo, o tla re hauhela hobane o lerato haholo.+
33 Etswe ho hlorisa batho kapa ho ba utlwisa bohloko ha se ntho e pelong ya hae.+
ל [Lamed]
34 Ho silakanya batshwaruwa bohle ba lefatshe ka tlasa maoto a motho,+
35 Ho hlokela motho toka ka pela Ya Phahameng ka ho Fetisisa,+
36 Ho qhekella motho nyeweng.
Jehova ha a batle dintho tse jwalo.
מ [Mem]
37 Jwale ke mang ya ka buang taba mme a etsa hore e phethahale ntle le ha Jehova a laela?
38 Molomong wa Ya Phahameng ka ho Fetisisa,
Ho ka se tswe dintho tse mpe ha mmoho le tse ntle.
39 Ke hobaneng ha motho a ka belaela ka lebaka la ditlamorao tsa sebe sa hae?+
נ [Nun]
40 A re hlahlobisiseng ditsela tsa rona,+ re di batlisise mme re kgutleleng ho Jehova.+
41 A re rapeleng Modimo ya mahodimong ho tloha pelong, re phahamise matsoho re re:+
42 “Re o sitetswe mme ha re a o mamela.+ Ha o a re tshwarela.+
ס [Samekh]
44 O re thibetse ka leru hore re se ke ra o atamela hore thapelo ya rona e se ke ya feta.+
45 O re etsa toti, dithole hara ditjhaba.”
פ [Pe]
46 Dira tsohle tsa rona di a re soma.+
47 Re dula re tshohile re bile re qabeletswe.+ Re timetse mme re lahlehile.+
48 Meokgo e tsholoha mahlong a ka jwalo ka melapo ya metsi ka lebaka la ho ripitlwa ha Jerusalema.*+
ע [Ayin]
51 Ke utlwile bohloko ka lebaka la ho sotleha ha baradi bohle ba motse wa heso.+
צ [Tsade]
52 Dira tsa ka di ntjhehile jwalo ka dinonyana ntle ho lebaka.
53 Di lekile ho mpolaela ka sekoting, tsa nna tsa mpetsa ka majwe.
54 Metsi a nkwahetse yaba ke re: “Ho fedile ka nna.”
ק [Qoph]
55 Ke hweleditse lebitso la hao Jehova, ke le ka sekoting se tebileng.+
56 Utlwa lentswe la ka. O se ke wa ikwala ditsebe ha ke hweletsa ho o kopa thuso.
57 O ile wa atamela ha ke o bitsa. Wa re: “O se ke wa tshoha.”
ר [Resh]
58 Jehova, o ile wa mpuella ka kgotla, wa nkinola mathateng.+
59 Jehova, o bone ka moo ke foseditsweng ka teng. Ke kopa o nkahlolele ka toka.+
60 O bone ha ba ntse ba ntohela mano, ba ntherela bora.
ש [Sin] kapa [Shin]
61 Jehova, o utlwile ha ba ntse ba ntshoma, ba ntherela bokgopo,+
62 O utlwile mantswe ao dira tsa ka di ntlhasetseng ka ona le ha di rera bobe kgahlanong le nna.
63 Sheba diketso tsohle tsa dira tsa ka ebang di a dula kapa di a ema. Di ntshoma ka dipina tsa tsona.
ת [Taw]
64 Jehova, o tla di fa kotlo ho ya ka diketso tsa tsona.
65 O tla di otla ka bomadimabe ka ho etsa hore di be dipelo di thata.
66 Jehova, o tla di lelekisa ka bohale mme o di fedise ka tlasa mahodimo a hao.
א [Aleph]
4 Kgauta e benyang e thothofetse hakaakang, kgauta ya boleng bo botle.+
Majwe a halalelang+ a hasane hohle diterateng.+
ב [Beth]
2 Ha e le bara ba hlomphehang ba Sione, ba neng ba le jwalo ka kgauta e hlwekisitsweng,
Ba se ba nkwa ba tshwana le dinkgo tsa letsopa,
Mosebetsi wa matsoho a sebopi.
ג [Gimel]
3 Esita le diphokojwe di anyesitse madinyane a tsona.
Empa batho ba heso ba Sione ba sehloho+ jwalo ka dimpshe tsa lefeelleng.+
ד [Daleth]
4 Leleme la lesea le anyang le kgomaretse mahalapeng ka lebaka la lenyora.
Bana ba kopile dijo+ empa ha ho ya ba ngwathelang.+
ה [He]
5 Ba neng ba ja dintho tse monate ba se ba solla seterateng ke tlala.+
Ba hodisitsweng ba apara diaparo tse turu*+ ba se ba fata thotobolong.
ו [Waw]
6 Kotlo* ya moradi wa batho ba heso e kgolo ho feta kotlo ya Sodoma,+
E ileng ya dihuwa ka motsotswana, ho se ya nanabetsang letsoho ho e thusa.+
ז [Zayin]
7 Banazari+ ba Sione ba ne ba hlwekile ho feta lehlwa, ba le basweu ho feta lebese.
Ba ne ba le bafubedu ho feta dikorale, ba tshwana le safire e bentshitsweng.
ח [Heth]
8 Ba se ba le batsho ho feta mosidi.
Ha ba sa tsejwa diterateng.
Matlalo a bona a maname masapong a bona.+ Matlalo a bona a omeletse jwalo ka patsi e ommeng.
ט [Teth]
9 Ba bolailweng ka sabole ba molemo ho feta ba bolailweng ke tlala,+
Ba fellwa ke matla ka lebaka la kgaello ya dijo masimong jwalo ka ha eka ba hlabilwe ka sabole.
י [Yod]
10 Basadi ba nang le qenehelo ba phehile bana ba bona.+
E bile dijo tsa bona nakong eo moradi wa batho ba heso a ripitlwang.+
כ [Kaph]
O hotetsa Sione ka mollo o tjhesang metheo ya yona kaofela.+
ל [Lamed]
12 Marena le baahi bohle ba lefatshe ba ne ba sa dumele
Hore mohanyetsi le sera ba tla kena dikeiting tsa Jerusalema.+
מ [Mem]
13 E ne e le ka lebaka la dibe tsa baprofeta ba yona, diphoso tsa baprista ba yona,+
Ba bolayang batho ba lokileng ba ka hare ho yona.+
נ [Nun]
14 Baprofeta le baprista ba lelerile+ diterateng.
Ba silafaditswe ke madi,+
Hoo ho seng le ya mong ya kgonang ho ama diaparo tsa bona.
ס [Samekh]
15 Ba ba hweleditse ba re: “Suthang! Le ditshila! Tlohang mona! Tlohang! Le se ke la re thetsa.”
Etswe ha ho na moo ba dulang, ba lelera hohle.
Batho ba ditjhaba ba itse: “Ba ke ke ba dula le rona.*+
פ [Pe]
A ke ke a hlola a ba tsotella.
Batho ba ke ke ba hlompha baprista,+ ba ke ke ba hauhela esita le banna ba baholo.”+
ע [Ayin]
17 Le hona jwale mahlo a rona a kgathetse ke ho batlana le thuso moo e leng siyo.+
Re batlile thuso ho setjhaba se ke keng sa re pholosa.+
צ [Tsade]
18 Ba re tsomme+ hoo re sa tsamayeng dimmarakeng.
Re haufi le ho shwa, matsatsi a rona a fedile etswe bofelo ba rona bo fihlile.
ק [Qoph]
19 Ba re lelekisang ba bile lebelo ho feta dintsu tsa mahodimo.+
Ba re behile merebele hodima dithaba, ba re tsomeditse lefeelleng.
ר [Resh]
20 Motlotsuwa wa Jehova+ eo e leng phefumoloho ya dinko tsa rona o hapetswe ka sekoting sa bona se seholo.+
Yena eo re itseng ka yena: “Re tla phela ka tshireletso* ya hae hara ditjhaba.”
ש [Sin]
21 Thaba mme o nyakalle, Wena moradi wa Edomo,+ ya dulang naheng ya Utse.
Kopi e tla fetiswa le ho wena+ mme o tla tahwa o hlahe o sa apara letho.+
ת [Taw]
22 Wena moradi wa Sione, o phethile kotlo ya hao.
A ke ke a hlola a o hapa.+
Empa Wena moradi wa Edomo, Modimo o tla hlokomela phoso ya hao.
O tla senola dibe tsa hao.+
5 Jehova, hopola ntho e re hlahetseng.
Sheba mme o bone ka moo re seng re se na seriti ka teng.+
2 Lefa la rona le fuwe basele, matlo a rona a fuwe baditjhaba.+
3 Re se re le dikgutsana.* Bomme ba rona ba jwalo ka bahlolohadi.+
4 Re lokela ho reka metsi ao re a nwang.+ Le patsi ya rona re a e reka.
5 Dira tsa rona di re behile merebele.
Re kgathetse empa ha re fuwe monyetla wa ho phomola.+
6 Re itshetlehile ka Egepeta+ le Asiria+ e le hore re fumane dijo tse lekaneng.
7 Baholoholo ba rona ba entseng sebe ha ba sa le yo. Empa rona re tlameha ho jara diphoso tsa bona.
8 Re se re buswa ke bahlanka. Ha ho motho ya re pholosang matsohong a bona.
9 Re fumana dijo ka ho beha bophelo ba rona kotsing+ hobane ho na le batho ba hlometseng ka disabole lefeelleng.
10 Matlalo a rona a tjhesa jwalo ka kganare ya mollo hobane re bolawa ke tlala.+
11 Ba tlotlolotse* basadi ba Sione le barwetsana ba metse ya Juda.+
12 Dikgosana di fanyehilwe ka matsoho a tsona.+ Le bannabaholo ha ba a hlomphuwa.+
13 Bahlankana ba jere malwala mme bashanyana ba thekesela ba nkile patsi e boima.
14 Banna ba baholo ba tlohile keiting ya motse.+ Bahlankana ha ba sa bapala mmino wa bona.+
15 Dipelo tsa rona di bohloko. Tantshi ya rona e fetohile maswabi.+
16 Dikorone di wele dihloohong tsa rona. Ho madimabe rona hobane re entse sebe.
17 Ka hoo, dipelo tsa rona di bohloko.+
Hape ka lebaka la dintho tsena, mahlo a rona a lerootho.+
18 Ka ha Thaba ya Sione e senyehile,+ diphokojwe di se di lalasa ho yona.
19 Ha e le wena, Jehova, o tla dula o le teng ka mehla le mehla.
O busa ka ho sa feleng.+
20 Ke hobaneng ha ho se mohla o re hopolang? Hape ke hobaneng ha o re lahlile nako e telele hakaale?+
21 Re boelanye le wena Jehova mme re tla kgutla hanghang.+
Etsa hore dintho tsohle di tshwane le mehleng ya pele.+
22 Empa o re lahlile.
O dula o re halefetse.+
Kgaolo ya 1-4 ke kodiyamalla e ngotsweng ka tatellano ya ditlhaku tsa Seheberu.
Kapa: “ditereke.”
Kapa: “lelekisang.”
Kapa: “soma.”
Mona Jerusalema e mothofaditswe.
Ka Seheberu: “moradi wa Sione.”
Ka Seheberu: “moradi wa Juda.”
Ka Seheberu: “robile lenaka le leng le le leng.”
Ka Seheberu: “hataketse.”
Ka Seheberu: “moradi wa Sione.”
Ka Seheberu: “moradi wa Juda.”
Ka Seheberu: “moradi wa Sione.”
Kapa: “taelo.”
Ka Seheberu: “moradi wa Sione.”
Sheba Tlhaloso.
Ka Seheberu: “Mala a ka a dubehile.”
Ka Seheberu: “Sebete sa ka se tsholletswe fatshe.”
Mokgabopuo wa mothofatso, mohlomong o bontshang kutlwelobohloko.
Ka Seheberu: “Dijothollo le veine di kae?”
Ka Seheberu: “moradi wa Jerusalema.”
Ka Seheberu: “morwetsana wa Sione.”
Ka Seheberu: “O phahamisitse lenaka la dira tsa hao.”
Ka Seheberu: “moradi wa Sione.”
Ke ho tloha hoo e ka bang ka hora ya bobedi ho ya ho ya botshelela hoseng.
Kapa: “mamele.”
Kapa mohlomong: “etsa hore ke be ntho e se nang thuso.”
Kapa: “kgohlopong.”
Kapa: “o na le lerato le tshepahalang.” Sheba Tlhaloso.
Ka Seheberu: “kabelo ya ka.”
Ka Seheberu: “moradi wa batho ba heso.”
Ka Seheberu: “sekareleta.”
Ka Seheberu: “Phoso; sebe.”
Kapa: “Ba ke ke ba dula mona e le baditjhaba.”
Ka Seheberu: “Sefahleho sa Jehova.”
Ka Seheberu: “tlasa moriti wa hae.”
Kapa: “bana ba se nang ntate.”
Kapa: “betile.”