Lebela Thuto ea Hao Kamehla
1 Lenaneo le lecha la Sekolo sa Tšebeletso sa Puso ea Molimo le tla qala ka January 1995. Ho hocha lenaneong leo ke eng? Histori e susumetsang ea mokhatlo o hlophisitsoeng oa Jehova oa kajeno e tla ba sehlooho seo ho tla buisanoa ka sona lipuong tse ngata tsa taeo. Selemong sena, ho tla buisanoa ka maqephe a 178 a buka Lipaki tsa Jehova—Baboleli ba ’Muso oa Molimo. Kaha ho ke ke ha ba le lipotso tsa tlhahlobo ka mor’a puo ea taeo bukeng ea Baboleli, re ka etsa’ng ho lebela thuto ea rōna le ho eketsa melemo e tlisoang ke eona?—1 Tim. 4:16.
2 Le hoja ba bangata ba se ntse ba balile buka Baboleli, ho nahanisisa ka boitsebiso kemisong ea sekolo ho tla thusa bohle ho ananela ka ho eketsehileng lefa la bona la puso ea Molimo. (Pes. 71:17, 18) Ke hobane’ng ha le sa behelle ka thōko nako e itseng beke e ’ngoe le e ’ngoe bakeng sa ho hlahloba boitsebiso bo abetsoeng sekolo bukeng ea Baboleli?
3 Lipuo tsa Taeo tse Tletseng Bophelo le tse Thahasellisang: Lipuo tsa taeo bukeng ea Baboleli li lokela ho fanoa ka tsela e tletseng bophelo le e thahasellisang. Li boetse li tlameha ho totobatsa bohlokoa bo sebetsang ba boitsebiso, li bo sebelise ho tebisa tlhompho bakeng sa mokhatlo o hlophisitsoeng oa Jehova le kananelo bakeng sa litokelo tseo e leng tsa rōna joaloka bahlanka ba Molimo. Haeba lelapa ka leng le bang teng Sekolong le tla le kopi ea buka Baboleli sebokeng, litho tsa lelapa li ka utloisisa puo ea taeo hamolemo ’me tsa rua molemo litšoantšong le lifotong tse leng bukeng.
4 ’Malo oa Bibele o Susumetsang Motho ho Nahana ka ho Teba: Ho bala hantle, ho hatisoa ha mohopolo moo ho loketseng ’me e le ka boikutlo, ke karolo ea bohlokoa ea ho ruta ka katleho. Ho phaella moo, boholo ba boitsebiso bo abuoeng hore bo baloe Puong ea No. 2 ha bo bongata haholo, ’me hangata ho tla ba le nako e ngata bakeng sa hore sebui se etse litlhaloso tse qalang le tse qetellang. Kenyelletso e lokela ho tsosa thahasello boitsebisong bo abuoeng le ho lokisetsa bamameli hore ba lemohe bohlokoa ba bona bo sebetsang. Qetello e ka ’na ea kopanyelletsa mantsoe a hlalosang le kamoo boitsebiso bo sebetsang kateng, ’me sebui se sebelise ka botlalo nako eo se e abetsoeng.
5 Boitsebiso bo eketsehileng ka lenaneo la sekolo le kamoo likabelo li lokelang ho sebetsoa kateng bo ka fumanoa ho “Kemiso ea Sekolo sa Tšebeletso sa Puso ea Molimo Bakeng sa 1995.” Re lebela thuto ea rōna ka ho hlahloba litaelo tse boitsebisong bona, ka ho lokisetsa likabelo tsa rōna hantle, le ka ho sebelisa keletso eo re e fuoang, e le hore re ka ntlafatsa mokhoa oa ho bua le oa ho ruta. Ba e-song ho ngolise sekolong ka mofuthu ba memeloa ho etsa joalo.