Bacha Ba Kajeno—Na Ba Hlaseloa Habonolo ke Borapeli ba Satane?
KORANTA ea Finland ea la 27 February, 1993 e tlalehile: “Borapeli ba Satane bo ntse bo e-ja setsi har’a bacha.” Ho ea ka boitsebiso bo fumanoeng ke sepolesa sa Tampere, Finland, batlōli ba molao ba amehang thekisong ea lithethefatsi ba tlisa bacha borapeling ba bosatane, ’me haholo-holo ba banana. Maemong a mangata bahlaseluoa bana le ba kenang bocha ke bana ba lilemo tse tlohang ho 10 ho ea ho 15. Koranta e ile ea tlaleha: “Borapeli ba Satane bo fumane mobu o nonneng har’a bacha ba lilemo tse ka tlaase ho 20.”
Koranta e ile ea lemosa: “Borapeli ba Satane bo tlang bocha hase mokhoa oa lehae oa (Finland) feela. Ka mohlala, haufinyane tjena makasine ea Afrika Boroa Star ea Johannesburg e lemositse hore borapeli ba Satane bo susumetsa maikutlo a bacha ba makhooa ba ruileng ba naha eo.” Ka sebele, borapeli ba bosatane ke phihlelo e tšosang ea machaba ho batsoali hammoho le ho bana.
Hoo e hlileng e leng taba, Borapeli ba Satane ka thetso bo tšepisa hore u tla fumana molemo o moholo ka ho etsa ho fokolang haholo. Makasine ea ’Teen e hlalositse: “Rapela diabolose; etsa mosebetsi oa hae o litšila, ’me le uena, o tla u neha seo u se batlang. ’Me ke ka lebaka leo bana ba bang ba fumanang Borapeli ba Satane e le bo ipiletsang hakana.”
Moshanyana ea lilemo li 17 ea lumelang hore ke setho sa sehlopha sa bosatane, o itse: “Ke lumela tabeng ea hore ke phele bophelo ka botlalo.” O itse: “Ke bona litšusumetso tse peli tsa tlhaho: botle le bobe. Lintho tsohle tseo batho ba reng li mpe ke lintho tse u thabisang. Libe li lebisa khotsofalong ea maikutlo, ea ’mele le ea kelello.”
Ha lefokisi la Denver, Colorado, U.S.A., setsebi sa lihlopha tsa bosatane, le ne le botsoa hore na ke hobane’ng ha le nahana hore bacha ba bonahala ba ka susumetsoa maikutlo habonolo ke Borapeli ba Satane, le ile la arabela: “Ha ke sa tla lebala seo mocha e mong ea lilemong tse ka tlaase ho 20 eo e leng setho sa borapeli ba Satane a ileng a mpolella sona. O ile a re, ‘Ke eng seo motho a ka se phelelang? Re tla phelela kajeno ’me re etse seo re se batlang. Ha ho na bokamoso.’”
Dr. Khalil Ahmad, motsamaisi oa litšebeletso tsa bacha Sepetleleng sa Nova Scotia, Dartmouth, Canada, o ile a hlalosa maikutlo a hae mabapi le leraba la Borapeli ba Satane. “Bacha ba ka tlaase ho lilemo tse 20 ba batla ho susumetsa maikutlo. Hangata ba se nang boikemisetso bo matla, ba inkang ba sa tšoanelehe, ba hoheloa ke [borapeli ba satane]. Bo ba neha khopolo ea bohata ea matla.”
Mohloli o mong oa boitsebiso oa sepolesa o tsebahalang mabapi le Borapeli ba Satane, lefokisi la San Francisco, le supa bothata ka ho toba: “Lefatše la rōna ke sebaka se se nang thahasello. Re amehile ka borōna haholoanyane ho feta batho ba bang. Re phela sechabeng se mabifi, se nang le maikutlo a fosahetseng. Bacha ba bona seo e le tsela e tloaelehileng ea bophelo ’me qetellong ba huleloa Borapeling ba Satane.”
Bacha ba kajeno ba amehile ka ho teba hakae Borapeling ba Satane? Larry Jones, mopresidente oa Mokhatlo oa Bolumeli o Shebaneng le Tšusumetso ea Sehlotšoana sa Borapeli Tlōlong ea Molao ebile e le ofisiri e phahameng lebothong la sepolesa la Boise, Idaho, U.S.A., o ile a lemosa: “Bana ba ipolaea ebile ba bolaea le metsoalle ea bona. Re na le bothata.” Ofisiri e ’ngoe ea sepolesa, ea ’muso oa Illinois, e behileng leihlo tsoelo-pele ea Borapeli ba Satane karolong eo a e phethang joaloka moeletsi oa sepolesa sekolong se phahameng, o boletse hore karolo ea 90 lekholong ea bacha ba kopanelang borapeling ba diabolose ba keneletse ho bona hobane e le mokhoa o chesehelloang ka nakoana, empa karolo ea 10 lekholong “e tšoaseha le ho tetebela ka ho feletseng Borapeling boo.”
Koranta ea sekolo, ea Brooklyn, New York, School News Nationwide, ea January-February-March 1994, karolong ea eona ea “Bolumeli,” e ne e e-na le sehlooho se reng “Lebaka Leo Borapeli ba Satane bo Hohelang Bacha ba ka Tlaase ho Lilemo tse 20.” E ile ea tlaleha: “Ka mor’a hore bashanyana ba babeli ba loane ka holong ea ho jela ea sekolo, mohlōli o ile a qhomela holimo ’me a otla salute e sa tloaelehang ka letsoho, a finne feise ’me a phahamisitse monoana oa hae oa bosupa le o monyenyane. Tichere ea bonono e ne e sa utloisise hore na ke hobane’ng ha bana ba bangata hakana ba toroea litšoantšo tsa batho ba tšoanang le bademona ba nang le lihlooho tsa lipōli. ’Me libuka tse buang ka tšebelisano le matla a phahametseng tlhaho li ne li ntse li nyamela laebraring ea sekolo.
“Ha e le hantle, bana ba ne ba se na thahasello e
tebileng ka matla, boselamose, le sephiri tsa Borapeli ba Satane. Ho ba bangata, e ne e le ntho e thabisang le e susumetsang. Ho ba bang, e ne le ntho e tebileng—e tebileng haholo ho Lloyd Gamble ea lilemo li 17—ea ileng a lahleheloa ke bophelo ba hae sehlabelong sa bosatane.
“Ka mor’a lefu la Lloyd le ho tšoaroa ha moena oa hae ea lilemo li 15 ka lebaka la ho bolaea, batho ba baholo ba seterekeng sa Monroe ba ile ba ithuta ho utloisisa lipontšo tsa letsoho tseo pele li neng li makatsa haholo: ‘pontšo ea diabolose’ ea letsoho, litšoantšo tsa hlooho ea pōli le libuka tse fepang likelello tsa bacha ba ka tlaase ho lilemo tse 20, litšebeletso tse etsoang ka tloaelo le lipolelo tsa boloi.”
Ho bonahala ho na le litlaleho tse sa feleng tsa bacha ba ka tlaase ho lilemo tse 13 le ba ka tlaase ho tse 20 ba bolaeang batsoali ba bona le litho tse ling tsa malapa a bo bona ka lebaka la borapeli ba Satane. Bana ba ’nile ba bolaoa ke bana ba bang liketsong tse joalo. Joaloka batho ba baholo bao e leng ba bosatane, bana ba ’nile ba retla liphoofolo le ho li bolaea. Liphoofolo tsa lapeng li ’nile tsa etsoa lihlabelo aletareng ea litšebeletso tsa bosatane. Ha ho na sebaka se lekaneng mona ho akaretsa esita le karoloana ea polao e etsoang ke bana bao e leng litho tsa bolumeli ba borapeli ba Diabolose.
Na mehlala ee ea bana e mpa feela e le ho bapala ka Borapeli ba Satane? Na ba kenelletseng ka ho teba borapeling ba Diabolose baa fokola ka palo, ’me ke ho sa tloaelehang? Ha ho joalo, e ’nile ea e-ba karabelo ea ba bangata ba ileng ba fuputsa ka batho bana ba kopanelang tšebelisanong le meea. David Toma, eo pele e neng e le lefokisi la botekatsi, le tšebeliso e mpe ea joala le lithethefatsi ea ileng a fetoha sebui se susumetsang, o boletse hore sekolong se seng le se seng moo a buang, o botsa potso e tšoanang, “Bana, ke ba bakae ho lōna ba tsebang motho kapa ba kileng ba utloela ka motho ea amehang mekhoeng ea borapeli ba Bosatane?” O hakanyetsa hore “karolo ea boraro ho liithuti tsohle e phahamisa matsoho.”
Ho latela Shane Westhoelter, mopresidente oa Khokahanyo ea Boitsebiso Sechabeng, karolo ea 30 ho ea 40 lekholong ea liithuti tsa sekolo se phahameng e ameha mofuteng o itseng oa tšebelisano le matla a phahametseng tlhaho. Ho phaella moo, Westhoelter o tsitlella hore ho fihlela karolong ea 70 lekholong ea litlōlo tsohle tsa molao tse etsoang ke bacha ba lilemo tse ka tlaase ho 17 ba susumetsoa ke ho ameha tšebelisanong le matla a phahametseng tlhaho.
[Ntlha e Qolotsoeng e leqepheng la 5]
Borapeli ba Satane bo fumane mobu o nonneng har’a bacha ba kajeno