Molula-Qhooa le Tsoha!—Limakasine Tsa Mehla ea Rōna e Potlakileng!
1 Phethahatsong ea boprofeta ba Bibele, ho etsahala lintho tse tšosang lefatšeng! Ha re ntse re nahana ka se etsahalang ho re potoloha lefatšeng le ka har’a mokhatlo o hlophisitsoeng oa puso ea Molimo, re ka utloisisa ka botlalo hore na ho potlakile hakae hore re bolele ‘litaba tse molemo’ tsa ’Muso. (Mar. 13:10) Sena se re fa mabaka a ho tsoela pele tšebeletsong ea rōna ka cheseho khoeling ea April.
2 Bohlokoa ba molaetsa oa rōna bo hatisoa ke mosebetsi o khethehileng oo re tla o etsa khoeling ena. Re lebeletse ka tebello e khōlō ho lokolloa ha pampitšana ea Litaba Tsa ’Muso eo re tla e aba ka April le ka May. E le ho hōlisa cheseho ea rōna bakeng sa mosebetsi ona haesita le bakeng sa ho hlaolela thahasello tšimong ea rōna, Molula-Qhooa le Tsoha! li tla ba le lihlooho tse nakong tse totobatsang se boleloang ke boprofeta mabapi le liketsahalo tse ferekanyang tsa lefatše. Ka April re tsamaisa peeletso ea Molula-Qhooa. Ba bang ba ka ’na ba batla ho tsamaisa peeletso ea Molula-Qhooa le Tsoha! ka bobeli. Ke joang re ka lokisetsang nehelano e tla tsosa thahasello limakasineng?
3 Mohlomong u tla khona ho hōlisa nehelano e atlehang ka ho latela mehato e latelang ea motheo: (1) Khetha sehlooho ho e ’ngoe ea limakasine seo u nahanang hore se tla ipiletsa ho batho ba leng sebakeng sa lōna. (2) Khetha polelo kapa lengolo le qotsitsoeng sehloohong sena leo u lumelang hore le tla tsosa thahasello ho mong’a ntlo. (3) Lokisetsa nehelano e khutšoanyane e akarelletsang tumeliso e tletseng botsoalle, potso kapa polelo e totobatsang khopolo e thahasellisang ea Mangolo, le memo e tiileng ea hore a amohele peeletso. Joalokaha u bona, sena se bonolo ’me ha sea rarahana. Mohlomong u ka teana le mohoeletsi eo le sebetsang hammoho tšebeletsong ’me la lokisetsa nehelano.
4 Kaha “Tsoha!” ea May 8 e botsa potso, “Na Ee ke Mehla ea Qetello?,” u ka hlahloba boitsebiso tlas’a sehlooho se reng “Mehla ea Qetello” leqepheng la 13 bukeng ea “Ho Bea Mabaka.” U ka ’na ua qala ka ho re:
◼ “Re tlile ho tla buisana ka se boleloang ke liketsahalo tse ferekanyang tse etsahalang ho re potoloha. Hlokomela se boleloang ke sehlooho sena . . .”
5 “Molula-Qhooa” oa April 1 o botsa potso: “Bolumeli—Na ke Taba e Nenoang?” Ha u nehelana ka makasine ena, u ka ’na ua re:
◼ “Ho tloaelehile hore ho thoe bolumeli ke taba eo ho sa lokelang ho buisanoa ka eona hobane e baka likhang haholo. U nahana eng ka seo?” Ebe u bua ka polelo e leng sehloohong.
6 U ka ’na ua sebelisa “Molula-Qhooa” oa April 15 o nang le sehlooho se reng “Na ’Nete ea Bolumeli e ka Fumanoa?” U ka ’na ua fumana karabelo e ntle ka kenyelletso ena:
◼ “Kaha ho na le malumeli a mangata hakana kajeno, batho ba bang baa ipotsa hore na ’nete ea bolumeli e ka fumaneha. Sehlooho sena se senola tsela eo ’na le uena re ka fumanang karabo e khotsofatsang potsong ena. . . .”
7 Pele u e-ea mosebetsing oa boboleli, ke hobane’ng ha u sa itlhakise u sebelisa nehelano ea hao ho mohoeletsi e mong e le hore u ka tloaelana le eona? Ho ka etsahala hore le arolelane litlhahiso tse thusang tse tla eketsa katleho ea lōna ’me ho le fe sebete haholoanyane.
8 Ha bofelo ba tsamaiso ena bo atamela, e se eka re ka eketsa boiteko ba rōna ba ho thusa ba tšepahalang ho baleha Babylona e Moholo. (Tšen. 18:4) Molula-Qhooa le Tsoha! li phetha karolo ea bohlokoa mosebetsing ona o ke keng oa hlola o phetoa. Rea leboha hore ebe Jehova o fane ka likofuto tsena tse molemo hore re li sebelise!