Lenaneo le Lecha la Letsatsi le Khethehileng la Kopano
1 Le hoja mecha ea litaba le matichere a tlotlisa leruo la lintho tse bonahalang, Lentsoe la Molimo le re phehella ho “Rua Mesebetsing e Metle.” (1 Tim. 6:18) Seo ke sehlooho sa lenaneo la letsatsi le khethehileng la kopano le qalang ka September 2002. Re tla fumana khothatso efe kopanong ee?
2 Molebeli oa potoloho o tla beha puo sehloohong se reng “E-bang ba Ruileng Mahlong a Molimo,” ’me o tla buisana le ba bang ba ikitlaelletsang ho fumana maruo a moea. Ha sebui sa moeti se beha puo ea sona ea pele letsatsing leo, se tla bontša kamoo batho ba Molimo ba etsang “Mesebetsi e Metle Nakong Ena ea Kotulo.” E mong le e mong oa rōna o tla khothalletsoa ho hlahloba kamoo a ka kopanelang ka ho feletseng mosebetsing oa kotulo o etsoang kajeno, oo Molimo a o laetseng.
3 Re thaba hakaakang ha re bona bacha ba Bakreste ba phehella maruo a moea! Sena se tlotlisa Jehova se bile se thusa bacha ho rala motheo o motle bakeng sa litokelo tsa tšebeletso tsa nakong e tlang. Puo e reng “Ho Babatsa Bacha ka Mesebetsi e Metle e Rorisang Jehova” e tla totobatsa mesebetsi e metle eo bacha ba Bakreste ba ’nileng ba e etsa phuthehong ka ’ngoe.
4 Liphello tsa ho phehella mesebetsi e metle ke life? Sebui sa moeti se tla bua ka tsona puong ea sona ea ho qetela, e reng “Tsoela Pele ka Mesebetsi e Metle ’me U Kotule Litlhohonolofatso Tsa Jehova.” Se tla hlahloba likarolo tse ’nè tseo ho tsona re kotulang litlhohonolofatso tse enneng: (1) re le batho ka bomong, (2) re le malapa, (3) re le phutheho, (4) re le mokhatlo o hlophisitsoeng oa lefatše ka bophara.
5 Ba inehetseng ho Jehova ba tla ba le monyetla oa ho kolobetsoa. Haeba u tšoanelehela ho nka bohato boo, tsebisa molebeli ea okamelang hang-hang.
6 Ha ho etsoa tsebiso ea hore na letsatsi la kopano ea lōna le neng, potlakela ho etsa litokisetso tsa hore u be teng. Leka ka matla hore u fihle esale nako e le hore u kopanele pineng le thapelong e bulang. Ho ba teng le ho mamela ka hloko lenaneo lohle la letsatsi le khethehileng la kopano ho tla re matlafaletsa ho tsoela pele ho phehella tsela e etsang hore re rue e le kannete mahlong a Molimo, Jehova.