Khaolo ea 11

Johanne o Lokisa Tsela

HO FETILE lilemo tse 17 ho tloha ha Jesu e ne e le ngoana ea lilemo li 12 ’me a botsa baruti lipotso tempeleng. Ke nako ea selemo selemong sa 29 C.E., ’me ho bonahala motho e mong le e mong a bua ka ngoan’abo Jesu ka bo-’m’a bona, Johanne, ea bolelang naheng eohle e mathōkong a Nōka ea Jordane.

Ka sebele Johanne ke monna ea khahlehang, ponahalong le puong. Liaparo tsa hae ke tsa boea ba kamele, ’me o itlama letheka ka leqhaama la letlalo. Lijo tsa hae ke litsie le linotši tsa naha. Molaetsa oa hae ke ofe? “Bakang, hobane ’muso oa maholimo o atametse.”

Molaetsa ona o thabisa bamameli ba hae. Ba bangata ba hlokomela hore ho hlokahala hore ba bake, ke hore, ba fetole boikutlo ba bona ’me ba furalle tsela eo ba neng ba phela ka eona nakong e fetileng e sa lakatseheng. Ka hona ho tloha tikolohong eohle ea Jordane le ho tloha Jerusalema, batho ba tla ho Johanne ka bongata bo boholo ’me oa ba kolobetsa, o ba qoelisa metsing a Jordane. Hobane’ng?

Johanne o kolobetsa batho e le letšoao kapa ka tumelo ea ho bakela libe tsa bona ho tloha botebong ba pelo mabapi le selekane sa Molao oa Molimo. Ka hona, ha Bafarisi le Basadduci ba bang ba e-⁠tla Jordane, Johanne oa ba nyatsa. O re: “Malinyane a marabe, beang litholoana tse tšoanelang pako. ’Me le se ke la re ho lōna: Abrahama ke ntat’a rōna; hobane kea le bolella, ke re: Molimo o ka tsosetsa Abrahama bana le ka majoe ana. Selepe se se se beiloe metsong ea lifate; sefate ka seng se sa beeng litholoana tse molemo, se tla rengoa, se lahleloe mollong.”

Ka lebaka la tlhokomelo eohle eo Johanne a e fumanang, Bajode ba romela baprista le Balevi ho eena. Baa botsa: “Uena u mang?”

Johanne oa ipolela: “Hase ’na Kreste.”

Baa ’motsa: “Ke ho re’ng? A u Elia na?”

Oa arabela: “Ha ke eena.”

“A u moprofeta na?”

“Che.”

Kahoo baa mo qophella: “U mang, re tle re nee ba re romileng karabo? U re’ng ha u ipolela?”

Johanne oa hlalosa: “Ke lentsoe la ea hoang feelleng le re: Lokisang tsela ea Morena [Jehova]; joale ka ha moprofeta Esaia a boletse.”

Ba batla ho tseba: “Ha u se Kreste, u se Elia, u se moprofeta eo, ke ka baka la’ng ha u kolobetsa na?”

Oa arabela: “Ke kolobetsa ka metsi; empa e mong o teng har’a lōna, eo le sa mo tsebeng; ke eena ea tlang ka morao ho ’na.”

Johanne o lokisa tsela ka ho lokisa batho hore ba be boemong bo nepahetseng ba pelo ba ho amohela Messia, eo e tla ba Morena. Mabapi le Enoa, Johanne o re: “Ea tlang kamorao ho ’na, o mpheta ka matla, ’me ha kea lokela ho mo nkela lieta.” Ha e le hantle, ebile Johanne o re: “Ea tlang ka morao ho ’na, o moholo ho ’na, kahobane a na a le [teng] pele ho ’na.”

Ka hona, molaetsa oa Johanne, o reng “’muso oa maholimo o atametse,” o sebeletsa e le tlhokomeliso ho sechaba hore tšebeletso ea Morena ea khethiloeng oa Jehova, Jesu Kreste, e haufi le ho qala. Johanne 1:6-8, 15-28; Mattheu 3:1-12; Luka 3:1-18; Liketso 19:4.

▪ Johanne ke motho oa mofuta ofe?

▪ Ke hobane’ng ha Johanne a kolobetsa batho?

▪ Ke hobane’ng ha Johanne a ne a ka re ’Muso o atametse?