Rua Molemo ka Botlalo Kopanong ea Setereke ea “Thuto ea Bomolimo” ea 1993
1 “Nthute, Uena Jehova.” (Pes. 86:11, NW) Ena e lokela ho ba kōpo e tiileng ea mohlanka e mong le e mong ea inehetseng oa Molimo. Re ikemiselitse hore le ka mohla re se khaotse ho ithuta le hore le ka mohla re se khaotse ho sebelisa seo re ithutang sona. Ka linako tse ling ho hlokahala hore re lokisoe, ’me joalokaha mopesaleme a entse, ho hlokahala re kōpe Molimo ho kopanya pelo ea rōna e le hore e tle e se ke ea arohana. Lenaneo Kopanong ea Setereke ea “Thuto ea Bomolimo” le tla fana ka thuto e sebetsang le ho lokisoa hoo re ho hlokang e le hore re ka sebeletsa Jehova ka botšepehi le har’a likhatello tsa tsamaiso ena ea lintho.
2 Kopano ea Matsatsi a Mane: Lenaneo le tla nehelanoa libakeng tse loketseng tse 19 Afrika Boroa le linaheng tsa boahelani. Ho phaella lenaneong la Senyesemane, lenaneo le feletseng le tla nehelanoa ka Seafrikaanse, Sepedi, Sepotoketsi, Sesotho, Setsonga, Setswana, Sexhosa, le Sezulu, ’me likarolo tse ling ka Segerike le Sevenda. Libakeng tse tharo e leng Cape Town, Durban, le Johannesburg lipuo li tla tolokoa ka puo ea matsoho. Lenaneo le tla qala ka 1:20 motšehare oa mantsiboea ka Labone ’me le tla qetella hoo e ka bang ka 4:15 thapama ka Sontaha. Mamati a tla buloa ka 7:30 hoseng ho hong le ho hong. Ka kōpo hlokomela hore ha ho motho ea tla lumelloa ho kena pele ho 7:30 hoseng ntle le haeba a abetsoe ho sebetsa pele ho nako eo.
3 Ke eng seo re se boloketsoeng? Matletsa-tletse a lijo tse tiileng tsa moea a tla nehelanoa ka litsela tse sa tšoaneng: lipuo, lipontšo, lipuisano le litšoantšiso tse peli. U se ke ua fetoa ke leha e le efe ea lithuto tsena tsa bohlokoahali! Ho phaella moo, re lebeletse ho ea nchafatsa setsoalle sa khale le ho etsa metsoalle e mecha e mengata. Baromuoa ba sebeletsang tlas’a lekala la Afrika Boroa ba ka ’na ba e-ba teng kopanong ea lōna. Sebelisa monyetla ona hamolemo ho tseba baena le bo-khaitseli bana ba tšepahalang. Haeba u motsoali, kopanyeletsa bana ba hao moqoqong. Moea oa thabo le oa ho itela oa baromuoa bana o ka ’na oa ralla bana ba hao motheo oa ho nahana ka tšebeletso ea nako e tletseng e le mosebetsi oa bophelo.
4 Na U Tla Tlisa Karolo Eohle ea Leshome Tlung ea Polokelo? Ho Malakia 3:10, Jehova o ile a tšepisa Baiseraele hore haeba ba ne ba rata ho mo leka le ho tlisa karolo eohle ea leshome tlung ea polokelo, o ne a tla tšolla tlhohonolofatso ho fihlela ho se ho sa hlokahale.
5 Ho ba bang, ho leka Jehova ho tla bolela ho atamela bahiri ba bona kapele kamoo ho ka khonehang ho kōpa ho ea phomolong kapa nako ea ho ba sieo mosebetsing bakeng sa ho ba teng kopanong. Ka linako tse ling baena ba ile ba tsila-tsila ho etsa sena, ba nahana hore ho hang mohiri oa bona a ke ke a ba neha tumello ea ho ea kopanong. Empa, litabeng tse sa amaneng le lintho tsa moea, ba ka ’na ba ba le bothata bo fokolang kapa ba se be le bona ka ho tsebisa mohiri oa bona seo ba batlang ho se etsa.
6 Re lokela ho ipotsa: Haeba motsoalle eo re mo ratang a ne a kena lenyalong sebakeng se seng, na re ne re ke ke ra atamela mohiri oa rōna ho kōpa nako ea ho ba sieo e le hore re ka ba teng lechatong? ’Me ha ho bonahala a qea-qea, na ka tlhompho re ne re ke ke ra hlalosa kamoo ho tla ba bohlokoa ka teng hore re khone ho ea moo? Ka sebele ho rutoa ke Jehova ho bohlokoa ho feta ho ea lechatong! Haeba kannete re kholisehile hore lenaneo la kopano ke la bohlokoa khōlong ea rōna ea moea, ho tla ba bonolo haholoanyane ho kholisa mohiri oa rōna hore a re lumelle ka nako ea ho ba sieo e le hore re ka ba teng kopanong.—Jak. 1:7, 8.
7 Iseraeleng karolo ea leshome e ne e akareletsa ho tšehetsa sebaka sa Jehova sa borapeli ka lintho tse bonahalang. Mehleng ea rōna karolo ea leshome e emela nako, matla, le lichelete tse sebelisoang ka ho toba tšebeletsong ea Jehova le ho tšehetsa mosebetsi oa ’Muso. Karolo ea leshome e kopanyeletsa nako eo re e qetang libokeng, likopanong tse khōlō le tse nyenyane, hammoho le ho boloka libaka tseo re kopanelang ho tsona li hloekile. Kopano ea Setereke ea “Thuto ea Bomolimo” e tla re neha menyetla e mengata ea ho tlisa karolo eohle ea leshome ka tlung ea polokelo ea moea ea Jehova. E meng ea eona ke efe?
8 Re ka tlisa karolo ea leshome ka ho mamela ka tsebe e lethoethoe lenaneo la kopano, ka ho kopanela ka cheseho ha ho binoa pina e ’ngoe le e ’ngoe ea ’Muso, le ka ho mamela thapelo ka ’ngoe ka hloko, e le hore re ka phaella ka amen ea rōna e tsoang pelong.
9 Khatelo-pele ea rōna ’neteng e itšetlehile haholo ka mokhoa oo re mamelang ka oona. Holong e khōlō kapa lebaleng la lipapali, ho bonolo ho faposoa monahanong ke seo ba re potolohileng ba se etsang, ’me ka lebaka leo re tlameha ho boloka menahano ea rōna e tsepame. Etsa bonnete ba hore u tla kopanong u itokiselitse ka botlalo, u e-na le Bibele ea hao, buka ea lipina, pene le pampiri ea ho ngolla lintlha, le tokollo ea Molula-Qhooa e tla ithutoa bekeng eo. Hoa thusa ho ngola lintlha le mangolo a sebelisoang ke sebui ka seng. Ngola lintlha ka bokhutšoanyane; ho ngola lintlha tse ngata haholo ho ka ’na ha sitisa ho tsepamisa monahano. Ba banyenyane ka ho tšoanang ba lokela ho koetlisoa hore e be bamameli ba hlokolosi. Bana ba ka tlisa karolo ea leshome hammoho le batsoali ba bona ka ho latela lenaneo haufi-ufi kamoo ho ka khonehang.
10 Batsoali ba bang ba lokisetsa nako ea ho thōla lapeng letsatsi ka leng ha bana ba banyenyane ba lebeletsoe ho bala kapa ho sheba litšoantšo ho e ’ngoe ea likhatiso tsa Mokhatlo. Koetliso ena e ntle e nolofaletsa bana haholoanyane ho lula ba khutsitse nakong ea liboka le likopano. Batsoali ba hōlisitseng bana ba behang mohlala ba bolela hore le ka mohla ha ba lumelle bana ba bona ba banyenyane ho ea libokeng ba nkile lintho tsa ho bapala kapa libuka tse nang le litšoantšo tseo bana ba kenyang mebala ho tsona. Esita le bana ba banyenyane haholo ba ka ithuta hore lebaka la ho tla libokeng ke ho rapela Jehova. Batsoali ba rutang bana ba bona se boleloang ke ho tlisa ha bona karolo eohle ea leshome ntlong ea polokelo kannete ba lokela ho babatsoa!
11 Re ka boela ra tlisa karolo ea leshome ka ho ithaopela ho sebelisa nako le matla a rōna ho thusa tlhophisong ea kopano. Libakeng tse ngata ho ee ho lokisetsoe ho hloekisa letsatsi kapa a mabeli pele kopano e qala. Haeba u lula haufinyane, ke hobane’ng ha u sa lokisetse hore lelapa lohle le kopanele? Baena ba bang ba ile ba tla hammoho le liithuti tsa bona tsa Bibele tse hatelang pele e le hore esita le pele li ka kolobetsoa liithuti tsena tse ncha ’neteng li ka ithuta se amehang ho tšehetseng borapeli ba Jehova. Ho na le ho hongata ho lokelang ho etsoa ho tiisa hore kopano e tla tsamaea hantle. Ke hobane’ng le sa ithaope le le lelapa?
12 Tšehetso ea rōna ea lichelete kopanong ke tsela e ’ngoe ea ho tlisa karolo ea leshome. Ha a lokolisa kamoo limpho tse bonahalang li neng li lokela ho etsoa ka teng bakeng sa ho tšehetsa borapeli bo hloekileng, Jehova o ile a laela sechaba sa Iseraele: “Ba se ke ba itlhahisa pel’a Jehova ba le feela; ba mpe ba tle, e mong le e mong ka mpho ea matsoho a hae, le kamoo Jehova, Molimo oa hao, a u hlohonolofalitseng kateng.” (Deut. 16:16, 17) Hore na batho ba ne ba khona ho fana haholo kapa hanyane, mpho ea bona, e lokiselitsoeng esale pele, e ne e thabisa Jehova. Ka ho tšoanang, baena ba bangata ba nahanisisa ka thapelo mabapi le monehelo oo ba tla o etsa, hore na ke ka chelete ka ho toba kapa ka cheke (e lebisoang ho “Watch Tower Convention”). Na le ka mohla u lumella bana ba hao ba banyenyane ho tšela monehelo ka lebokoseng?
13 Khabisa Thuto ea Molimo, ’Moloki oa Rōna: Ka mekhoa ea rōna e metle le boitšoaro ba rōna bo botle, re ka “khabisa thuto ea Molimo, ’Moloki oa rōna, linthong tsohle.” (Tite 2:10, NW) Ka mantsoe a mang, re ka hla ra bontša hona kopanong hore thuto ea bomolimo ea sebetsa bophelong ba rōna.
14 Ho thoe’ng ka mekhoa ea rōna? Kajeno ho nahanela ba bang ho qephile lefatšeng. Empa batho ba Jehova, ba tataisoang ke melao-motheo ea Mangolo, ha ba nahanele molemo oa bona, empa ba nahanela molemo oa banab’abo bona. (Ba-Fil. 2:4) Re amehile ka ba bang ba re potolohileng. Ha re sututsane ha re eme meleng ea lijo kapa ea libuka. Re nahanela batho ba hōlileng le bana ba banyenyane bao mohlomong ba emeng moleng le batsoali ba bona ’me ba ka sututsoa habonolo ke batho ba baholo ba ka ’nang ba se ba hlokomele. Matlung a lijo re itšoara hantle le ho hlompha basebetsi, eseng ho hloka mekhoa kapa ho batla hona le hoane haeba tšebeletso e sa finyelle seo re se lebeletseng.
15 Boitšoaro ba rōna ba bomolimo bo na le tšusumetso ea sebele ho ba re potolohileng. Motseng o mong oa kopano selemong se fetileng, lepolesa le neng le bile lebothong ka lilemo tse 21 le ile la re: “Ke khahliloe haholo ke boitšoaro ba batho ba lōna. [Baa] ikhetha; ba thonaka lithōle ho se lea ba kōpileng ’me ba laolehile. Kopano ea lōna e hlophisitsoe hantle.” A phaella: “Ha batho ba lōna ba re bona, baa bososela. Eo ke pontšo e ntle. Ke sona seo re se batlang. Eo ke pontšo ea botsoalle ’me ha ho se ka patoang. ’Me hape re hlokomela kamoo bana ba leng ’moho le batsoali ba bona le ho itšoara hantle ka teng. Ntumele, ke khahliloe haholo. Hoa thabisa ho abeloa ho tla mona.”
16 Liofisiri tse ling li ile tsa etsa leeto le khethehileng la ho ea Bethele e Brooklyn ho atolosetsa memo ea ho tšoarela kopano motseng oa bona. Mokhatlo o ile oa amohela memo ena e mosa, ’me bo-ntate ba motse ha baa ka ba soabisoa. Motlatsi oa motsamaisi oa motse o ile a re: “Re thabile haholo ka hore ebe sehlopha se tummeng joaloka sa lōna se kopane motseng oa rōna. Re entse boiteko bo boholo ba hore le be mona . . . ’me re ne re ke ke ra thaba haholoanyane.” Ka boitšoaro ba bona bo botle, moena ka mong le khaitseli o ile a tlatsetsa bopaking bo tsotehang bo fanoeng mona.
17 Na uena ka bouena u tla khabisa thuto ea Molimo, ’Moloki oa rōna ka boitšoaro ba hao bo behang mohlala? Litsela tse ngata tseo ho ka etsoang sena ka tsona ke tsena:
Moaparo le boitlhopho: Nakong eo re leng kopanong, ha rea lokela ho nahana eka re phomolong. Ho e-na le hoo, re itlhahisa ho Jehova ho tla rutoa ke eena. Ka lebaka leo, na ha rea lokela ho apara joalokaha re ea libokeng Holong ea ’Muso? (1 Tim. 2:9, 10) Ho phaella moo, re lokela ho nahana ka hloko ka seo re tlang ho se apara ka mor’a ho fela ha mananeo. Ha re khutlela moo re robalang teng, na e ne e tla be e le boitšoaro bo tumellanong le mosebetsi oa rōna, ho sa tsotellehe lilemo tsa rōna, ho fetola moaparo oa rōna o leka-lekaneng, le o nang le seriti oa kopano ebe re apara lintho tse neng li tla etsa hore re shebahale re le batho ba amehileng ka lintho tsa lefatše ba apereng ka mokhoa o bohlasoa? Na see se ne se ke ke sa fana ka maikutlo a hore liaparo tsa rōna tsa ho ea libokeng ha e bile hase letho haese seaparo feela sa nako e itseng ho e-na le ho bonahatsa tsela ea rōna ea bophelo? Hopola, re jere lebitso la Jehova, ’me motho ka mong ho rōna o tlameha ho bona hore ha ho na qoso e utloahalang e tlisoang khahlanong le tsela ea ’nete.
Ba eang kolobetsong ba lokela ho hopotsoa hore ha hoa lokela ketsahalong e halalelang joalo ho apara likipa tse nang le mantsoe le mapetjo a lefatše, kapa phatlalatso ea khoebo. Baholo ba lokela ho etsa bonnete ba hore lipotso tsa kolobetso li hlahlobjoa hantle esale pele le hore motho ka mong ea eang kolobetsong o boleletsoe esale nako hore na oa tšoaneleha bakeng sa kolobetso kapa che. (Ha ho hlahlobjoa lipotso, e ka ba nako e loketseng ea ho fana ka litlhahiso mabapi le moaparo o loketseng le o leka-lekaneng bakeng sa kolobetso.) Ho ke ke ha hlokahala hore ba eang kolobetsong bao baholo ba ba tsebisitseng hore baa tšoaneleha ba ngolise kopanong.
Lihotele: Bontša litholoana tsa moea ha u ngolisa hoteleng ea hao. Mohlomong basebetsi ba hotele ha baa hlomelloa ho sebetsana le sehlopha se seholo ka nako e khutšoanyane. E-ba le mamello, ipehe boemong ba ba bang, ’me ka ho loketseng u ka fana ka mpho bakeng sa tšebeletso.
Bana ba ka phetha karolo ea bona ka ho bontša tlhompho bakeng sa thepa ea hotele le ka ho utloa melao e laolang tšebeliso ea letangoana la ho sesa le lisebelisoa tse ling. Ho tla ba molemo hore batsoali ba qete nako e itseng le bana ba bona pele ho kopano ba hlahloba mofuta oa boitšoaro boo ba tlang ho lebelloa ho ba le oona, ba ba hopotsa ka boikarabelo ba bona ba botho ba ho iphaphatha le litekanyetso tsa boitšoaro ba Bokreste.
Lisebelisoa tsa ho rekota: Le hoja lik’hamera tsa video le libapala-lik’hasete li lumelletsoe, rea tseba hore u tla nahanela ba bang. E ne e ke ke ea e-ba ho bontša lerato ho sira bao u tlileng le bona kopanong ha u ntse u nka lenaneo lifoto. Haeba u ka rekota ka hloko u le setulong sa hao, ha ho na phoso ka ho etsa joalo. Leha ho le joalo, ka kōpo hopola hore, ha ho lik’hamera kapa lisebelisoa tsa ho rekota tse lokelang ho hokahanngoa le tsamaiso ea motlakase kapa ea molumo kopanong, kapa hore thepa leha e le efe e ka behoa litselaneng tsa holo kapa libakeng tseo batho ba fetang ho tsona.
Litulo: Ka kōpo hopolang hore LITULO LI KA BOLOKELOA FEELA LITHO TSE HAUFI TSA LELAPA LA HAO LE MOTHO LEHA E LE OFE EO U TSAMAEANG LE EENA KOLOING EA HAO. Likarolo tse khethehileng bakeng sa batho ba hōlileng le ba holofetseng li tla fumaneha likopanong tsohle. Ka kōpo nahanela ba hōlileng. Linakong tse fetileng, baena ba bang ba hōlileng ba ile ba tlameha ho batla litulo libakeng tse leng hōle hobane bacha ba tlatsitse litulo karolong ea ba hōlileng. Re masoabi hore ebe ho ke ke ha amoheloa likōpo tsa liphaposi tse ka thōko kapa libaka tsa bao ’mele ea bona e hananang le menkho kapa lintho tse itseng.
Lintho tsa botho: Ho etsoa tlhahiso ea hore u lekanyetse lintho leha e le life tsa botho tseo u tlang le tsona kopanong. Haeba ntho e itseng e sa felle ka tlas’a setulo sa hao, ho ka ba molemo hore u e siee hae kapa ka buting ea koloi. Li-cooler tse khōlō ha lia lumelloa ho behoa litselaneng ka mabaka a tšireletso, ’me haeba li behoa holim’a setulo se leng pel’a hao, sena se tla sitisa e mong ho fumana setulo.
Tšebeletso ea lijo: Ho tla fanoa ka tšebeletso ea lijo likopanong tsohle. Re rata ho khothaletsa bohle ba leng teng hore ba je lijo tse lokiselitsoeng.
Likopanong tsohle ho etsoa litokisetso tse tiisang hore lijo tse lekaneng li tla fumaneha bakeng sa bohle ba tlileng kopanong. Moo lenane le leholo la batho ba tlileng kopanong le robalang likolong, Komiti ea Kopano e tla hlokomela hore ho fanoa ka lino-mapholi bakeng sa mantsiboea le lijo tsa hoseng. Sena se tla etsa hore ho se ke ha hlokahala hore batho ba tlileng kopanong ba tle le litofo tsa gase le liporaema. Lintho tsena li baka bothata ba mollo mehahong eo batho ba tlileng kopanong ba robalang ho eona. Re khothaletsa bohle hore ba tšehetse tokisetso ea tšebeletso ea lijo ka pelo eohle. Re lakatsa ho phaella ka ho bontša hore ka lebaka la litefello tsa libaka tsa likopano tse ntseng li phahama ho se ho le thata hore tšebeletso ea lijo e khahlametse litšenyehelo tsohle tsa libaka tsena. Ka lebaka leo, u ka ’na ua lakatsa ho romela monehelo esale pele motseng oa kopano oo phutheho ea heno e tla ba ho oona. Menehelo eohle e ananeloa haholo ’me Mokhatlo o lakatsa ho le leboha esale pele bakeng sa ho fana ha lōna ka seatla se bulehileng le ho tšehetsa lithahasello tsa ’Muso ka tsela ena le kopane.—Luka 6:38.
18 E le ho nahanela ba bang ka lerato, rera ho fihla esale hoseng letsatsi ka leng, haholo-holo ka Labone ha mohlomong hoo ho tla nka nako e teletsana ho feta e tloaelehileng ho fumana sebaka sa ho paka koloi le ho fumana litulo.
19 Re na le tokelo e kaakang ea ho rutoa ke Jehova! Ho sebelisa ha rōna nako, matla, le mehloli ea lintho tse bonahalang ho tšehetsa Kopano ea Setereke ea “Thuto ea Bomolimo” ho tla fella ka melemo ea ka mehla ea moea ho rōna hammoho le ho malapa a rōna.
Likhopotso Bakeng sa Kopano ea Setereke
Boitšoaro bo Loketseng: Ho bohlokoa hore bohle ba tlileng kopanong ba hlokomele boitšoaro bo loketseng, ka tlhompho ba talime sebaka sa kopano e le “ntlo ea Molimo.” (Pes. 55:14, NW) Nakong ea lipuo, litšoantšiso, lipina, le haholo-holo nakong ea lithapelo, ka kōpo qobang ho etsa ntho leha e le efe e tlang ho faposa tlhokomelo ea ba bang ba mametseng lenaneo. Ho ’na u ntse u tsamaea ho sa hlokahale, ho tsoela pele ka ho qoqa, kapa ho sebelisa flash ea lik’hamera kapa video ka tsela e sitisang ba lekang ho nahanisisa ka se boleloang e tla be e le ho se bontše tlhompho. Ho nahanela ha rōna le boitšoaro bo botle li tla bontša hore ka botšepehi re ananela thuto ea bomolimo le hore re tlile kopanong ho tla rutoa ke Jehova.
Marobalo: Tšebelisano-’moho ea hao ka ho sebelisa marobalo a lokiselitsoeng ke kopano e ananeloa haholo. Haeba u rerile ho robaletsa motseng oa kopano ’me ha u e-s’o tiise tokisetso ea marobalo, ka kōpo etsa joalo hang-hang.
Bangoli ba phutheho ba lokela ho tiisa hore liforomo tsa Kōpo ea Kamore li romeloa kapele atereseng e loketseng ea kopano. Haeba u tlameha ho hlakola tokisetso ea marobalo e entsoeng ka Lefapha la Marobalo, u lokela hore hang-hang u tsebise mong’a ntlo kapa hotele le Lefapha la Marobalo la kopano e le hore kamore e ka abeloa motho e mong. Likopanong tse ling ho ntse ho e-ba thata haholoanyane ho fumanela batho ba bangata ba tlileng kopanong marobalo. Ho hlōla bothata bona likomiti tsa kopano li tla lokisetsa ho hira likolo tse leng sebakeng sa kopano joalokaha ho ’nile ha etsoa nakong e fetileng. Leha ho le joalo, ka lebaka la keketseho lenaneng la ba hlokang marobalo a mofuta ona joale re tla sebelisa seo ho thoeng ke “dormitory system.” Ka mantsoe a mang, bo-khaitseli ba tla robala ka liphaposing tse itseng ’me baena ka ho tse ling. Kahoo, ha ho sa tla hlola ho lumelloa malapa ho robala ka phaposing e le ’ngoe. (Bona Tsoha! ea January 8, 1992, leqephe 29.) Ka linako tse ling tokisetso ena e na le litšitiso tse itseng empa re kholisehile hore bohle ba tla ananela lebaka la eona. Tokisetso ena e se e kile ea sebelisoa likopanong tse ling ’me ea atleha haholo.
Likoloeana tsa Bana (Prams): Lefapha la Mollo le khothaletsa hore likoloeana tsena li se ke tsa kena ka holong ea kopano ebe li behoa libakeng tsa holo tseo batho ba fetang ho tsona le litselaneng tsa holo kapa pakeng tsa litulo. Kaha letšoele le leholo la batho le ka baka tšubuhlellano, likoloeana tsa bana li ka ba kotsi eseng feela ho bana empa le ho motho ofe le ofe eo li ka mo khopang. Kahoo re kōpa hore le se ke la kena le tsona ka holong ea kopano. Leha ho le joalo, litulo tsa masea kapa tseo a behoang ho tsona ka koloing li lumeletsoe, kaha li ka tlamelloa litulong tse pel’a batsoali. Tšebelisano-’moho ea lōna tabeng ena e tla ananeloa. Kae le kae moo ho khonehang Komiti ea Kopano e tla etsa boiteko ba ho lokisetsa phaposi eo bo-’mè ba ka hlokomelang masea a bona ho eona ha ho hlokahala.
Kolobetso: Ba eang kolobetsong ba lokela ho lula litulong tse khethehileng tseo ba li lokiselitsoeng pele lenaneo le qala ka Moqebelo hoseng. E mong le e mong ea itokiselitseng ho ea kolobetsoa o lokela ho tla le liaparo tse hlomphehang tsa ho sesa le thaole. Ka mor’a puo ea kolobetso le thapelo e tla etsoa ke sebui, molula-setulo oa lenaneo o tla fana ka litaelo tse khutšoanyane ho ba eang kolobetsong le ho bolela pina. Ka mor’a hore ho binoe mola oa ho qetela, bahlokomeli ba tla lebisa ba eang kolobetsong sebakeng sa ho qoelisoa kapa makoloing a tla ba isa moo. Kaha kolobetso pontšong ea boinehelo ba motho ke taba ea lekunutu le ea botho pakeng tsa motho ka mong le Jehova, ha ho na tokisetso ea ho bitsoang likolobetso tsa balekane tseo ho tsona ba babeli ba eang kolobetsong kapa ba eketsehileng ba hakanang kapa ba tšoaranang ka matsoho nakong eo ba kolobetsoang ka eona.
Tšebeletso ea Boithaopo: Thuso ea baithaopi ea hlokahala bakeng sa tšebetso e phollatsi ea kopano ea setereke. Esita le haeba u ka khona ho sebetsa karolo e itseng ea nako ea kopano, mosebetsi oa hao o tla ananeloa. Haeba u ka khona ho thusa, ka kōpo itlhahise Lefapheng la Tšebeletso ea Boithaopo kopanong. Bana ba ka tlaase ho lilemo tse 16 le bona ba ka tlatsetsa tšebeletsong e atlehileng ea kopano, empa ho hlokahala hore ba sebetse le motsoali kapa motho e mong e moholo ea nang le boikarabelo.
Lipina: Kaha ho bina ke karolo ea borapeli ba rōna re khothaletsa bohle ho ithuta lipina tse latelang tseo e tlang ho ba karolo ea lenaneo: 91, 59, 111, 148, 191, 113, 114, 164, 183, 166, 156, 202, 105, 151, 181, 70, 42, 106, 53, 79 le 85. (Re khothaletsa hore liphutheho li qale ho ithuta bonyane pina e le ’ngoe ka mor’a seboka ka seng.)
Seboka sa Bethele: Ho tla ba le seboka ka letsatsi la bobeli la kopano bakeng sa bahoeletsi leha e le bafe ba inehetseng ba pakeng tsa lilemo tse 19 le 35 ba ka ratang ho kenela tšebeletso ea Bethele. Ho tla etsoa tsebiso kopanong mabapi le nako le sebaka seo seboka sena se tlang ho tšoareloa ho sona.
Libeche: Ka kōpo qhoaela beche ena e entsoeng ka ho khetheha ha u le kopanong leha u ea kapa u khutla sebakeng sa kopano. Hangata sena se re nolofaletsa ho fana ka bopaki bo botle ha re ntse re tsamaea. U lokela ho iphumanela beche ka phutheho ea heno kaha, li ke ke tsa fumaneha kopanong. (Ka kōpo liphutheho li hlokomele hore: Liodoro tse amohetsoeng ka mor’a la 1 November, 1993 li ke ke tsa sebetsoa. Bonang Tšebeletso ea Rōna ea ’Muso ea August 1993, tlas’a Litsebiso.)
Boitsebahatso ba Botho: Ho kopanyeletsa le beche ea Kopano ea “Thuto ea Bomolimo,” motho ka mong o khothaletsoa hore a be le karete ea hae ea Advance Medical Directive. Litho tsa lelapa la Bethele le bo-pula-maliboho le bona ba lokela ho ba le likarete tsa bona tsa boitsebahatso.
Tlhokomeliso: Ho sa tsotellehe hore na u paka koloi ea hao hokae, u lokela ho e notlela ka linako tsohle ’me le ka mohla u se tlohele letho le bonahalang ka har’a eona. Notlella lintho tsa hao ka buting haeba ho khoneha. Hape, hlokomela masholu le bak’hothotsi ba hoheloang ke liboka tse khōlō. Sena se akareletsa ho se tlohele letho la bohlokoa le sa hlokomeloa litulong tsa kopano. Ho bile le litlaleho tse ’maloa tsa batho ba bolotsana ba ileng ba leka ho hohela bana hore ba tlohe sebakeng sa kopano. Ka kōpo e-bang hlokolosi.
Ho ’nile ha tlalehoa hore lihotele tse ling habonolo feela li fana ka tumello ea ho shebella mananeo a thelevishene a boitšoaro bo bobe kapa esita le a bontšang litšoantšo tsa bootsoa. Sena se hatisa bohlokoa ba ho thibela bana ho shebella TV ba sa behoa leihlo libakeng tsena tsa ho robala.
Baena ba bang le batho ba thahasellang ba ile ba letsetsa batsamaisi ba sebaka seo kopano e tšoareloang ho sona thelefono ba batla boitsebiso mabapi le nako ea ho qaleha ha mananeo le litaba tse ling. Ka kōpo le se ke la etsa sena. Haeba boitsebiso boo le bo hlokang bo ke ke ba fumanoa ho Tšebeletso ea Rōna ea ’Muso, le lokela ho ngolla atereseng ea kopano eo le ka e fumanang ho mongoli oa phutheho ea lōna.