“Jionyesheni Wenyewe Kuwa Wenye Shukrani”

¹ Walio wengi kati yetu tulifundishwa utotoni kusema “tafadhali” na “asante” mtu anapoonyesha hisani au fadhili. Paulo atushauri kwa upole sikuzote ‘tujionyeshe wenyewe kuwa wenye shukrani,’ na twapaswa hasa kumshukuru Yehova. (Kol. 3:15, 16) Lakini twaweza kuonyeshaje shukrani kwa Muumba wetu Mtukufu? Na ni sababu zipi za pekee tulizo nazo za kumshukuru?

² Mtume Paulo aliandika: “Shukrani kwa Mungu, kwa maana yeye hutupa sisi ushindi kupitia Bwana wetu Yesu Kristo!” (1 Kor. 15:57) Wakati wa Ukumbusho kila mwaka, twakumbushwa upendo usio na mpaka ambao Mungu na Kristo walionyesha kwa kuandaa fidia itupayo tumaini la uhai wa milele. (Yn. 3:16) Kwa kuwa karibu sisi sote tumepoteza wapendwa katika kifo, twashukuru kama nini kwa ahadi ya Yesu ya ufufuo! Mioyo yetu inafurika kwa shukrani tunapotafakari tazamio la kuokoka mwisho wa mfumo huu bila kufa kamwe. (Yn. 11:25, 26) Si rahisi kupata maneno ya kuonyesha shukrani kwa baraka zote nyingi ajabu tutakazofurahia mikononi mwa Yehova katika Paradiso ya kidunia ijayo. (Ufu. 21:4) Ni sababu zipi nzuri zaidi ambazo mtu angekuwa nazo ili ‘kujionyesha mwenyewe kuwa mwenye shukrani’ kwa Mungu?

³ Jinsi ya Kuonyesha Shukrani kwa Mungu: Sikuzote inafaa kuonyesha shukrani zetu kwa Yehova katika sala kwa wema wake. (Zab. 136:1-3) Pia, twachochewa, kuonyesha shukrani zetu kwake kwa njia nyingine zilizo chanya. Kwa kielelezo, kwa hakika tutakuwapo Jumapili, Machi 23, ili tuhudhurie Ukumbusho wa kifo cha Kristo. Ili tusaidie kutimiza mahitaji ya kutaniko la kwetu na kazi ya ulimwenguni pote, kwa kuterema ‘tunamheshimu Yehova na vitu vyetu vya thamani.’ (Mit. 3:9, NW) Twaunga mkono kikamili wazee na kushirikiana nao, hivyo tukionyesha shukrani zetu kwa Yehova kwa msaada ambao yeye huandaa kupitia wao. (1 The. 5:12, 13) Kila siku sisi hujaribu kudumisha mwenendo mnyoofu ambao hutukuza jina la Mungu. (1 Pet. 2:12) Yehova anapendezwa na uthibitisho wote huu wa shukrani zetu.—1 The. 5:18.

⁴ Wonyesho Wetu Mzuri Zaidi wa Shukrani: Kushiriki kwa nafsi yote katika kazi ya kuhubiri Ufalme, kuliheshimu jina la Yehova, kuonyesha shukrani katika sala, na kutetea kweli kwa uaminifu-mshikamanifu ni miongoni mwa maonyesho ya shukrani za moyoni ambazo twaweza kumtolea Muumba wetu kwa yale yote ambayo ametufanyia. Yehova hufurahia kutuona tukimtolea matendo ya utumishi mtakatifu kwa kuunga mkono mapenzi yake “kwamba watu wa namna zote waokolewe.” (1 Tim. 2:3, 4) Ndiyo sababu watangazaji wengi ambao wanaweza kuupangia wanaitikia mwito ulioonekana katika Huduma ya Ufalme Yetu ya Februari wa kujiandikisha kuwa mapainia-wasaidizi kwa mwezi mmoja au miwili ya Machi, Aprili, na Mei. Kujitahidi zaidi katika huduma ni njia nzuri zaidi ya ‘kujionyesha wenyewe kuwa wenye shukrani’ kwa Mungu. Je, utaweza kuunga mkono vikundi vya mapainia katika Aprili? katika Mei?

⁵ Tumepewa tumaini hakika la kuishi milele. Tunapoliona likitimizwa, tutakuwa na sababu nyingi zaidi kila siku za kuendelea kumpa Yehova shukrani kwa shangwe.—Zab. 79:13.