Jenganeni kwa Kutoa Maelezo Mikutanoni

¹ Kwenye Waebrania 10:24 twahimizwa ‘tuchocheane kwenye upendo na kazi zilizo bora.’ Hilo latia ndani kujengana kwa kutoa maelezo yenye maana kwenye mikutano ya kutaniko. Kwa nini tutoe maelezo? Twaweza kufanyaje hivyo? Ni nani mwenye kunufaika?

² Fikiria mara nyingi ambazo unanufaika kutokana na kusikia wengine wakitoa maelezo sahili, yaliyo waziwazi ambayo huboresha uelewevu wako na kukuimarisha kiroho. Una pendeleo la kufanyia wengine vivyo hivyo. Unaposhiriki, waonyesha tamaa yako ya “kuwapa baadhi ya zawadi ya kiroho” kwa kuwatia moyo wote wanaohudhuria.—Rom. 1:11, 12.

³ Jinsi ya Kutoa Maelezo Mazuri: Usitoe maelezo marefu, ukieleza kila wazo katika fungu. Maelezo marefu kwa kawaida hukosa kukazia jibu mahususi na huenda yakawazuia wengine kushiriki. Elezo la kwanza la fungu lapaswa kuwa fupi, likiwa jibu la moja kwa moja kwa swali lililochapwa. Wale wanaotoa maelezo ya ziada wanaweza kueleza matumizi yanayofaa ya habari hiyo au kuonyesha jinsi maandiko yanavyoweza kutumiwa. Ona kitabu Kiongozi cha Shule, ukurasa wa 90-92.

⁴ Ikiwa una wasiwasi kutoa maelezo, tayarisha maelezo mafupi mapema, na umwombe mwenye kuongoza akuite mfikiapo fungu hilo. Baada ya kufanya hivi kwenye mikutano michache, itakuwa rahisi zaidi kushiriki. Kumbuka kwamba Musa na Yeremia walieleza ukosefu wa uhakika katika uwezo wao wa kusema hadharani. (Kut. 4:10; Yer. 1:6, kielezi-chini katika New World Translation—With References) Lakini Yehova aliwasaidia waseme kwa niaba yake, naye atakusaidia pia.

⁵ Ni Nani Atakayenufaika na Maelezo Yako? Wewe mwenyewe wanufaika kwa sababu maelezo yako hukazia kweli kwa imara zaidi katika akili na moyo wako, yakifanya iwe rahisi zaidi kukumbuka habari hiyo baadaye. Pia, wengine hunufaika kwa kusikia maelezo yako yenye kujenga. Twatiwa moyo wakati ambapo watu wote, wawe wazoefu, wachanga, wenye haya, au wapya, wanajitahidi kueleza imani yao kwenye mikutano ya kutaniko.

⁶ Kwa hakika tutaona kwamba ‘maneno yanenwayo wakati wa kufaa ni mema kama nini’ yanapotumiwa kujengana mikutanoni!—Mit. 15:23.